2007-04-27 Lunch@小白鷺 & Bu Bu 車驚喜

早於上星期已約左好姊妹好兄弟今日食午飯，點知有位舊朋友知道後自薦要一齊食，佢就係我個舊老闆嘞！同佢食，預左唔洗比錢，就係咁，我身份勁尷尬，好似痴餐咁．．．不過唔通唔去咩，咪仲衰！佢帶左我地去環境清幽既小白鷺食，都幾唔錯架！

大概四點半，BEN就將佢架車楂左入中大交比我，因為佢唔方便泊返天水圍，叫我幫佢keep到聽晚，我梗係極度願意冇問題啦！哈哈！尋晚仲諗定點樣運用呢個千載難逢既機會，就係接太陽哥哥放工，比個驚喜佢喇！不過呢個係一個幾高既挑戰，一來我已好耐冇楂車，二來次次楂都有人旁住，好少自己楂，三來今次的目的地係．．．鰂魚涌！尋晚已開始"咪"地圖，因為我係一個冇方向感兼極度驚青的女司機，今次仲係孤身上路，真係要做好準備！

大概七點半，就係青衣出發啦，我既路線係：

青衣 -> 三號幹線 -> 油麻地 -> 紅隧 -> 靠左挨左線往北角方向 -> 上東區走廊 -> 鰂魚涌

最大壓力當然係紅隧出入口同cut線上東區走廊呢幾個位啦！好彩紅隧口唔係好塞，但過左收費處後都係入唔到隧道左線，因為太多大車；到出紅隧時，好緊張攞唔切線，但好彩，唔係太難就挨到最左線，哈哈！出返露天世界時，順住線往北角方向，跟住要挨右一條線上東區走廊，但隔離線ｄ車好快，我根本cut唔到，架車挨左三分一過右線時，仲比架快車bu我呀！眼見快到雙白線位，車速亦越來越慢，心情勁緊張，最後係貼近雙白線前終於切線成勁，舒一啖氣！上左東區走廊後，簡直係另一個世界，好靜，ｄ車唔密，好好楂，好容易就去到終點！

因為紅隧冇塞車，比預期早左二十分鐘到，就打比太陽哥哥試探下佢走得未，之前其實我係吹水話ELSA有野比我，麻煩佢係公司樓下等一等ELSA，佢梗係信以為真啦！同佢講ELSA早到左後，佢話約十五分鐘落到黎，我就一路望住後鏡一路等，係呢個時候，我岩岩有電話，冇咁為意，其實講左五分鐘倒，太陽哥哥行過左我身邊兼拎個頭望到我！佢一下愕然，我地大家都大笑左出黎，我就即刻收線啦，雖然呢下驚喜未100%做得好好，但佢都好開心，話估唔到我咁遠都夠膽同識楂過黎，好叻女，佢好開心呢，我都好開心呀！

跟住我地去左天后食贊師傅喇唦，好好味，上次食已經係五個月前！（個喇唦我食左一半先記得影相！）

晚飯後太陽哥哥帶左我去佢十幾年前學斜路泊位個小山頂，真係有學神係度學緊泊位呀，我地又係個框度輸住試，不過我ｄ技術已經忘記晒，一係出晒框，一係撞晒膊，總之肥晒佬！哈哈！跟住落車睇左陣維港風景，我仲笑太陽哥哥帶我黎ｄ咁既地方，好似係度溝緊我咁呀！好可惜．．．我地根本係情侶黎啦，哈哈！

今晚好開心，好有滿足感，但有少少後悔唔記得影低ｄ相留念呀！好似係每個spot，比如出車前，紅隧等車，到逹後等等．．．唔係個blog一定更加生動呢！