今日係我第一日返PART TIME呀，自從做左中大呢份正職後，由於人工都唔錯，我印象中都未返過PART TIME，PART TIME對我黎講，頂多係以前讀書時做過補習老師同返麥記暑假工！
所以今日對我都幾特別，有種多年來收左山，今日要重出江湖的感覺，哈哈！尋晚仲訓唔著呢，不過今日公司好忙，我都分唔到心去諗，好快就放工了！
去到我係新同事，感覺幾特別，咁多年黎係中大，我都係舊同事，睇住ｄ新同事入黎；今日到我被人帶住咁向人介紹，仲要環繞office一周，身份好似對調左咁！
第一日返工，有兩批信要急寄，我就係咁入信，由於企係度摺比力先有條痕，我好少坐，攪到條腰骨同腳骨都好攰呢！一有時間就學野，同事忙緊唔得閒理我，我就又繼續入，時間過得好快！最後學埋數，同close office，呢兩part都幾好玩！暫時我睇到最難係接電話同報名，因我對ｄ課程仲未好熟，接電話我仲聽到有日本人打黎問野，跟住同事會駁去比日本顧問，但我連officeｄ日本顧問既日本名我都未識讀呀，咩咩sen咩咩sen咁．．．至於ｄ課程，呢度真係幾十種，報讀都冇咩大問題，我覺得報個個持續進修先複雜，好多rules，又要check好多野．．．不過我會努力，唔會丟elsa面既，但真係要ｄ時間！
忙碌的第一日好快過，下個星期仲要返三晚咁多呢！夜晚十點半就放工，miss左幾個call，因為都唔敢聽電話；落到樓下，太陽哥哥已經企係希慎道等緊我喇！忙完一晚見到佢黎左接我，真係覺得好溫暖呢！佢仲即刻帶我去食野，我個肚餓到古古聲啦！
我地去左食越南菜，呢間野好出名，由景隆街地舖做到謝斐道樓上舖；成十一點仲有好多人光顧呢！
咖啡好特別，唔係沖粉的，係自己磨既；個器皿幾特別，上面會流落下面，入面仲溝左鍊奶，攪掂就再倒落冰杯度變成凍咖啡！
叫左兩餸一飯，非常滿足呢！
