近來先知馬仔原來有出書既，尋日係旺角嘉禾睇完戲，一散場出黎就係大眾書局，逛了逛就見到，實物第一次見咋，於是就拎黎睇下啦，可惜包住晒，無得揭黎睇，只係睇到封面同底咋！我本身覺得馬仔好可愛好得意，相信唔少朋友msn都save左佢好多攪笑icon啦！
雖然只得封面同底，但封面咁colourful，我印象分已比得好高呢！再睇埋底的漫畫，紅色個本已經好攪野，令我已經好想買啦！呢度賣$60，即刻打去教協問有冇得賣，好消息之餘，仲只係$48咋！仲唔炸炸林過去買咩！
去到教協，冇包住的，任睇唔嬲，第二輯仲有貼紙送添！大家應該好熟口面啦，咪就係用msn icon做既貼紙囉！全彩色內頁，真係好抵！睇左一兩個漫畫已經覺得好攪笑，太陽哥哥見我睇到咁開心，就即刻買比我啦！
唔知點解，漫畫真係睇得好快，我睇左陣已發覺睇左三分一，即刻好唔捨得，冚埋唔睇住，因為真係太可愛，唔想咁快睇完冇得睇！本書都有講啦：本書為辦公室必備之選，有助舒緩悶症，每日幾十次，每次兩頁，必定令人精神百倍！"每次兩頁"咋．．．我睇到過晒龍呀！！
雖然只係睇左第一輯的三分一，但我已經覺得好好睇，講既笑話同生活鎖事好貼近，有ｄ仲好有影子，亦曾經發生係自己同家人既生活上，好正！博益亦就快結業，大家要買真係要快手啦，仲要記得去教協買呀，平十二蚊一本架！
今日冇出街，只係朝早同太陽媽媽的朋友飲左餐好豐富既茶！呢個weekend就煲左兩套film，分別係"愛情回水(cashback)"同"sawIV"，兩套都好麻麻．．．
沒有留言:
張貼留言