Monique 早前介紹左一個關於婚姻既講座比我，佢會去聽，我睇過內容都好正面，學多ｄ野都不錯，就問下太陽哥哥有冇興趣去；佢一向對宗教活動好抗拒架，我都抱住搏一搏既心態問佢，當然之前都有努力祈禱啦；點知佢第一句就答：好呀！令到我好開心呢～～
報左名成個月，今日終於到啦，我都好期待，因為自己第一次聽一ｄ講婚姻既講座；開頭以為係公公婆婆係度玩ｄ社區中心，點知唔係，呢度好grand好大個禮堂，仲全場爆滿！
今日好驚險呢，太陽哥哥呢幾日都唔洗點ＯＴ，但好黑仔地今朝收到好多jobs，佢十點幾就同我講定，好大機會要做到夜晚十一點，未必去到講座；去唔到講座我的確會失望，但工作都重要呀，所以都冇辦法，只能叫佢盡力啦；不過我宜家學緊交託及盼望，所以我全日一得閒就祈禱，希望奇蹟發生，一句都冇打擾太陽哥哥，只係默默交託；點知到五點幾，太陽哥哥話佢應該可以最快八點走；個講座1930-2130，其實佢八點走黎到都九點，只係參與到半個鐘；但我個刻都已經好開心，黎到好過冇到，比起之前黎唔到已經有賺，同埋我知佢已盡全力；我地七點幾先去，講座七點半準時開始，只係開始左半個鐘，太陽哥哥突然出現！嘩，早咁多既，佢話七點多就走得啦，我個刻真係好好好開心，我覺得老公好好，我知佢為左黎，日頭一定趕到好搏命！同埋我好感恩，交託及盼望係work架，個心平安好多，又唔會比到人壓力！比著以前既我，一定會忍唔住會問／催太陽哥哥工作成點呀？點解呢樣個樣等等～～
今晚主要係兩對結婚5年及25年的夫婦分享佢地的心路歷程，由新婚的不協調，去到互相體諒的磨合等；當中的例子及分享，有ｄ都好攪笑；原來每對夫婦係生活習慣上都一定有唔同，因為成長環境及文化背景唔同；但只要用正面的方法去處理，就唔會有問題。佢地亦殘酷地指出，結婚後雙方一定變左樣，同拍拖時的個個人係唔同架，呢樣野一定要接受；因為生活瑣事及奔波會磨蝕感情，所以提醒我地記得定時將感情打返collagen or 排毒！
今晚時間關係，唔可以講學左好多，但當中都有得著；好似期望的落差、冇人係完美、唔好擺心事過夜、不受時下社會風氣影響要堅定婚姻的信念、溝而不通都好，都要溝通溝通再溝通、艱苦環境下都要支持對方、婚姻要keep住的三心兩意(細心愛心關心＋情意愛意)、唔好focus on 問題 but think about the good momentsssssss．．．等等；think about the good moments 呢樣野好正，佢叫我地諗返結婚講我願意時，望住對方個剎那．．．仲記唔記得係點樣？全場靜左幾秒，大家都靜靜地諗返呢個moment，我自己個心都即刻諗到，我仲望下太陽哥哥，問佢記唔記得，佢都點頭；唔知呢，呢刻我覺得好感動！
呢兩句佢地教架：
True love is not loving a perfect person, but is loving an imperfect person perfectly.
I love you more than yesterday, but love you less than tomorrow.
為左再學多ｄ，我地報左下個月攪的三堂課堂添呢！
沒有留言:
張貼留言