2009-06-05 (Fri) 婚紗展．大戶屋

 

宜家weekend多數都要攪下結婚既事宜，今日星期五，一放工就要展開忙碌的weekend假期；今日開始一連三天有婚紗展呀，我地一路等 i-wedding club寄飛比我地，因為主要都係想要買餅咭；點知上個月冇婚紗展，到今個月有兼有免費飛，美心居然冇擺booth．．．oh no，真係激死人呀！

但橫掂都唔洗錢入場，太陽哥哥話照去喎，睇下當天攝錄都好，雖然已有心水，但去婚紗展落訂應該會多ｄ優惠！我地怕六日會多人，所以決定今日放工即刻去！

 

今日黎都算明智決擇，我地七點幾黎到，大會八點關門，所以根本冇咩人；一黎到就直接去心水公司個booth；其實係金都同佢地傾過一次架啦，但當時張flyer唔見左，寫低左既額外優惠都冇晒，唯有去多次，但佢地竟然認得我地呀，都幾impressed！

黎到都開門見山，睇埋佢地最新既成長片段，再詳細傾返所有細節同優惠；最正係當時冇客，我地識埋ｄ攝影師同錄影師，亦即場揀埋佢地；位攝影師安哥係舖頭最出名架，佢都有過黎同我地傾計，最重要係佢影過我地個場，好有經驗；之前問過ｄ舖頭都冇咩我地個場既版，先冇咩信心，攪到咁耐都未落實到當天攝錄；安哥除左有經驗令我揀佢外，佢仲認得好多酒樓既負責人，因為當時我地個場個負責人剛巧經過，佢就指指佢再同我地講：您個場係佢跟喎！嘩，好勁呀，咁都知！我地仲同佢分享之前我地book個個場既負責人，安哥都識佢，仲認得佢幾惡下兼串串地，唔係幾得客歡心，安哥真係堅識唔係吹水！

宜家兩攝一錄都比我地confirm埋，太好了，終於攪掂左呢個之前諗左好耐都未做到既大決定，so good！最可惜我地攪掂完都八點九，ｄ舖都close晒咁滯，冇得去抽獎呀！

 

之後坐叮叮返銅鑼灣，因為我想試大戶屋；其實想試好耐，聽人講出去食野，食物真身通常比menu細份，但大戶屋呢度除左唔會細份過menu張相外，仲會更加大份！

黎到成九點半都要等位．．．唯有影下相啦！

哈哈～～

 

我係櫥窗度睇下display有咩好食，呢幾樣係我覺得好吸引既：

 

影到冇野好影就自拍下啦，反正平時我地出街食野好少合照！

 

終於食得啦，餓死我！太陽哥哥點左特選大戶屋午餐[$70]，賣相的確如display般吸引！

真係好似比menu張相更大份喎，值得一提係呢度白飯係任添架，岩晒大食但又嫌食日本野唔夠飽既大胃飯桶朋友們！有機會帶威哥黎都好喎，起碼唔會食窮我丫麻！哈哈～～

呢個細細兜仔盛住ｄ撈菜既汁，細細個好得意！

 

我揀的廣島產鮮蠔蒸籠飯配日式炸雞[$85]，貪佢有蠔，望到都流口水！

但太陽哥哥唔食蠔，貪佢有碟炸雞，咁太陽哥哥咪有野食到囉，yeah！

 

個蒸籠飯好有特色呀！

連埋個"不不"食具，好特別，岩晒貪新鮮既我！

鮮蠔仔好野味，啖啖飯都食到有蠔仔味，正到痺！