提提大家，今年我的聖誕咭大project已經完成，今日已全部寄出！大家估下我今年一共寫左幾多張聖誕咭？答案係．．．接近九十張呀！
我趕左五日五夜，終於完成左呢個一年一度的大project！我將所有寫好的咭叠埋影左張相，因為冇一個地方可以平放晒所有咭，下面張相其實已經放左好多層架啦；我冇吹水架，張張親手寫架，最重要係每張都有內容架，有內容意思係唔同既人有唔同既說話，並唔係求其兩句 "祝聖誕快樂新年進步" 呢ｄ咁行貨架！冇錯，我係幾自豪架，哈哈！
叠埋晒有咁厚架：
今年應該係過往十幾廿年中寫比最多朋友既一年，因為今年我加埋比公司的同事，以前冇架，我以前覺得朝見口晚見面唔洗啦，但今年覺得，我呢個多年習慣的目的，其實都係想身邊的朋友可以感受到我對佢地真誠的祝福，因為係宜家呢個電子年代，我夠膽講已經好少人會提起筆寫咭送比朋友，所以決定比埋日日見到的同事們！雖然對某ｄ人黎講可能覺得我唔環保，但呢個習慣我仍然好想堅持住，慶幸今年都仲能夠做到！
呢叠係本地郵寄既，海外個ｄ一早寄左，見到面個ｄ朋友仔同同事們當然會親手交比佢地啦！
人地話結婚印帖派帖好煩，我覺得寫聖誕咭要付上的時間同心機比起結婚派帖仲要多好多！因為帖已印好，入面一隻字都唔洗寫，而聖誕咭少少地點都會寫上半版紙！完成左今年的創舉，的確好開心！
各住朋友仔：開定信箱等收信啦，希望您地會感受到我的心意同鍾意張聖誕咭啦！
沒有留言:
張貼留言