尋晚我地問左媽咪意見，今日就去多金都一次，訂定過大禮既野；我見好耐冇陪太陽哥哥食壽司，攪掂完就提議去始創食北海道活壽司！
我第一次黎食咋，ｄ杯好得意，有晒ｄ壽司名，要三隻放埋一齊先影得晒咋！
帶子壽司($35)好正，帶子係爽而唔係林架，好岩我口味，仲好大隻添！
我愛吃貝殼類壽司，點了三色海貝($31)、烤牛肉($13)、芝士海鮮($18)、炸八爪魚($22)、燒牛舌($13x2)、沙律醬焗蠔($18)：
太陽哥哥點了軟殼蟹手卷($18)、三文魚刺身($35)、墨魚($13)、北寄貝($22)：
過大禮方面，問左主要係睇受個方想要ｄ咩，媽咪想要實物，太陽媽媽從簡就可以，所以我地只訂左男家過禮套餐；另外，潮州餅方面就要麻煩琪琪幫手去買，真係唔該晒！其次會預備埋西餅咭、唐餅咭、紅酒、生果籃、罐頭鮑魚＋海味金、三牲金、禮金等等，應該係咁上下啦～～
其實過大禮呢樣野真係好煩，好想快ｄ完左去，因為各方眾說紛紜，媽咪聽左朋友親戚們不同的意見，朋友們的方式係近代新潮做法，親戚們就係最傳統既做法，攪到媽咪成日模稜兩可咁，自己都唔知想點咁，一時就同我講呀邊個話要咁咁咁做喎，一時又變晒口吻咁話呀邊個話可以簡單封利是就得喎，仲叫我唔好咁心煩．．．跟住轉過頭又話好似又要點點點做咁．．．
講真，宜家呢個時代，咩方法都有，樣樣都行得通，冇話錯既，我唔太鍾意係聽到批評咁樣係唔岩或者有問題，金都都係做生意，講得有呢ｄ方法就即係有人咁做啦，加上擇日子個相士都話係可行！其實邊種方法都唔緊要，最重要係您要話我知您想點，唔鍾意個ｄ方法，與其批評，不如直接簡單話我知您想點啦，但我次次問親，都係比唔到一個明確答案我，咁我好難做．．．最後實在時間緊迫，都係叫太陽哥哥出手，早知一早咁做啦，咁快就攪掂，唔知係咪媽咪對自己個女會要求高ｄ呢？唉，難為我為呢件事煎熬左一段時間．．．我唔係話媽咪唔錫我，亦唔係投訴佢，只係係呢件事上，同佢成日達唔到共識，又唔知佢想點，攪到我好煩擾！其他野不得不承認，佢係超級錫我地既！點都好啦，宜家總算安排好晒，快ｄ攪掂完呢個項目吧！
沒有留言:
張貼留言