.gif)
原來 i-wedding club換既 wedding expo飛，係咁多日都用到架，咁抵！橫掂太陽哥哥都係對面海放工，我地又未搵律師證婚，太陽哥哥提議今日再去多次！
約左佢地係銅鑼灣食下午餐先，佢地係太陽哥哥同埋victor呀，victor哥哥聽日都開始楂的士生涯，因為佢最近都考到的士牌呀，叻仔！太陽哥哥要指點下佢，我地就一齊食下午茶，但我唔記得影相呀；呢餐仲係我請呢，同victor哥哥食飯就食得多，但今日先係第一次請佢食野咋，我預祝佢聽日第一日生意興隆、順順利利！
跟住我同太陽哥哥就去會展，拎左ｄ律師價錢，又陪太陽哥哥睇下ｄ帖，睇下有冇咩新 idea；原本好大機會可以拎返尋日張單去抽獎，點知臨尾先發現．．．太陽哥哥冇帶尋日落訂個信封！唉，激死人，諗住抽返支蠔油都好丫麻！
之後我地返旺角，我想買份禮物比豪哥，因為佢真係一個好好既supervisor，好想答謝佢；原本上個weekend應該要買架啦，因為星期初係佢 last day，但上星期好鬼忙，我完全冇左件事，唯有宜家買完寄比佢啦！除左買禮物，我地仲上左旅行社，睇下我地honeymoon去邊度玩好！
我地對honeymoon既要求，係希望揀個大家都未去過既地方，較為勁ｄ既係，我去過澳洲，太陽哥哥去過馬爾代夫，而我地又去過拍得住honeymoon既九天北海道加東京，咁已經有三個大地點唔去得啦！而我地對齋睇風景又無咩興趣，想動ｄ既，但動得黎又唔係勁動喎！
我地先拎左新西蘭同南非，感覺除左靚景外，都有ｄ動既野，比如綿羊，我想玩剃毛同楂羊奶呀！但可惜冇sky diving，其實一路諗新西蘭係因為想玩sky diving，但原來跟團話，sky diving係澳洲團先有！南非諗住有ｄ鴕鳥睇下騎下，點知agent又話冇得騎鴕鳥架喎．．．買鑽石都唔會係南非買，咁遠去到玩個迷城，佢又係咪真係咁好玩呢？
仲有希臘，但agent話十月唔好去呀，因為去愛琴海時會勁大浪，大到兩日前食既野包您會嘔埋出黎，有冇咁誇呀？但唔去愛琴海去希臘又冇咩意思，總之佢話希臘係六七月去先最正架喎！
跟住望到聖誕老人村，好似好浪漫好得意咁，但成個北歐團行程，除左聖誕老人村，其他的景點我真係冇咩興趣，太靜態．．．
好似想去既地方都有ｄ想玩但玩唔到既野咁，又或者唔想去既景點咁．．．不過仲有時間，再諗下啦！
去完旺角再去葵芳，想問下video tape轉DVD既價錢，記得葵涌廣場有呢ｄ舖頭；攪掂後搵野食，今日係第34個月紀念日，鋸下扒好似浪漫ｄ，就去左紅樹林，原來紅樹林同椰林閣係同一集團既！
紅樹林裝條比我感覺cheap cheap地咁，不過野食又OK喎，好味到我全部食晒呢！
太陽哥哥又整古做怪啦！哈哈～～
跟住又話要影佢坐監喎，不過影得唔似呀！嘻嘻～～
食完野後真係返屋企啦，今日去左咁多地方，好攰呢！太陽哥哥係佢既雜物內，搵到兩套M記千禧年迪士尼collection，有成28隻迪士尼卡通人物，我覺得係筍野，即刻"老笠"左佢！哈哈～～
今日真係去左好多地方，銅鑼灣、灣仔、旺角、葵芳，過左一個忙碌但開心的34個月紀念日！
沒有留言:
張貼留言