幾個月前，我地已開始同威哥睇舅仔衫，媽咪＋琪琪＋我，係威哥御用既三個形象顧問；之前睇過度身訂造既舖頭，又去過 izzue、G2000，連youngｄ既 black label系列都睇埋，試過好多款，但威哥著左老西之後，感覺真係．．．老左十年，同埋唔型唔靚仔！
今日我地就去左潮人地區旺角，荷里活中心ｄ衫岩威哥年紀好多！我地試左好幾款呀，白邊？黑邊？定無邊？
銀呔？黑呔？
背心仔型好多喎，最後扑鎚最尾個套！之後過左levis買條新牛仔褲，還欠鞋就攪掂呢個task啦！
之後我就碌去深水埗西九龍中心，約左子健幫Vivian個老公買鏡頭！試機+ing：
Vivian係太陽哥哥同事，結婚當日佢會幫手化姊妹們既妝，佢好叻女架！當Vivian同太陽哥哥係度玩緊又笑緊時，Vivian老公仍然好一絲不苟咁係度試緊機，呢個場面我覺得好好笑呀
！
太陽哥哥係度做咩呀．．．？
原來係度排XBOX隊，同小朋友淨機打．．．
您唔好蝦ｄ小朋友喎．．．
跟住我地又趕返旺角，睇大內密探零零狗；其實係太陽哥哥有張免費飛聽日到期，但聽晚要食飯睇唔到戲，點都要今日用左去，我就係頭先同威哥睇衫前，過UA買定飛先既；買飛時都一段攪笑插曲架．．．
我：唔該，我想買．．．em．．．em．．．(腦海只出現laughing哥)．．．laughing哥套戲．．．
售票員：OK，laughing哥既．．．em．．．唔好意思呀，贈券唔用得呀！
我：但聽日到期啦，今日一定要用，有咩戲用得？
售票員：em．．．今日用到既有地獄無門闖進來、迷失侏羅紀 、同埋大內密探零零狗．．．
我：零零狗？？卡通片黎架？？
售票員：(忍笑中) 唔係呀，古天樂做架．．．
我：哦哦．．．有大S個套！
售票員：係呀！
雖然冇諗過睇呢套戲，但得三套揀，似乎呢套最化算，加上太陽哥哥楂完車唔可以睇西片，唔係會訓覺架，哈哈！呢套戲可能我一ｄ期望都冇，所以冇咩勞嘈，雖然有ｄ笑位會Ｏ咀同覺得低Ｂ，話晒呢套戲似tailor made比國內同胞多ｄ，但有ｄ位都係堅好笑，好似古仔扮成龍大哥頭髮廣告 - "動er"，同埋大S發姣引古仔個幕，都真係好好笑！
今日去開豐澤買野，又點會冇著數，我冇話要ｄ咩，子健就拎左呢兩個 kitty cushion比我，同Vivian一人一個喎；其實我都唔知豐澤有kitty cushion野送，子健仲話賣晒廣告我都唔知？原來要買sony erison電話先有得送架！我即刻諗起Elsa，因為聽日會同佢食自助餐慶祝生日，之前佢話要我地請佢食自助餐咁破費，我應承左佢唔會再花錢額外買禮物，咁宜家用呢樣做生日禮物就又冇破費又氹到佢啦，win win～～
雖然我唔鍾意hello kitty，不過都覺得呢個cushion仔的確唔錯，所以問子健拎多一個放係屋企！嘻嘻～～
放係個bra bra紙袋度玩下Elsa先，等佢以為我唔知買ｄ咩內衣褲比佢都好喎！嘿嘿～～
沒有留言:
張貼留言