今朝起身後係屋企休息，到大概下午茶時間，太陽哥哥黎接我，今日媽咪要睇醫生，佢都攞左假陪我地；睇醫生前先醫肚，我地去左美麗華""客家好棧"飲左個超抵既下午茶，三個人食到好飽先係八十幾蚊咋，真係超勁爆抵食！
跟住係旺角陪媽咪睇醫生，由四點攪到六點半先完，我nds都玩到冇晒電了，太陽哥哥就係診所訓著左；但媽咪一出黎，精神晒啦，因為佢塊面紅到裂開咁滯，仲見佢眼泛淚光，實係好痛頂啦，我見佢咁痛都好心up，貪靚的代價真係大呀！
之後媽咪返屋企休息，我同太陽哥哥就二人時間，去左睇"我的父親母親"，我由月頭就開始期待架啦；不過睇完覺得麻麻地，可能諗住會睇到好激動，但又無，反而好似拖得好長咁，有ｄ悶；但一兩個流眼淚位點都少不免，就好似poster主角拖住媽咪過馬路呢幕，佢話自細個長大後十幾廿年都冇拖過媽咪隻手了，而呢次拖，係同媽咪去醫院的途中，仲係要知道媽咪會係醫院渡過人生最後既階段喎．．．即係拖媽咪去死咁．．．好在我咁大個女，出街間唔中都會拖住媽咪的手；但對男仔，相信真係極少，甚至冇，我諗您地要做下啦！另外一幕係主角媽咪知道自己會死，預備左一個盒，叫主角等佢死左先好拆；睇到一個媽咪為自己的死，一方面好唔捨得自己個仔，但另一方面又好平常心咁去面對死亡．．．見到主角讀媽咪留比佢既信同記事簿時，好感動呀．．．
睇完戲又去左老地方食上海野！
沒有留言:
張貼留言