今日係公眾假期，真開心！起身先同媽咪食早餐，一心諗住落青衣城飲茶，點知假期勁多人，最後改去一哥食早餐！
未上畫時已講定必睇『分手說愛您』，明日正式上畫但今日有優先場，太陽哥哥尋晚已經買定飛！
去到MK Broadway，門口jam 晒人，我同太陽哥哥講：乜水呀，塞實晒！心諗，實唔會係明星啦，MK喎，係都去CWB啦！加上尋晚買飛都唔難買，反正塞住條路，我又生得矮，根本睇唔到，就比部相機太陽哥哥，叫佢舉高zoom過去睇下邊個，點知佢話：咦，真係房祖名同薛凱琪喎！
我好驚訝呀，於是就叫太陽哥哥幫我影相喇，因為我係完全睇唔到，記者攝記企晒係前面，再後面勁多路人包圍住，兩位主角都迫到冇可再後，謹餘少少空間．．．生得高真係著數好多，視野幾廣闊！
薛凱琪含情脈脈咁望住房祖名～～
笑容好一致～～
跟住職員大叫2號院入得啦，我地就攝過去入場，但奇怪係冇咩人入場，連埋我地只係四個；一入場個位就係小食部，太陽哥哥又話想食popcorn，咁就買啦，就係呢個時候，薛凱琪同埋幾個攝記都入場喎，入完場就企係上扶手電梯前個大紙牌位置比攝記影相，而其他路人因為冇得入，就隔住左係出面遠距離咁係咁影．．．我頓時覺得我地好似VIP咁，企到咁近，但出面成堆人就冇份！
跟住薛凱琪就入左去電梯旁位置稍等，太陽哥哥亦買完popcorn過黎，四周完全冇外人，我地正準備上扶手電梯，薛凱琪企正係隔離，我就鼓起勇氣問：我可唔可以同您影張相呀？佢好快咁答：好呀！咁就意外地咁同佢影到張合照喇！我諗出面ｄ路人想影都冇機會，所以覺得自己非常lucky！攝光燈一閃個剎呀，有個工作人員叫先生．．．未講完但我地已經影完，佢就話無野啦．．．所以呢，只係遲多半秒，我都未必影到，呢ｄ真係隨緣～～
講返套戲，雖然好有期待，但一ｄ都冇雙重失望，真係好好睇呀，拍攝手法又得意，激讚＋推介～～其實薛凱琪初出道時，我覺得佢幾靚架，但一ｄ都唔鍾意佢，係近年改觀左，可能因為『早熟』吧！至於今次套戲，佢同房祖名真係好似情侶咁演到好鬼sweet，不過拍左咁多年拖都咁恩愛，真係好難得！
但好老實，如果我個男朋友係咁，我真係唔會同佢一齊囉．．．唔上進、郁ｄ就辭工唔做、淨係識打機同訓覺，連買野夜都要call返緊工既女朋友，離晒譜！都唔明白咩叫搵食艱難，我地呢ｄ要養家既，就會好了解！不過套戲唔係講理智既，係講佢兩個個份深厚既感情，兩個都演得好自然，有ｄ笑位仲好好笑，其實戲入面的生活細節，就好似拍緊拖的情侶既縮影咁！
回憶真係好值得記低拍低，唔係因為review返之前開心既日子，結局未必係咁．．．所以其實我發覺我平時影相都唔夠架，應該要攝錄埋，咁先更有感覺！哈哈～～
送機個幕，我流左好多眼淚，成個心口都濕晒．．．佢地既對話，令我諗返起以前，尤其是房祖名，當一個人狠心拋低您時，真係話走就走，可以變得好冷漠，無論您點講點求都無用，感覺真係一湧已上．．．雖然諗起以往唔開心既日子，但我都覺得呢套戲係好值得睇！
睇完戲因為心情問題，有點情緒；行街買野令自己開心點，買左兩條連身裙；近排好鍾意買連身裙，貪夏天方便又涼爽，最重要係唔洗花時間襯衫！
沒有留言:
張貼留言