今日係過大禮既日子，約清晨五點，太陽哥哥就起身，將過大禮既野，由大圍先搬回青衣我地屋企，連太陽爸爸媽媽都有幫手拎落去樓下架，放低所有野係青衣後，太陽哥哥就即刻開工楂車，約好九點多會車埋victor入黎幫手過大禮！
行程相當緊密兼爭取每一分每一秒賺錢養家，真係好勤力，勤奮指數簡直爆燈呀
！不過我當初聽到太陽哥哥講呢個安排時，第一個反應係Ｏ咀＋"下....?!
"，覺得點解唔楂少日呢？其實見佢咁辛苦搵錢，真係好誇張，我都唔知話佢好定支持佢好．．．
呢張相係我攝於清晨約六時，當時我都訓唔返，咪拎晒ｄ野出黎，好似去旅行到最後一日咁影下ｄ戰利品囉！哈哈～～ 但呢度仲漏左少少野，就係潮州餅喇，計劃係呀Ben八點會同琪琪係九龍城拎餅，因為間貴嶼仔開八點正，咁就保證可以新鮮運到啦！
加埋潮州餅就齊啦，呢堆就係林張聯婚既過大禮物資喇：
就咁睇相感覺唔到有幾多野，加埋我同太陽哥哥係鏡頭入面，係咪就有ｄidea 呢？因為要攪過大禮，我地學識左好多野，呢度既物資其實一ｄ都唔多，因為呢ｄ只係比女家既野，其實仲有回男家既野架，諗起都恐怖～～不過男家個邊從簡就得，咁就以利是代替，先唔洗預備咁多野咋！
好啦，大合照睇唔清楚，分批影近鏡先；先係一男家一女家過大禮必備既籃，內各有一對椰子、檳榔、對聯、龍鳳花燭、茶葉等，仲有兩支酒＋生果籃：
而大囍禮盒內有青褸、扁柏、四京果(花生、合桃、荔枝乾、龍眼乾、連子、百合、紅豆、綠豆、紅頭繩等)，最重要梗係禮金啦，最大封紅卜卜個封就係啦，入面放左一叠cash架，我咁大個女都係第一次幫手封咁大封利是呢！其實開頭諗住寫支票架，但金都個姨姨教我地比cash有誠意ｄ架，櫃員機一日先提到兩萬蚊，所以封好多既朋友仔，就要計定分幾多日"禁"機，又或者要去銀行啦！
個兩個黃色利是封，係我地自己另外預備既，一封係比威哥既舅仔置裝費，其實冇話過大禮比架，只係之前已交左呢個項目比媽咪全權負責，我地就係後面全權負責比錢，咁橫掂都係，就今日比埋啦！另一封就係三牲禮金，代表雞、豬、魚！
尋晚買既海味：
潮州餅、西餅咭、唐餅咭：
呢張相好爆笑，呀Ben扮貴嶼仔！乜拎餅拎到拎埋貴嶼仔都黎埋我屋企呀？哈哈～～
威哥食食下腸仔扮劍客！只係朝早大約九點，晨咁早屋企已經好嘈好熱鬧～～
等緊太陽哥哥同Victor時，我地就係咁影相；但似乎琪琪影相影得好過呀Ben，呀Ben影個ｄ，張張都影唔晒ｄ野．．．
重影多幾次，都係影極都影唔晒．．．激死人～～
睇下呀Ben影相幾咁落力，理應我真係唔應該笑既，但實在忍唔住，笑到肚都痛埋！姿勢就有啦，但點解影極都影唔到ｄ餅咭入鏡架，幫我地影個ｄ全部都影唔到ｄ餅咭．．．
太陽哥哥同Victor黎到啦，一齊影返張相留念先！Victor同Ben兩位兄弟今日都係第一次見，冇夾過下件tee又會咁襯既，希望922個日您地都咁有默契啦！
玩夠影夠後就入籮，準備出發啦～～
Ready好晒後，我就返過隔離屋匿埋先，攝影方面就交比琪琪啦！
Go Go Go～～
敲門～～
過大禮爆笑全紀錄：
真係比呀Ben激死，把聲大到蓋左victor把聲，又要係咁帶頭講野，但又成日唔記得要講ｄ咩喎，攪到琪琪係咁提佢；講利是時又淨係掛住講H1N1笑，連禮金舅仔金都完全唔無提到．．．不過成個過程我同太陽哥哥一路睇返，一路都覺得好好笑既，雖然呀Ben傻傻地，但攪笑本身係佢既特色黎既，呢次點都係一個幾難忘既經歷，唔該晒琪琪拍低晒成個過程，等我地事後可以睇返，so good！
禮成後影相留個念先：
跟住太陽哥哥繼續開工，車埋Victor走，我就請大家去飲茶！
飲完茶返去hea左幾個鐘，等到太陽哥哥放工，我地又出旺角泉章居食晚飯！
我地叫左個$328四人餐，揀左鹽焗雞半隻、玉鮑扒時蔬、豉油王煎中蝦、花膠炆海參！
對於今日過大禮，我完全feel 到媽咪好滿意呀，攪掂完去飲茶時，佢一路行一路係咁笑咪咪，仲比我見到，我咪問佢：仲咩係度自己同自己笑呀？
佢開心就好了，之前都有ｄ擔心唔知ｄ野做得足唔足架，佢滿意就真係so good，又攪掂一個task！反而媽咪問點解ｄ海味買咁大包呀，我咪話太陽媽媽話咁好睇ｄ囉！嘻嘻～～太好了，我都好開心呢，因為其實今日個過程，都真係幾好玩！
沒有留言:
張貼留言