今朝好忙，太陽哥哥未夠八點就黎左探我，我就叫佢幫我食左個早餐：奄列蛋煙肉薯餅，跟住佢八點半就返工喇，佢仲收埋左排益力多係電腦後面比我呢！
九點半，物理治療師黎同我按摩，嘩，開頭有ｄ痛，但後尾好舒服呀，勁過深圳ｄ揼骨妹ｄ手勢，都話男按摩師正ｄ架啦，哈哈！跟住佢睇我行路，矯正下我ｄ姿態，佢話支拐杖較得太低，幫我較返高ｄ，頂，唔怪之前好難行啦！佢叫Vincent，已經睇過我幾次，好攪笑架佢，成日都好多英文：Nice、Yes、All right、Exactly！．．．etc．．．
十點半，醫生黎巡房，知道尋晚我冇打止痛針就比我今日出院啦！咁佢幫我拆紗布同消毒，一拆，好恐怖呀！一條縫左十針有多既百足蟲，同一支針插住隻腳！
由於佢話我隻腳比我預期中腫，原本下星期三先覆診改為今個星期五，足足提早一半時間，攪到我都心慌慌！
跟住姑娘幫我消毒，佢都幾唔留力，我諗因為要抺左乾左同凝結左既血漬，佢係咁係我條毛蟲度由上而下咁掃左四五下，真係痛到入心入肺！跟住針口位，佢係咁“ug”(ugly的ug)支消毒捧去個針中間度，好痛好“拿”呀！真係痛到差ｄ喊！
跟住醫生幫我包紮，佢好細心好好手勢，都係少少痛姐；不過一包，可能迫到個傷口，就有血滲出，包返成隻腳後，佢就剪開個窿留返個針口位，比我返去自己消毒，咁恐怖，叫我點落手喎？我仲望到個針口窿一樣滲緊血．．．
http://video.yahoo.com/video/play?vid=551466
午飯：燒西冷配燒汁，羅宋湯，鮮什果tart。
食過午飯後，跟住好忙，要去買敷料包(Dressing Kit)，每日一包，用黎消毒，要阿嬸推我落復康店度買；之後拎隻特別鞋去開個窿，因為要比支針露出黎；之後去提錢，因為租輪椅要比一千蚊按金，真係甘！試輪椅都攪左成半粒鐘，因為張輪椅ｄ位好唔岩，但較極都去唔到最理想效果，但冇計，因為呢張輪椅唔係為我度身造的。
去左咁多地方，隻腳垂直左咁耐，返到去好攰呀！訓左陣，慢慢執下野，我仲問醫院攞左ｄ x-ray借比我影相留念。
然後就等細妹黎接我，跟住一齊食埋醫院的最後晚餐：茄汁雞扒飯，白菌忌廉湯，黑芝麻芝士餅。呢餐係最好味架，真係好好食！
之後我就沖埋涼，費事返屋企沖，呢度大ｄ舒服ｄ麻！我有好多行季呀，尋日已經攞左左ｄ架啦；等威哥黎到後就走喇，唔知點解，有ｄ唔捨得呢！叫左八折的士，回家成為$94蚊。
沒有留言:
張貼留言