今日係醫院好full呀，先係太陽哥哥一早黎陪我，佢個樣好眼訓，原來．．．佢由星期二開始，每日都傳真去電台(瘋SHOW快活人)點唱，話女朋友係星期五做手術，想鼓勵我，叫我要快ｄ好返，同我去玩！而呢個點唱，終於係尋日播左出街，但佢借左MP3比我做手術，變左個朝返工冇得聽，尋晚咁夜返到屋企先開始聽，而個節目last for三個鐘，佢大約聽到兩個幾鐘先聽到，訓時都五點了．．．佢今日一黎到，就厄我話尋晚聽到劉德華首新歌好正，用電話錄了我聽，係“只想抱抱”，咁就播比我聽啦，但跟住首歌播完，就有DJ係度講野．．．我真係好surprised好感動呀！大家快ｄ去聽下啦，嘻嘻！
http://www.rthk.org.hk/rthk/radio2/crazyandhappy/20070518.html
(揀完media player or real player後，因為有三部份，所以記得click第三part呀，約11:20分鐘開始，就會有劉德華既"只想抱抱"，跟住就係太陽哥哥的點唱留言啦！)
我真係好感動，當然亦感到好sweet好幸福啦，佢話第個係佢第一次，之前未做過架！嗯．．．我諗我攪到佢好大壓力添；係，我講過，有得揀，梗係最好第一次啦，調返轉我氹佢都會盡量；但我自己都話盡量啦，唔通佢唔可以再畫畫比我咩？咁我都唔制啦！哈哈！就算做過，只要個剎那，佢係完全為我而做，我就會知道，就會感到！好似您畫畫一樣，因為我會睇到您係好用心去想住我，想氹我開心，而去畫每一筆每一線比我，當中的意義，我會知道架，傻瓜，我又點會介意呢？
大約十點半，Phoebe、Elsa、Jimmy就到左探我啦，見到佢地真係好開心，佢地好嘈添！Phoebe特登帶左指甲油黎同我搽呀，因為我做手術前，同佢講過要抺晒ｄ指甲油腳甲油我好唔捨得，係醫院搽指甲油，真係好特別，簡易永世難忘啦！Phoebe買左魚翅百力滋比我，叫我補補，好有心思；Elsa買左新鮮曲奇餅比我，仲寫左張咭仔比我，真係好感動呀，覺得佢地好錫我呀！
午飯時間，我一早點左食西餐，係紅腰豆墨西哥燴牛肉，知Elsa黎，仲點埋要薯菜添，仲有甜品牛古力泡夫，我又無咩胃口，次次實食唔晒，就比Elsa個為食妹同我一齊食，哈哈，一齊食，我仲會食得開心ｄ呢！
大概一點鐘，我傷口發作，要打止痛針，打完開始暈暈地同眼訓，佢地就叫我休息然後走左lu；但訓左唔夠十分鐘，UGO的同事就到左探我，咁多人黎，令我好感動，因為老實講，同呢班同事真係唔係好深感情，但佢地買左好多零食，仲有一大紮花，最最最勁係有張心意咭，有晒所有同事的祝福呢，連老闆都有，真係好意外！
今日忍唔住，終於決定沖涼了，仲係護士長親手幫我包好隻腳呢！咁好手勢，傷口梗係無濕到水啦，不過今次沖涼，係我成世女最艱辛同最長的一次呀！
是日晚餐：長通粉配吞拿魚茄丁汁，南瓜忌廉湯，士多啤梨慕絲。係咪開始對醫院難食的食物改觀呢？
今晚臨訓打左止痛針，一覺訓到凌晨四點先醒左一次，好好多了。
沒有留言:
張貼留言