2008-10-15 (Wed) Lunch Buffet @ Marco Polo 香味屋

又因為Buffet Club的 coupon，今日放假一天，去左Marco Polo香味屋食Lunch Buffet！

諗住lunch buffet應該係好普通，加上對buffet club冇好感，佢揀既餐廳唔會好high，冇期望時，點知去到好驚喜，因為係勁多野食呀！

拎食物個度有個迷您牧場裝飾，好特別呀！

先黎個食物巡禮先，自助餐第一炮當然係海鮮同刺身壽司等冷盤啦，我點解話一黎到好驚喜，就係竟然有．．．生蠔

！平時dinner buffet都唔係間間餐廳會有生蠔，但呢度竟然有，仲係lunch buffer咋！

壽司刺身種類都好多，都佔左兩個counter！

係度發現左兩樣平時好少食buffet見到的特色，第一樣係呢個專用烘爐，用黎烘住ｄ麵包，而且麵包種類係好多選擇架！

開左度門睇下ｄ先，真係好多選擇喎！

第二樣特色係呢個自助即製夾餅機，可以親手整夾餅，小朋友們最鐘意！

好喇，睇下有咩甜品先．．．呢度通常都係五六個cake，選擇比較少！

除cake同desert外，仲有豆腐花同Haagen-Dazs

，雪糕呢part真係唔錯！

仲有幾盤新鮮生果

，呢part我覺得好攪笑既，成個生果放係度都係第一次見，我有懷疑有人會好似去飲咁拎返屋企呢！哈哈！

我今日食左好多好多野．．．先講冷盤，生蠔

同青口添多兩次，好正！

刺身我只食八爪魚架咋

，但好鮮好爽口！

熱盤方面，呢款"韓式炒和牛"真係一定要讚，呢味唔係放係度任人拎架，要過去放低牌仔比廚師，跟住煮完侍應會拎黎您檯面，每次只係四舊！望落去好厚，我仲驚會好韌，點知唔韌不特止，一咬落去ｄ肉汁會滲出黎，又係我鐘意的六七成熟咁，仲有少少肥肥地既根，好好味呀，我比十個good！我一共叫左三個round，我自己都食左九舊呢！

我覺得呢度抵食，和牛亦係其中一個原因

，自助餐通常咪得燒牛肉，但好唔好味好睇咁岩個舊牛肉燒得好唔好，但呢度係食和牛喎，除左呢味韓式炒和牛外，仲有幾款熱盤和牛添，有和牛炒長通粉，仲有炆同燴和牛，我覺得食呢ｄ就最抵食啦，鐘意食和牛既朋友實鐘意！

其次，飲左兩碗冬蔭功湯，ｄ料好廣東feel，不過都係我鐘意的菇類，所以好好味，可惜唔夠辣！

其他都係普遍熱盤，不過個泰式豬頸肉炒河粉真係好得，可能我一向都鐘意食泰國野啦，食落好有泰式風味！

掛住食有ｄ都忘記左影相，食飽後得閒，又行去睇下有咩cake，順便逐個逐個影下，不過被人拎左，唔係一個完整既cake了．．．