丁媽媽: 2007-05-18 入院第一天

今日係太陽哥哥陪同下，晨咁早七點就到左威爾斯親王醫院check-in，我間房都幾靚，仲係窗口位呢！一入去已經放好了手術衫、毛巾等等，最攪笑係太陽哥哥拎起舊野同我講：您一陣要戴呢個頭套呀！我一打開，係條紙底褲黎架，哈哈！

醫生八點黎到同我做個briefing同簽同意書，佢仲係我做手術隻腳畫左個箭咀！好多朋友其實唔知我做咩手術，我就係做右腳腳趾公旁邊舊骨突左出黎個位，手術後舊骨唔會咁突，同腳趾公就唔會傾去右邊。太陽哥哥陪我到八點半就返工，跟住媽咪黎到接力。

手術時間真係好亂，尋日個護士打比我話大約八點半，跟住醫生又話十點半，之前會見醫生做briefing，又要見麻醉師，又要見物理治療師．．．最後我係病房等到十一點先輪到我呀！做手術前，好在媽咪係度陪我，臨走的一剎那，佢仲錫左我一啖，我覺得真係好似做戲咁呀，被人推推推，又入lift又出lift，過完一度門又一度，自己就一路望住天花板係咁郁。

成個手術好長呀，我三點先返回病房，足足四小時。點解咁耐？原來先去手術室個大office同麻醉師對資料，跟住就係度等，咁上下就又係過幾關推左入手術室，過床、除衫、貼ｄ唔知乜野係個身度、插鹽水針、消毒．．．手術開始時間係十二點半，大概一點四十分做完，之後縫針都半個鐘，係觀察室觀察一段時間先返上病房，第一個見到就係媽咪啦，去左成四個鐘，擔心死佢了！

我好肚餓呀，一返去手術袍都未除就食野，成個大背脊露左出黎都唔理，岩岩係Tea時間派餐，媽咪又買左愛心下午茶比我，好在我係半身麻醉咋，因為係觀察室ｄ人係咁嘔同神志不清，佢地就係全身麻醉，我見到都唔舒服；訓我隔離床的女士又係咁，全日聽到佢“gur gur”聲，都幾大壓力，不過見佢咁辛苦，都戥佢好慘！

成個手術過程，都係係我最喜愛既梁靜茹歌聲下渡過，除左歌與歌之間的靜止時間聽到ｄ鋸聲有少少驚，其他時間都冇咩野，一路都係好清醒，心跳一路都保持住八十幾下；其實最驚係打麻醉針時，因為好驚，又唔知下一步係點，打前麻醉師叫我放鬆ｄ，話我心跳百幾下，我就即係狂深呼吸，因為我好驚佢話我太驚而要全身麻醉呀，不過最後我都handle到！

半身麻醉的感覺其實好特別，體會到有知覺但下半身郁唔到的感覺，真係好唔開心同無奈，我終於了解到癱左的人係好慘的．．．麻醉針係係背脊度打架，我要做個側睡姿勢再屈起雙腳，好似攣工蝦米咁，打完後，雙腳慢慢無左知覺，開頭都有少少想嘔的感覺，因為好似覺得ｄ麻醉藥湧緊上心口咁，但慢慢就無事啦，望住自己隻腳比醫生好似沖水倒水咁消毒，佢地開始手術時就用塊布遮住左我就睇唔到喇，我好快仲訓著覺添，因為尋晚都唔夠訓，係病房又呆等左咁耐，但大概半小時後，我忽然醒左，因為個身係咁震，但又唔係凍親的震喎，根住訓唔返，姑娘話麻醉藥會令我震，有ｄ人仲震得勁ｄ喎！

不過聽住MP3做手術，我懷疑我係第一個，因為手術室ｄ姑娘好愕然我帶住個headphone入黎，仲大我話唔得哥喎，我咪大返佢話醫生比，就係咁先揀半身麻醉，聽唔到ｄ機器聲麻！

今日個晚餐唔錯，有豆卜桂候牛腩同蒸魚柳，可惜我又無咩胃口，我又唔食魚，只係飲晒碗花生眉豆豬展湯．．．但我明明記得有得揀中餐or西餐，問姑娘先知，係一朝早揀好晒，所以要聽朝先揀得，好期待呢！

其實由四點開始，麻醉藥散時，我開始feel到痛，去到九點半時，真係勁痛，ｄ止痛藥都唔掂既，醫生就叫我打止痛針，side effect係頭暈同作嘔，不過佢都好鼓勵我打，所以我都打左，真係好好多。

宵夜係一杯熱奶同蛋糕仔。

唔計媽咪同太陽哥哥，今日有姑媽黎探我，仲有封大利是！嘻嘻！其次就係太陽媽媽，佢買左燕窩比我添，我真係．．．食唔起呀，哈哈！仲有Yammy同Jimmy，Yammy好細心，買左我鐘意的朱古力奶，仲係BB size，好鬼cute，同埋一罐我好鐘意食既朱古力，真係好有心好細心，佢成日記得我ｄ喜好，真係冧死我，多謝晒您呀！

另外，今日最重要的環節就係．．．登登登登，半夜十二點要幫太陽哥哥慶祝生日，呢個安排真係諗到頭都爆，首先我好內疚啦，係佢的第一個生日，竟然因為我要做手術已係醫院過，所以我真係好想做ｄ野補償返，或者做ｄ特別ｄ既野，令佢過得難忘ｄ，所以就約左幾位好朋友接近十二點時黎到醫院，琪琪就負責買蛋糕！不過最大問題係，我唔知自己隻腳會係咩情況，又或者會唔會唔比我落地要卧床休息等等，不過我一早就問左物理治療師，應該唔使，亦同好好人好靚女的吳姑娘講定我呢個計劃，佢仲好幫手話會通知夜間姑娘，應該冇問題的！

不過計劃竟然．．．當我同太陽哥哥十點幾係度睇電視時，有個夜間姑娘走入黎講：您一陣係咪有朋友黎？我驚您地太開心，您地係走廊個邊啦！我打晒眼色，佢都仲繼續講，好攪笑，太陽哥哥就問我，乜一陣有人黎咩？唉，個計劃就咁就踢爆左！冇計啦，跟住到BEN佢地，過左十二點都未到，唉，叫左佢地預鬆ｄ架啦，成日扮勁！所以唯有我送左禮物同生日咭比太陽哥哥先啦，大約十二點十分，佢地就到左啦，阿嬸又走入黎話：您ｄ朋友黎左啦！激死！我行得好慢，阿嬸就比左輪椅我坐；佢地一見到我，就笑我隻特別鞋好樣衰，叫我咪著去碌齡影衰佢地！頂呀！我住係Block F，11/F，8B床，但佢地只得8B的資料，所以就去左Block B，8/F搵我，完全錯晒，成班傻佬拎住個蛋糕半夜係醫院亂咁衝，真係笑死人，仲比個邊ｄ阿嬸話去錯晒呀，私家病房唔係呢座呀！哈哈！

由於我地都幾嘈，都係自動自覺去左平台的士站度慶祝，休就係咁玩我支拐杖，BEN就係咁食我盒朱古力，明記就扮晒野拉太陽哥哥埋一邊方便其他人捧蛋糕出黎，但又唔知自己假到爆，哈哈！琪琪好有心意，上次太陽哥哥買左隻雞仔生日蛋糕比佢，佢今次就特登買返隻雞仔媽媽送返比太陽哥哥！呢個生日派對，相信在座幾位朋友都會好難忘，我覺得攪得成好勁呀（撇除踢爆呢part）！

http://video.yahoo.com/video/play?vid=551253