呢期我係咁執野大家都知啦，我之前已先將雜物分左類架啦，今個假日就執兒時信件同書本！
細個未有icq/msn，同海外朋友通訊只可以寫信啦；嘩，原來我有好多好多信件架！以下係同好友tracy來往的信件，佢中二就移民澳洲，開頭個六七年仲未有email，我地真係靠寫信維繫，呢度有過百封信架；其次仲有錄音帶、書簽、貼紙、小禮物等等，咁多年既聖誕咭同生日咭都係晒度架！
諗返細個個時對住部錄音機講野，餅帶成個幾鐘，對住空氣講野咁都得？好低Ｂ啫，但點解都會咁做呢？咪就係當中個份對朋友既情誼囉，真係無價架，反之係好珍貴好珍貴！咁做都係想比遠方分隔多時既好朋友聽下自己把聲，同埋當時我地讀緊書，根本無可能好似宜家咁可以飛黎飛去見面；試問宜家叫我錄餅帶，我自己都做唔到啦，冇人應對哥喎，都唔知講乜．．．細個時既毅力同魄力真係難以想像！
除左跟好友的信件，我仲有幾袋信件，當中當然有情書啦！哈哈～～另外仲有．．．
同筆友既信件，原來我既筆友有黎自法國、丹麥同英國架！可惜當時自己越寫越懶，又要應付學業，冇咩再回信就斷左了．．．好後悔呢！
中學時的angel & master遊戲，唔知大家有冇玩過呢？班主任會抽出一對對的angel & master，每個同學都會同時做angel同master的角色，但angel會知道自己的master係邊個，而master係唔知自己的angel係邊個，佢地會互相寫信回信，放係課室個郵箱度，藉以勉勵對方同了解對方！
其次係咁多年所收的聖誕咭呀，生日咭呀，同埋跟朋友們互相問候既信件；當中都有好多班朋友，初中、會考班、預科、義工、舊同事等等．．．最最最遺憾係多年前，媽咪話我太多野，我被迫丟左一包係小學同學架，到宜家諗返個心都好痛，因為我宜家的小學同學，正正比起其他group的朋友更人強馬壯架，如果宜家仲儲左係度幾咁好呢！唉～～～
我的小學手冊．．．
逐漸長大的我．．．我最鍾意右下角個張！嘻嘻～～
我的中英默書簿＋作文＋週記：
儲起多本中英默書簿，係因為細個時真係幾叻架，全部都係九十分以上的，唔係因為課外讀默／unseen dictation令我唔識一兩個字，應該全部都會一百呢！
最正係搵到封利是，但呢張一百元紙幣已經舊舊地，大家知唔知呢個款仲用唔用得架？
最最最攪笑非呢張入數紙莫屬，後面原來內藏玄機．．．
係細妹寫比爸爸的．．．金手指信！我睇完真係笑到扒係度呀！92年架啦，足足十七年前，一個家庭，有兄弟姊妹先會有呢ｄ得意野同窩心回憶，呢ｄ野真係非常珍貴，全靠我儲起呢ｄ當時的垃圾，今次真係儲得好好呀！
沒有留言:
張貼留言