前日blog咪話去運輸署攪手續既，其實有個小故事既：識我的朋友都知我有考綿羊電單車牌架啦，大家好記性的話，我係喺2006年4月考到既，因為報答幾位呀sir對我特別款待，加上考試pass後的高漲心情，當時就報左大概一千元的四小時路路通課程，限期係一年，楂就楂新的綿羊仔，唔會楂平時學車ｄ舊車架！
呀sir點樣特別款待我？平時成日同我傾計、知我book左堂練車會留架靚車我用（正常黎講係冇得揀車架!）、臨近考試時個次練習，我仲記得個朝可能我早返啦，佢特登陪我楂出街"醒"我，睇下我有咩改善既地方同提點我（平時練車要呀sir跟埋出車係另外book同收錢架!）、有時一個鍾玩完，冇咩人book車又叫我休息下再楂下（唔洗比錢個隻!）、我每次練完車佢地會幫我keep住個頭盔係佢地房ｄ櫃，唔洗我拎黎拎去．．．呢ｄ咪款待囉，鬼叫我靚女，冇辦法啦！
繼續講返個路路通先，當時我係同jimmy一齊報名學架，因為佢要教書關係，四月個考期要改，我就自己考先，到五月佢又係一take過考到，又報左路路通！當然考到後股氣好高架，之後個幾個月仲開始睇車添，諗住會買車，而個路路通就諗住買左車後先用，到時當熟習路面練車之用！點知後來．．．媽咪唔想，太陽哥哥又唔比，冬天又咁鬼凍．．．拖下拖下，個路路通都就快到期！打比呀sir，佢竟然話可以幫我入電腦同我extend一年，嘩，真係好！
路路通於是就由2007年4月改到2008年4月先到期喇，2008年4月．．．咪即係今個月？yes！exactly！咁就過左一年，jimmy已經買左車，而我就已經放棄左買車既念頭 lu；但冇理由晒左成千蚊，所以兩星期前打比呀sir約左下星期上堂，呀sir好勁好好記性呀，一入身份證後就記得我係基雲絲！哈哈！而我個牌因為仲係P牌兼已經過左成年，仲未轉返做正式牌，咁係唔可以楂車架；而前日下午橫掂請左假探樂樂，就先去運輸署攪手續喇！
登、登、登、登．．．攪掂啦！考到牌後其實都冇再楂過電單車，但竟然唔洗經歷掛住個Ｐ牌仔楂車！雖然係咁，但我都好擔心下星期上堂架，咁耐冇楂，我真係好驚呀！不過有jimmy陪我一齊上堂，又有兩個呀sir係度，而mavis亦同我地一齊出車，到時五架電單車，型呀！咁多人"磅"住我，應該冇事掛～～
望住個車牌，又諗返好多回憶！考電單車時我仲未開始寫blog，所以從來都冇分享過到記低當時的心路歷程，想係度寫返少少先！
想考電單車牌當然係因為蔡少芬陀槍師姐啦，我覺得紮住馬尾戴住頭盔既女騎士好型呀！型得黎又冇棍波車個種狂野，我覺得綿羊好得意同柔弱少少，比較吸引我多ｄ！
而我學野鍾意搵人一齊學，一路都搵唔到朋友，直至有次無意跟jimmy傾計先知佢又想學，就即刻同佢一齊報名啦，我當時仲笑佢比佢ｄ學生女fans知道，實呷我醋啦！
有朋友一齊學真係好開心，jimmy係我好好的buddy，我地一齊由初步學起，由唔識變到識，一齊放工就去上堂，當然係佢車埋我去啦，一齊學楂8字，一齊跌車，一齊起返身，一齊勉勵，一齊交換心得，最終一齊考試，一齊pass！我地兩個都好叻架，強制試同路試都係一次過pass！互相見證住大家的成功，個種感覺真係好興奮好難形容！
考牌後我真係超勁爆開心，可能諗到終於可以好似蔡少芬咁楂到綿羊仔啦；考完個排，為左紀念自己考牌成功，我花左幾晚，幫自己整左個考車特輯，成兩年前了，呢個movie當時都send過比一ｄ朋友既，但我相信有好多新朋友未睇過，我都係呢兩日先諗起再重溫過，睇到好感動甚至眼濕濕呢，我冇誇大架，可能學車時個幾個月自己真係好比心機去學，所以考到後真係好開心好開心！就好似您地考試拎到一百分一樣囉！哈哈！
睇過或未睇過既朋友都好，大家再睇下啦，我花左好多心血去整架，亦可感受下我考車成功的那份喜悅！記得開speaker，配埋音樂好睇好多的！
沒有留言:
張貼留言