2011-08-31 (Wed) 萬寧換購康寧餐具

萬寧呢期換康寧廚具，七月時一見到就即刻影低相，叫媽咪幫手拎印花！因為真係好靚，呢套仲係貴ｄ的粉紅花花，之前係青衣城做康寧promote時，頂多都係藍色花花最特價！

呢幾日媽咪就拎左一共七份印花返黎啦，我地三個屋企，主要都係換飯碗／碟／大兜；不過碟暫時換完，要買卷先等貨～～

原來有保養書，勁！

個花真係好靚！受媽咪影響，細個屋企已用康寧用到大，所以我都好鍾意屋企用康寧；雖然少煮飯，但都諗住儲住先，因為又抵又靚麻！太陽哥哥成日問我：買咁多碗碟做咩？我都唔知呀，靚就想買，師奶丫麻！哈哈～～

2011-08-30 (Tue) 聖安娜靚靚芝麻街保溫杯

今日收到細妹通知，聖安娜送芝麻街的產品，已由環保袋轉左做保溫杯！下．．．我星期六先仲換緊環保袋，相信應該係最後架啦！

今次的保溫杯仲靚添呀，激死～～我又好想要呀，朋友們幫幫手呀！

2011-08-29 (Mon) 用不完的護膚品samples

每星期總會收到透過信用咭寄來的護膚品推廣，以前我總會立即丟進垃圾桶；但變左師奶後，總會留起放入手袋，因為實在好容易會經過 CWB SOGO / 朗豪坊西武；就係咁，屋企儲埋好多護膚品samples，有ｄ仲係成部 iPhone 咁高，並唔係細細支架，真係用極都用唔晒，用完又有新，哈哈！朋友們如果對邊款有興趣，我又未開黎用的話，不妨同我講！

呢兩支係香水，唔好諗邪野～～

2011-08-28 (Sun) 韓國街．Dinner@秀韓國美食坊

係美麗華玩完飄浮相，去行下韓國街，順道第一次揀間韓國餐廳食飯；上左開飯度睇左三間，最後揀左『秀韓國美食坊』；黎到門口已有幾個人等緊，間餐廳一眼望晒咁大，大約等左廿分鐘就有位啦！

跟開飯叫左三個好 hit 既餸：

免費前菜：

泡菜餃子好味呀！但都幾貴，$69 (8pcs) / $42 (4pcs)～～開頭怕唔好味所以只叫四隻，覺得好味後想叫多四隻，但佢話要收 $42x2，唔可以 $69 喎，咁就唔要啦！

芝士雞蛋卷～～入面有芝士漏出黎，賣相吸引，但食落好普通，冇咩特別．．．

年糕炆牛肋骨算係鎮店之寶，又係幾貴的一道菜，叫左兩舊已經要百五元；上菜時，侍應會用較剪分件及去骨；牛肋骨同蘿蔔都好入味，反而年糕一ｄ都唔好味，成道菜亦略甜；其實好似媽咪整的炆牛腩，我覺得媽咪整得仲好味啫！

今日都帶埋太陽媽媽一齊試新野！

跟住行去佐敦義順食甜品：

返兜韓國街的即沖粟米湯，好好味架！

2011-08-28 (Sun) 飄浮/跳躍相@美麗華商場．Levitation(飄浮相)始祖

今日細妹帶我去玩影飄浮相，但我地功力有限，最後只影到半飄浮/跳躍相；雖然係咁，但真係玩得好開心＋笑到肚痛！太陽哥哥遲左放工，只參與到最後幾張，但佢真係好有天份，笑到我同細妹趴晒地！哈哈～～

跳到好攰，影下景休息下先～～睇完來佬，我又想要架綿羊呀！

每個景點都有教點影，但我地跟跟下都冇再跟，求其影到似就算；因為好麻煩，set得黎都天光，加上要影相，都要主動見人影完就要行過去架！

太陽哥哥黎啦，即刻叫佢做model，我地係咁指導佢，佢又掂喎，只需跳一兩下就攪掂喎！笑到我同細妹趴晒地＋忍唔住要拍掌！哈哈～～頭兩張我地最鍾意：

Thanks 細妹帶我黎玩得咁開心！

細妹話呢個就飄浮始祖，佢ｄ相真係影得好堅：http://www.yowayowacamera.com/