因為準媽媽預產期係九月中，深怕會搭正我的結婚週年旅行唔能夠去醫院探佢，就約左佢今日見下面相聚一下！
下午請了假，一到 lunch time 就即刻收工約好準媽媽；先去『ME.N.U』食 lunch，OK喎，酥皮湯＋意粉＋新鮮西瓜汁，只係$3X咋，又好味又抵食！
食完野就上準媽媽屋企，幾年冇見FeiFei 同 MoeMoe 啦！我一向鍾意 MoeMoe 多ｄ既，一來係我契仔，二來鍾意佢係灰色摺耳，但佢一向好內歛，成日唔願出黎見人架；反而 FeiFei 勁活躍，同 MoeMoe 完全相反，我一去到咋，佢就圍住我係咁行，行左無數個圈，仲係貼住我咁行架，又會用條尾"hi"落我度；準媽媽話佢係度霸地盤，要所有新野入屋都佔有佢既氣味！
FeiFei 係我見過最外向既貓，因為佢成日攪事，又做埋ｄ小動作，因為我地兩個係咁傾計，佢要人理呀，要 draw 我地 attention，就成日跳黎跳去，最攪笑係．．．推野落地！邊有貓咁架，我覺得佢根本係隻狗黎架！
邊有貓咁飲水架？先用手掂ｄ水，再"lam"返自己隻手，咁樣飲水既？！
FeiFei 係一隻好鍾意親近人既貓，佢最鍾意同人玩，最好我地就唔好傾計同佢玩，佢就最開心；佢仲成日聞我同錫我呢，所以我同佢影左好多相呀！今日同佢玩完，攪到我覺得貓得意過狗添呀，一來貓無味，好乾淨，佢地識清潔自己，ｄ毛又順又滑又軟熟
；唔似ｄ狗有陣味，有時下身ｄ毛仲會因為濕左而黐埋一齊既
！
FeiFei 成日攤係我身邊撩我玩，我點攪佢都唔走開，真係好可愛！
MoeMoe 一直係書房，試過一兩次郁動，都係企係房門口咋，呢ｄ先係貓麻！
唯一的兩貓合照相：
不過我都抱下 MoeMoe 同佢影相，我真係好鍾意佢灰色既毛色架，佢個樣有ｄ似貓頭鷹呀！如果我買一隻貓，好想有 MoeMoe 的毛色＋FeiFei 的性格！
影下準媽媽個大肚先，仲有兩個禮拜ＢＢ就出世啦，真係要影多ｄ相留念呀！
FeiFei 攰得滯訓著左，邊有貓咁訓覺架，哈哈！
我地由下午傾到入黑，真係好多野傾；諗住六點三走，點知傾下又過左時，又推遲返半個鐘，半個鐘又再半個鐘，最後攪到七點三先捨得走；好在趕得切去大圍搭尾班放工巴士直達青衣(半個鐘一班)，八點三就返到屋企食飯啦！
今日真係好開心呀，多謝準媽媽成個下晝都冇休息咁陪左我一日；下次見您ＢＢ都應該出左世啦；呢幾日要多ｄ休息，最後衝刺，到時生時要加油呀，去完旅行返黎再探您！
沒有留言:
張貼留言