2011-05-02 (Mon) 太陽家朋友飲茶．關雲長．Cooking@Home：牛扒/羊扒西餐

今日係五一公眾假，亦係太陽哥哥真正的休息日，好開心呀！一早已約定返沙田同太陽爸媽飲茶，去到先知仲有太陽家的朋友，佢地仲有個BB女呢！

太陽家朋友一家～～我地呢餐茶飲左兩個幾鐘，食左幾轉，超飽呀！

跟住返太陽家休息，訓左個晏覺，因為尋晚太夜訓，今朝又太早起身啦！四點出旺角，睇早幾日買定飛的關雲長。

我覺得呢戲好麻麻咋，又多野講，又有點無聊；曹操同關公一時一齊，一時又分開，跟住又一齊；曹操話生放關公，但皇上又背地裡唔放，同一黨人係度攪黎攪去！唯一深印象係丹爺幾場打戲入面，有場係一個圓氹氹兼好窄既路同對手對打，由放條路好窄，佢支關公棍唔夠長，比堵牆頂住左，呢幕好緊張刺激！

 

睇完戲都仲未肚餓，就決定買野食返屋企整；但朗豪坊得間Market Place超級市場，貴ｄ都冇辦法啦；最慘係新鮮牛扒冇晒，唯有買雪藏，係個姐姐介紹架，佢話唔會差新鮮好多喎；好在太陽哥哥食的羊扒有新鮮啫；另外買埋粟米＋磨菇做伴菜！

仲有麵包，細個兩個係我聽日早餐＋PT 晚餐，大個包係今晚送湯既，太陽哥哥好有要求架，要烘架！嘻嘻～～

埋單真係有ｄ貴，去扒王食都得，不過親手煎下牛扒撐下檯腳麻！

我先醃牛扒，整左黑椒同孜然兩隻味；羊扒唔洗醃，現成已醃好。

太陽哥哥負責煮湯同烘麵包，用韓國街買的湯包，食埋呢包用晒啦，有機會再去買先得！

今次跟細妹推介，用牛油煎香ｄ喎～～

攪掂～～

四天復活假好快就過左啦，呢幾日真係好開心呀！