今日要去大鵬灣拜山，早前應承媽咪要求，七點半要係樓下餐廳等，所以就算尋晚去了沙田訓，明明直接去上水會係最方便，都選擇了清晨五點起身，讓太陽哥哥車我回青衣，等可以陪媽咪一齊搭巴士去上水！
返到屋企洗左機衫，斷斷續續只係訓多15分鐘；七點半準時去到樓下餐廳，七點八收到威哥電話，佢同媽咪訓過籠，剛起身，食唔切早餐，係巴士站等喎．．．
係上水會合埋姑丈姑媽表姐，上到深圳有私家車接我地直去大鵬灣，爽！
車程個多小時～～
信教關係，只預備鮮花已足夠。
呢度背山面海，風景確唔錯！
呢ｄ工人真係好．．．都唔知點講，一有人黎掃墓就即刻跟晒過黎，由路口跟到您去墓前，再係您面前做晒戲，咪就係為攞錢．．．
公公婆婆之墓，ｄ花好靚呀！
拜完山後又坐返個幾鍾車程，去福田區的『金悅軒』飲茶，呢間酒樓係大酒店入面，所以好乾淨，服務都好好，野食又好味！
望出去好似同去左萬豪差唔多咁！
今次拜山有表姐一家一齊，感覺溫馨同開心好多，好似去旅行咁，希望以後年年都到一齊去就好喇！
之後坐的士去深圳灣過關，再坐巴士出旺角，表姐第一次搭呢ｄ旅遊巴呢！
到旺角陪細妹行左陣朗豪坊，跟住我過中環睇醫生拎藥膏，再坐火車去灣仔接太陽哥哥放工；見面後第一件事係太陽哥哥帶我食提左好耐的『13座牛雜』，多謝佢咁有心記得呀！其實我聽人講係大坑個間架，我唔知呢度有，亦唔知有冇分別，不過都真係好好味呢！
再搭叮叮去銅鑼灣行街，遇上免費派發新出的 zero coca-cola，我地都拎左罐解渴呢！
跟住搭地鐵去旺角，先食壽司後睇戲！
太陽哥哥尋晚己買定飛啦，好期待劉若英新戲『隱婚男女』：
隱婚男女好好睇，拍得住單身男女，雖然後者多點笑料；而呢套有攪笑的哈林大哥，Eason演老實老公亦演得很出色；除劉若英外，演Eason老婆的女仔亦好靚女，太陽哥哥仲笑說呢套戲的大陸女演員靚過早前華仔的我知女人心入面的很多很多呢！
講返內容，其實夫妻間的誤會，往往因唔坦誠出事，所以真係值得反省；而戲入面Eason老婆其實都很講理丫，知道老公有必要隱婚後亦好合作，仲主動幫老公除下婚戒，其實這老婆很體貼呢！最衰係有個教壞人的損友，教壞晒．．．所以呢，女仔唔開心時，最好搵返ｄ有正能量既朋友傾訴好ｄ！睇完呢套戲後，我覺得明白男人多左，但又好矛盾；我明白Eason工作的身不由己，但到擺明同女上司有曖昧時，始終．．．冇貓唔食魚！作為女人，應該絕對信任老公，還是任由老公去接觸曖昧和分不出底線呢？其實，女人只要百分百的安全感和坦誠，只要盡責的老公平時已滿足到老婆呢方面，相信老婆就唔會亂諗了！當然，男人最怕女人cher同煩，愛問野問到篤，所以有時都選擇了逃避或美麗的謊言；我都有呢個毛病，所以都努力改善中，因為有得揀，還是冇壓力的坦誠相處比較正面！
睇完戲返青衣再戰戲棚，又食呀！
今日北上大鵬灣拜山外，又去埋旺角、中環、灣仔、銅鑼灣、青衣，又係另一個好犀利的一天！
沒有留言:
張貼留言