.gif)
今日同太陽哥哥去睇結婚戒指，上次明明都睇中兩三款，今日竟然一款都睇唔岩，開始有點擔心．．．之後去睇傢俬，睇下客廳電視櫃、書櫃、櫈，但我地實在太多野未做同決定到，都係齋睇先，因為想油好油先添置ｄ大舊野，唔係到時油油，搬黎搬去棧攪！不過當我一諗起如果全屋油油／貼牆紙時，要將ｄ床、梳化、櫃、總之所有一件野移走，咁大工程，諗起就驚同唔想攪．．．不過太陽哥哥話呢ｄ等佢攪喎，叫我唔洗擔心，佢會安排一個筍post我做，就係指揮喇，同埋幫佢記得邊ｄ野放係邊度咁就得，係就真係幾正喎！不過到真係落實攪先再諗啦～～
跟住我地由旺角行去油麻地，去左百老匯電影中心換飛；之後再行去佐敦，諗住食澳洲牛奶公司，因為我未食過，又知好出名，所以想帶太陽哥哥食好野！哈哈～～
由旺角行到去佐敦，都好熱呢～～
義順我就食過幾次，澳洲牛奶公司就第一次試，呢度感覺係好舊式同地道既裝潢！
店裡幾乎每位客人都食常餐，我地都唔例外，一人一客！奶茶好好味，好有冰鎮feel；個厚多士唔洗多講，又係好正，唔怪之呢度咁出名！我仲同太陽哥哥講，邊度有人晚餐會食呢ｄ常餐，通常食晏或者下午茶先食架麻，呢度咁多人個個都食，肯定好好味先會咁，一定有信心保證！
飯後甜品：牛奶燉蛋，勁好味呀，我講左好多好多次好味，太陽哥哥話我有冇咁誇呀？點知佢食完都話好好味喎！真係好好味架，信我啦，我唔鍾意飲牛奶既人，都覺得好好味，又滑又軟，真係正到爆炸呀！
去百老匯電影中心時途經廟街個頭，呢度有檔好出名的牛什檔，成日排長籠架；太陽哥哥帶我食過幾次，一路都唔記得介紹比大家，今日終於記得影相，係鴉打街；原來威哥都知呢檔野，亦係話好好味呢！
太陽哥哥一路話想買個小型白板，放係廳寫下message或者記低重要事情，今日終於買到啦！
沒有留言:
張貼留言