今日係上返兩年前報讀的電單車路路通課程的日子，連日來都好期待同緊張，因為我已經整整兩年冇楂過電單車，今次仲要一次過上四個鍾堂兼甩晒 P牌咁周圍楂！
Mavis亦join埋我地的車隊，即係將會一行五架電單車，已經想像到會好型呀！我地四點放工後佢就載我去駕駛學院啦，jimmy就係駕駛學院度等我地！
簽返張生死狀先！好在Mavis提我換證，第一項已，清楚列明要有正式牌照先可以上堂，唔係黎到真係企左係度！
其實當時我冇睇清楚就簽啦，因為掛住上車玩，宜家睇返，原來第七項話死亡同永久傷殘先係賠十萬咋，超少呀，好在我冇事安全返黎咋！
第八項又幾好喎，touchwood您點炒爛架車，最多只係賠五千比駕駛學院咋！
跟住試車先，駕駛學院兩個月前換左成批新車，ｄ車比起我學車個時，真係好新正同"令立立"，花痕都冇既！阿sir叫我先楂返以前上堂個款車先，跟住ok就用路路通的靚綿羊！
再次上車，真係有種似曾相識的感覺！開車個剎都窒窒地，停車又停得略急攪到成個人有ｄ衝前；係學校入面兜左兩個圈後，又打下路面八字，嘩，打到出晒界呀，斜路八字更加冇膽試啦！哈哈！
之後阿sir叫我試路路通靚綿羊，望到架車大架ｄ，少少驚，但阿sir話呢架係靚車，會定好多，楂兩楂就知；坐上去後，發覺舒服過上堂個ｄ車，兼且仲有得挨住，試楂完又真係體會到阿sir講個種隱定喎，就一於揀佢出車啦！GOGOGO！！！我地出車次序係：阿sir、我、jimmy、另一阿sir、mavis！
阿sir話一開始就出公路會怕我會怯，所地我地行舊大埔道先，亦途經中大；行了長長的舊大埔道熟練過後，我地就出吐露港去粉嶺經聯和墟，再去首站 - 沙頭角&鹿頸！
係吐露港發生了好驚險既事，就係我架車擺左幾下，個幾下，真係好驚好驚呀！我著左風褸，真係可以檔風同唔會楂到個身好凍，但亦成個人好似著左救生衣咁，被ｄ風吹到漲晒，唔知係咪咁仲更易被扯起咁．．．因為我楂楂下，都冇減速or加速，但無拿拿架車就擺左幾下！好在我夠鎮定，係咁楂實"棠"軚，跟住就冇事啦！但第一次親身體驗係高速公路被風扯倒的感覺，個下真係好驚，話晒我架車先得125/150 cc 咋！
到達沙頭角後，阿sir問我頭先攪乜鬼，原來佢地三個係後面都好清楚見到我擺左幾下呀！如果我當時驚得滯或者好怯，可能會擺到片左落地，跟住被其他車輾過．．．都唔定呢，嘩，咁我算唔算執返條命呀？好驚呀！
呢度就係沙頭角近邊境鹿頸個帶，環境幾靚，一望無際，只係水面上的黑泥．．．
楂電單車其中一樣唔好處係．．．形象會受損！一除頭盔後，ｄ頭髮會走晒樣，好醜怪，但唔影相留念又唔得喎，因為我都唔知幾時會再楂電單車架麻！
遠處個ｄ樓原來係大陸黎架啦，我地真係係好邊境呢！
睇下jimmy個頭，好似泳帽呀，我仲問佢可唔可以用黎游水架？答案係：唔得！哈哈！
跟住再出發，經新娘潭入大尾篤；去到聞到陣陣BBQ味，好想燒埋一份呢！閒日呢度無咩人，環境好清幽，仲望到八仙嶺呢！
之後沿住大尾篤走，行行下覺得好熟面口，原來經過太陽哥哥的哥哥屋企，好有親切感呀！跟住轉入一條小路，左手面就見到一排好長好靚既屋，原來係比華利山別墅呀！嘩，好大好靚呀，仲好grand好似大皇宮咁，我即刻慢駛欣賞吓，但影唔到相呀，唯有copy個網頁比大家睇啦：http://www.hld.com/construction/prime_beverly_c.html
小路盡頭係一個小漁村，佢地話呢度叫"三門仔"喎，真係好家鄉 feel！
我地就係呢個土多度休息同食野，jimmy埋單，仲慰勞埋兩位阿sir，真係多s晒！不過我地只係飲野同食燒賣咋，因為怕一陣食唔落晚飯麻，而阿sir們就當正呢餐係晚餐咁，食公仔麵，因為佢地返去仲要教堂，真係慘喇！我地三個亦商議定今晚係邊度食飯晚，已經揀定去火炭食雞粥喇，諗起都流晒口水！
食完野都七點了，剛好天黑，又出發了！跟住個站係白石，我地經馬鞍山去，白石我以前都同碌齡朋友黎過BBQ了，所以又係好有親切感，覺得今日去左好多地方都好熟悉同有親切感呀！呢度有個大golf 場，仲記得呢度BBQ有得成隻乳豬咁燒架！但今日好少人，晚飯時候，聞到ｄBBQ味道，又好想燒埋一份呢！
遠處有燈個度原來就係頭先食野既三門仔，嘩，估唔到我地行左咁多路了！
好型的五架戰車，好cool的車隊！藍色個架就係我架戰車啦！
同兩位阿sir影返張合先，因為之後唔會點再停車影相架啦！
剩返一個鐘，時間無多，最後只可經西沙公路入西貢，去埋西貢市中心個海邊兜左個圈，但冇停車所以冇影相，之後再經西沙公路出返去，經高速公路沿住小瀝源方向回駕駛學院！
西沙公路雖然多彎，但係我覺得最好行，因為好寧靜，又未到夏天好熱的夜晚，反而好清涼好舒服，又聞到好多草味，好有郊區feel！反而上左高速公路的風馳電掣感覺我好怕，好大風之餘又好大聲，尤其是吐露港！不過回程時行高速都好有信心，我仲係咁跟貼阿sir，最高仲見到咪錶行到 92 咪呢！不過阿sir話綿羊仔的咪錶比實際快少少既，雖然係咁，但我都會以呢個做我個人紀錄呢！
遠處望見駕駛學院時，知道四小時的路路通課程快要結束，心入面真係有ｄ唔捨得，可能楂楂下又燃點返以前想擁有電單車個團火啦！落車交返鎖匙比阿sir個刻，真係好唔捨得呢！
阿sir話我返黎個程唔驚囉喎，渣渣聲咁去，楂得好順喎；當然啦，我係您教出黎架麻，哈哈！多謝阿sir後，都好有感觸，因為都唔知幾時會再見lu！
似曾相識的泊車場！
我曾經屢戰屢敗、跌過無數次的打八字斜坡！再見了~~
之後我地去左火炭津津食雞粥，好旺好多人喎！不過只係津津，隔離個間好靜呀！
我地叫左雞粥、蠔餅同金銀蛋時菜，用黎食雞粥既碗好古代feel，好似古裝劇入面用黎飲茶個ｄ碗呀，哈哈！敬您既，飲勝！！
被頭盔"粒"住幾個鐘，大家都變晒樣了！面上亦好多面油同好污糟呢，紙巾一抹係灰色架！
紅色呢個頭盔，陪伴住我過去學車&考車的日子，今日亦陪我上埋最後的路路通課程，佢見證住我學電單車的成長日子！今日完璧歸趙，將佢交返比佢主人，即mavis，亦要多謝mavis借左個頭盔比我達兩年半之久！隔離個個係mavis今日用的頭盔，一個咁大一個咁細，好似媽媽同BB咁，哈哈！雖然細ｄ戴上去係型ｄ，但貪靚既後果係．．．咪就係mavis抹面張紙巾係灰色囉！哈哈！
今日真係好難忘，亦好值得紀念，好有可能係我電單車生涯既 last day了，因為返去問過太陽哥哥同媽咪，我同佢地講：今日玩完好開心呀，又想買車了，可唔可以呢？點知兩個都好決絕話：ＮＯ！！！
雖然冇得擁有一架電單車，但換來媽咪同男朋友的愛錫同愛護，亦係另一種得著，所以要好好珍惜佢地對我的痛惜，而唔好意圖或企圖靜靜雞去買左唔同佢地講呀，呢個先斬後奏既念頭係好唔岩架，一定要諗清楚！
沒有留言:
張貼留言