今日係出院後第二次覆診，拆紗布後，腳趾腫的程度似乎一樣；醫生話傷口附近都係紅，但勉強都可以，唔使食藥住，除非嚴重過宜家啦；我自己就覺得腳趾公的彎度好轉左，滿意過上一次！
上星期五(五天前)：
今日： 
但醫生話我腳趾下面個位有ｄ黑，佢就問我以前係咪好少做運動，我話係呀，佢話黑係因為ｄ血管有ｄ萎縮，就要我提早開始郁動下ｄ肌肉，唔好等拆針先，唔係驚過多幾日越來越嚴重。
佢教我係屋企唔好用拐杖行，我就話其實我冇啦，甚至連隻特別鞋都少著左好多，除非要出街；因為隻鞋好高，我行時好辛苦，好似長短腳咁，每行一步，都要成隻腳提起先行到下一步，"咬"晒腰咁，樣衰不特止，仲攪到我個盆骨位都好攰。咁既然已經開始用腳行，點解ｄ血管都唔夠郁動而咁黑呢？
傾吓傾吓先知，原來我平時係屋企行時，因為驚整到傷口同影響骨的癒合，就避開左邊掂地，用晒右邊的力，成隻腳係"挨"晒右邊咁行，左邊一ｄ都冇掂到地；但原來咁行係唔岩，醫生話，我要成隻腳掌平放落地，但唔好曲起腳趾部份，要平住咁放，再平住咁成隻腳掌提起，再行下一步，只要冇曲到腳趾，就唔會影響到骨的癒合架啦！
但可能我已經慣左，行比醫生睇時，都係唔可以每一步都平放，同埋平放時，始終左邊腳掌個傷口位有ｄ痛．．．醫生仲話見我連小腿未放落地都已經慣咗傾咗向右先，叫我要比心機，及早矯正返個行路姿勢，唔係就唔可以跟schedule拆針。我真係要加油喇！
至於個盆骨位好攰的問題，醫生話可能隻特別鞋太高，就幫我換了一隻平低的，所以，我今日有新鞋仔著呀！！！
醫生係即刻call另一位醫生上黎幫我睇腳形同開個窿係隻鞋度架，仲係男醫生黎添，佢幫我攪掂後，仲話：呢隻鞋型仔好多喎！我就話：兩隻都好樣衰呀！
但醫生叮囑我，呢隻鞋係平低，唔會好似之前個隻咁，會迫住我用唔到前面ｄ力同唔會曲到ｄ腳趾，所以我要靠自己，千祈唔好曲到ｄ腳趾！
今日仲有個大環節，就係拆線呀！我都係即時先知，因為醫生話手術後兩星期就可以拆，一個結代表一針，原來我都係縫左八針咋！掛住影相，唔記得拎返ｄ結返屋企，放係個樽仔度留念．．．到記得時，已經比姑娘清理左啦．．．唉．．．
拆線時都唔係唔痛架，姑娘係要挑起個結，先放到個較剪尖入去剪斷條線，所以扯起個結個吓，都好痛架．．．我仲係"挨"左頭六針，先有力拍低最後個兩針比大家睇架．．．嗚嗚~~~~嗚嗚~~~~ 
http://video.yahoo.com/video/play?vid=591491
拆線前後： 
醫生仲係話我洗傷口ug得唔夠入，我話我買的敷料包的棉花棒頭好大粒，好難捽入去呀，跟住個護就醒左幾包筍野我，叫我試下用呢ｄ會唔會好ｄ！真好人！
今日有兩張單，埋單一千及五百，共千五，好甘！我就問問，五百張單上面寫係診金定係隻新鞋？係寫診金，咁就好啦，診金應該claim足，寫左第二ｄ野就幣啦！嘩，個男醫生上黎，摸下我隻腳，咁就五舊！嘻嘻！
沒有留言:
張貼留言