唔好意思都要講句，我又要清假啦，所以今日放假一天；其次踏入下個月，我仲會有一年三十日既大假啦！係咪好值得去慶祝呢？嘻嘻~~
近排身體差左好多，唔認老都唔得，病極都唔斷尾，最辛苦係放工要返part-time的時候，返到屋企沖完涼都十二點了，嚴重缺乏休息時間，見到自己個樣又殘又攰，望到都唔順眼，所以今日休息，除左可以訓晏少少外，算係補充返少少睡眠時間啦，仲要係去電髮，整個新髮型，踢走殘樣！
今次去左太陽哥哥的哥哥的朋友Debbie間髮型屋度試，想轉個髮型師，因為舊個位整左幾年，好似越來越求其咁，但點解唔試太陽哥哥的哥哥呢？咁係因為Debbie係女髮型師，我反而想試下女仔，一來女仔細心ｄ，二來女仔同女仔好傾ｄ麻，多得太陽媽媽幫我打電話去單聲，咁Debbie就會特別照顧我啦！
呢個就係我既新髮型啦，我自己就幾滿意，係ｄ前陰略短，不過都唔緊要啦，過多排長返順眼返就冇事，反而太長要好快又返去剪過，仲晒錢，哈哈！不過由長陰剪短陰，都幾大掙扎架，我的方方面型其實應該要留長陰既，咁潑開一邊時，塊面望上去就冇咁大麻，留短陰遮住額頭反而會大ｄ，冇錯，呢個係正常諗法；但唔知點解，我總覺得自己塊面留長陰再潑開一邊，反而成個方面突顯晒出黎咁，所以，雖然Debbie建議我 keep 返長陰，我都係揀左剪，因為我又太懶啦，您叫我dup低頭做野時，ｄ頭髮Ｑ又唔係，夾又唔係，我會發癲架，咁剪短唔洗再"嬲"住對眼仲方便！不過，都有少少後悔冇聽Debbie建議架，因為又貪靚囉，心郁郁又諗唔知keep返長陰其實又係咩樣囉！唉．．．
整完頭髮心情極靚靚，其實今日都幾開心，因為太陽哥哥拎左假陪我，我地真係好耐都未試過由日頭拍拖到夜晚啦，平時weekend佢要楂車，楂完車雖然可以食飯行街，但都唔會耐既，一來時間唔夠，第二日又要開工，仲有係佢根本楂左成日車已經好攰，我最怕佢攰時同我去睇戲，佢實訓著架，所以今日係好開心呢！
我地先行citysuper買日本野飲，扮去下日本先，我好鐘意飲bikkle架，點知咁岩一田有北海道祭，好邪呀！
太陽哥哥排隊買酒煮蠔我食！
廿蚊三隻，即叫即煮，非常新鮮！
可惜太陽哥哥唔食蠔，得我自己一個食晒三隻！
食蠔過程：
三隻又肥又大既蠔就咁比我殲滅左啦！哈哈！
跟住見到個好colourful既登別地獄谷地藏尊添，好有親切感呀！埋去影返張相先，咁就好似去完一轉北海道咁啦！哈哈！
登別地藏尊真貌，一田呢隻真係cute好多喎，唉．．．好想去旅行呀！
跟住我地買牛扒返屋企煎黎食，同上次一樣，我負責調味，太陽哥哥負責煎，當然，開檯收檯洗碗都係佢啦，點解？因為我要追返星期一同星期二兩集珠光寶氣，然後再等睇今晚個集喎，時間咁緊迫，唯有所有野交比太陽哥哥啦！哈哈！
但冇我睇住，太陽哥哥今次好似煎得火喉過勁，燶左少少．．．上次靚ｄ喎(http://hk.myblog.yahoo.com/aquarius-givens/article?mid=8903)，繼續努力呀！
沒有留言:
張貼留言