六月成個月都冇紅假，等於七月，終於等到啦，不過得一日咁大把，跟住仲要係八九月兩個月都冇架，悲慘～～
好在今日係遊行日，太陽哥哥本應有工開都揀唔開，費事又塞車又冇生意做，唔係就陪唔到我喇！難得同太陽哥哥都有假期，要好好利用；朝早先陪太陽媽媽食早餐，自從太陽哥哥開始楂車後，都好少機會陪太陽媽媽食早餐了！跟住就call左車，搬左ｄ野去青衣，最有意義梗係張床褥啦，宜家另一間房都有床有床褥，可以招呼賓客喇！Yeah！
值得一提係呢轉車只係收八十蚊連隧道費，我同太陽哥哥講，咪仲平過的士？咁平時係沙田夜左返黎，唔想坐巴士咁長途，坐的士又要過百蚊好肉赤，咁call呢ｄ車咪好good囉！架車又新淨，唔似得雞記個ｄ咁殘，齋車人冇貨，唔知會唔會平ｄ添呢？係就更加正囉！
一路執野至大概五點，休同程泳就黎到，我地約左今日打牌呀！天氣酷熱，出街死硬，係屋企開住冷氣打牌，的確係一個好活動！
我地冇摺檯，就將張麻雀版放上個三格櫃桶度打，真爛賭！哈哈～～不過我地打得好細架咋，只係一蚊番，最大都係八蚊舖！打得大我會打到手心標汗架，呢種旨在聯誼不在賭的精神，岩晒我！我鍾意嘻嘻哈哈，同朋友傾下計食下野既氣氛，比起打大牌個種侷促感加嚴肅氣氛多多聲！
打完四圈已經九點，原來打一圈要一個鐘，哈哈！晚飯去左樓下冬菇亭德記，四個人三個餸實夠，不過又為食後加個蠔餅，加埋蠔仔粥，結果真係食唔晒！另外叫左兩個白飯，例湯送既，埋單$204，都算經濟實惠啦！
其實我唔多想出鏡，因為個放假look頭真係唔多掂，睇黎又要比Elsa笑啦！嘻嘻～～
我叫休勁開心咁笑，佢就擺出個咁既表情．．．咁就係勁開心？見仁見智啦！哈哈～～
程泳話期待下一次，當然冇問題，隨時歡迎！反正我經常都冇野做，悶悶地有人黎陪我仲好呀！
沒有留言:
張貼留言