前排聽elsa講去踩單車，但好快已經好攰唔踩得耐，頓時令我諗返四年前的三月，我攪左個踩單車活動，由於我係攪手，好多人知道後都非常踴躍參與，哈哈！為左召集多ｄ朋友仔參與，我仲攪左個碌齡朋友 x CU同事既crossover！
記得當天既活動真係攪得非常成功，所以好想同大家分享下，我仲搵返當時出的email通告呢：
Sent: Friday, March 12, 2004 11:00 AM
Subject: ＜重要通告＞單車一日遊(15.03.04)
您地好嗎？繼上次海洋公園約會後，我地好似好耐冇見囉喎，休息數月後，相信大家都抖夠勒，又係時候出動勒！見大家饑渴左咁耐，我地就鐵定係今個星期日攪返個單車之旅，詳請如下：
已招集朋友
型男：明記、非洲、漢、健、Ben、Alex、Hing、Jacky、Sa
索女：Giv仔、Olivia、Elsa、Phoebe（Giv仔同事）、Karen、Wing、Wai Yee、Wai Yee表妹（註：Wing & Wai Yee表妹亦會帶新朋友黎）
活動日期
二００四年三月十五日（星期日）
集合時間
上午十時正
集合地點
新城市廣場Delifrance門口（羅馬嘖泉舊址，亦即近大會堂出口）
踩單車（由沙田至大尾篤－沙田開始／大尾篤交車）．我地會沿吐露港路線踩，中途會係大埔海濱公園休息、小食站度食下野（唔知執左未？）、影下相、休息下。去到大尾篤後，會上堤壩周圍踩下、影下相、有地方的話可能有集體遊戲（當然由我地既靚仔健Sir領玩）！估計下午四點會完結踩單車呢part，部份朋友因另有節目，會係踩單車後離開。為免掃大家興，其餘既朋友當然會繼續直落啦！之後我地有幾個選擇：自助BBQ／食盆菜／唱ｋ／返沙田食飯（大會到時會以抽簽形式決定，請大家諗定您地既意願啦）。夜ｄ大家仲有興致的話，可再去碌齡添！
注意事項
（一）大會估計當天淨計踩單車時間需最少三個鐘，自問體力不支者或身體潺弱者，可在選擇退出。
（二）由於上次海洋公園之遲到新措施非常有效，大會今次會繼續採用：由當天10:00a.m.起計，最遲的兩位參加者將會被罰款每人各HK$50元，任何原因均不獲受理。收取之罰款會作為部份租車／晚餐之贊助。
（三）早餐請自己攪掂，早上集合後大會不會浪費時間等候參加者食／買早餐。
（四）自備乾糧及飲品，尤其飲料．
（五）踩單車時記住要互相照顧．
如有其他問題，可與明記聯絡(電:9645-8366)。集合時間如有改動，明記亦會親自致電大家。
Givens
自己睇完呢個通告，都覺得好好笑，原來以前自己攪活動係咁有心機既！有份去的朋友仔，對呢張通告又有冇印象呢？希望您地都能回味回味啦，哈哈！
呢次活動大家都玩得好開心架，真係攪得相當成功，點成功法？我揀左幾張大合照同大家分享：
當天明記炒車呢幕，相信我一提，大家實會印象深刻兼捧腹大笑，呢張相經典囉，人同車炒到同時離地，當時我只周圍影相，見明記踩緊過黎就對住佢影，點知佢唔知做咩鬼失控，快門一按，竟然就正正拍低佢跌低個刻！我曾經想send去雜誌個ｄ趣怪新奇相片專欄架，睇下會唔會被揀中刊登，仲要係有酬勞個隻，哈哈！
跌低後個個朋友衝前慰問，而明記只顧自己塊面有冇整花左，貪靚到暈．．．哈哈！
最後有醫療輔助隊幫明記消毒包紮呢，真係威！咁觸目喎．．．哈哈！
仲有好多相架，當時除左攪活動好有心機外，我仲好有交帶，有善後follow-up添架，簡直係一條龍服務，哈哈！由於當時科技未有今天咁進步，我又未有自己的ftp，亦唔係個個用msn有share folder，咁大log相好難送到各位朋友仔手上；有鑑於此，我整左個movie，然後放晒ｄ相入去，咁大家就可用最快最簡單的方法回味當天的開心片段，我仲用埋非常貼題的"單車"做背景音樂呢：
呢日真係由朝玩到晚，係咪好奇怪有咩可玩到咁耐呢？當然係因為有我呢位又細心又計劃周詳的攪手啦，我地由沙田踩到大尾篤，中間停過大埔海濱公園休息影相，呢度真係幾靚，所以影左好多相！成個路程中，一有機會停低，我就要求大家埋黎影張大合照架啦，最攪笑係後期聽到佢地話：又影？雖然有ｄ怨言，但佢地最後都會合作，唔係點有咁多相片呢？影時可能麻煩ｄ，但到活動過後睇返，就會覺得影咁多相係值得架啦！唔係四年後的今日，又點同大家回味返當時的開心片段呢？所以話呢，幾時都要影多ｄ相，留住最美一刻麻！哈哈！
去到大尾篤後又係水壩坐底圍埋一齊玩集體遊戲，我地咁大排人係水壩坐底圍埋一齊玩遊戲，當時好多人用好羨慕既神望住我地玩呢；我一早邀請健sir出山，幫我做集體遊戲主持，雖然都係玩拍七等冇咩新鮮感的遊戲，但佢都好盡責咁用心諗過點加ｄ新意落遊戲度，所以呢次係第一次玩拍七玩到有go back jump呢！加上係咁既環境下玩，感覺好特別，又新鮮，時間過得相當快！加上咁大排人，有如旅行團一樣，每次解散召集都幾花時間，自自然唔覺時間流逝啦！
天黑還完單車後大家仲意猶未盡，所以我地返大埔一酒樓食晚飯，一向行為出位的我們，食完飯賴死唔走，係酒樓玩啤牌killer，輸左就要食比人灑滿糊椒粉的西瓜一片！侍應見我地利用送的生果咁玩法，加上我地又鬼殺咁嘈，當然唔太滿意啦！最後去埋食糖水，今日的活動先正式完結，大家先捨得離開咋！我到宜家都仲諗緊，唔知係咪班男生見我帶左咁多女同事黎玩，所以先咁興致勃勃，成日都唔想走，平時都唔見佢地咁神心呢！
個日玩完返到屋企，我仲發覺自己對腳撞到瘀晒呢！好奇呀呵？應該係對腳踩時，成日撞到單車車身，所以變成咁囉！
我諗睇到呢度的朋友仔，心情應該同我一樣，好回味當時的開心片段，我自己就好難形容，有ｄ起伏；四年的時間理應好長，但宜家咁回頭一睇，原來已經一支箭咁飛過左！睇返相中的自己，肥嘟嘟傻更更咁；又睇返ｄ朋友仔，轉變都幾大，由以前的少男少女，搖身一變，宜家有ｄ已經變左係人地老婆、老公，甚至做埋爸爸媽媽添！
廿幾歲係每個人最玩得、最咩都想試、最咩都唔怕死的青春無敵階段，四年後今日的我，真係好回味當時，好想坐時光隧道返去玩返日呢！人就係咁，細個望快ｄ做大人，到真係大個左又望變返做細個；因為人越大，責任越多、煩惱越多、壓力越多、顧忌越多．．．有時真係抖唔到氣，就覺得做細個咩都唔洗理，多好！
時間過得雖快，但冇以前的我們，就唔會有今天的我們；時間過左就冇得返轉頭，我們隨住呢四年的過去，見證住大家既轉變，一齊成長，一齊體驗呢份情誼可以多年不變，淨係咁，雖然冇得返轉頭，但呢四年，並冇白過！
我自己呢四年前後，最大唔同係換左個男朋友，四年前既太陽哥哥，唔會知道當時身在另一個地方的我係玩得幾咁開心，連呢ｄ相都好似未睇過；到今日，佢識晒當時同我一齊玩的朋友們，宜家仲成為埋當中一份子呢！呢ｄ就係緣份，原本冇關係既人，會因天時地理而走埋一齊，變得有關係；一咁分析，我就覺得緣份呢樣野好奇妙，既然時間過去左就冇得返轉頭，我地就應該好好珍惜身邊每個錫自己既人啦！
其實踩單車活動半年前，我都攪左個海洋公園哈囉喂活動架，又係好成功，呢兩個活動，係令我做攪手最有滿足感既兩次，有機會再同大家分享啦！
沒有留言:
張貼留言