聽日係過大禮既大日子，為左呢日，之前真係攪到頭都暈；雖然好頭痛，但總算係一個好有意義既日子，加上所有野總算塵埃落定，宜家要做既只係照單咁執，咁係呢個"執"既過程，又原來係幾好玩＋過癮哥喎！好似去金都買個ｄ過大禮籃，真係學到ｄ野，留左一個幾攪笑既回憶比我同太陽哥哥；至於今日，就係最後衝刺喇，同太陽媽媽一齊去買生果籃同最重鎚既．．．海味！
平時做野，通常都係我等太陽哥哥放工，點知今日佢就威啦，放工後自己去金都拎過大禮個兩個籃同個大囍禮盒，仲第一個返到屋企等我同太陽媽媽放工．．．其實係因為佢公司今日係迪迪尼攪ｄ team building function，四點就放工咋麻～～
等埋太陽媽媽返黎，我地就出左去買海味啦；其實之前怕麻煩，本身已同媽咪agree左用海味金代替，銀碼佢都滿意架；但一路知媽咪鐘意實物，咁岩太陽媽媽話要幫手，因為佢總算識揀過我同太陽哥哥丫麻，所以就臨時決定去買實物喇！間舖頭唔係ｄ咩大舖頭，但係平時太陽媽媽幫襯開既，咁岩呢兩日仲換大左間舖，太陽媽媽話ｄ質素都唔錯架，咁我地就唔怕比人厄．．．掛！哈哈～～
黎到見到好多海味呀，一款海味都有幾袋唔同價錢，真係花多眼亂．．．
買緊髮菜呀～～
試食蝦乾～～
用黎過大禮，太陽媽媽樣樣都揀價錢最貴個隻架；加上佢地諗住唔需要回男家，所以揀比女家時個份量會重手ｄ架～～
我地唔係富貴人家，做唔到質素同數量最top，但求唔寒酸，最重要夠體面＋買足意頭就ＯＫ了！我咁大個女都係第一次跟住去買咁多海味咋，對我黎講算豪買架啦！哈哈～～
買完海味就去街市拎果籃，其實之前太陽媽媽訂左架啦，但講明黎到先執，點知黎到時已執好晒同包好晒，佢仲話咁夜怕我地講住走喎．．．下，其實係佢自己想準時收工咋掛．．．太陽哥哥嚇下佢話：唔得喎，用黎過大禮，睇睇好ｄ喎！其實佢都唔介意拆既，不過佢好肯定咁講：真係冇問題，一定冇爛，唔係返黎搵我！咁我地最後都冇拆．．．
好大籃亦好重手呀，太陽哥哥一個拎返去都唔掂，要同太陽媽媽一齊拎呢！
搬晒ｄ野返去後，我地等埋太陽爸爸放工，就出去食飯啦！今晚咁開心，我地一於食龍蝦同鮑魚呀！
原隻鮑魚扣鵝掌：
芝士焗龍蝦伊麵底：
海斑仔＋金銀蛋莧菜：
沒有留言:
張貼留言