丁媽媽: 3月 2008

2008年3月31日星期一

2008-03-31 (Mon) 地址證明？

咁樣叫做地址證明？您地見過未呀？哈哈！

個日有急事需要地址證明，我又唔係屋企，就叫威哥去我房檯面有"咋"信，求其影一封做地址證明，然後MSN比我，點知一收到．．．哈哈哈哈．．．笑死人啦，笑到我扒底左咁滯！

呢個細佬真係傻得可愛，但又證明佢真係好少做野，攪到咩叫地址證明都唔識！唉．．．媽咪真係應該訓練佢多ｄ，比多ｄ屋企野佢負責下啦，話晒係屋企唯一男人喎！

2008年3月30日星期日

2008-03-30 (Sun) 愛之糭 & 愛之湯

繼太陽哥哥的愛之麵、愛之蛋、愛之糕後（http://hk.myblog.yahoo.com/aquarius-givens/article?mid=421），今日有愛之糭 & 愛之湯，其實中間都有煮過幾次，但點解只記低呢兩次呢？因為愛之麵、愛之蛋、愛之糕個次，係佢第一次煮野我食；而今次的愛之糭 & 愛之湯，係因為．．．

佢手傷左都要煮比我食，碌齡都碌唔到既手竟然煮野我食，雖然唔係咩勁餸，但佢隻手唔濕得水架，算係咁架啦，所以淨係份心意已夠晒數啦！

宵夜：兩包薯片加一罐可口可樂，好可口呢！哈哈！

2008年3月29日星期六

2008-03-29 (Sat) 尤如導遊的一天

今日我身負重任，因為要好似導遊咁，帶太陽媽媽的親戚去買珠寶呀！

起身後先去拎太陽哥哥的哥哥架車先，因為親戚黎度，太陽哥哥就做司機叔叔，我就做導遊，似足旅行團咁！

先去茶樓醫肚先，呢個團餐算唔錯吧！

飯後就出發去珠寶公司喇！嘩，係呢度坐左兩個幾鐘，換左三次位，我都未試過坐咁耐！但真係物有所值，我指間公司．．．因為我地既團友總共買左標價共港幣六萬幾元的鑽飾！我戴住的鑽石耳環，係分別各52/53份，因為團友想買比個女，我就充當model啦！

好大粒呀！同我條電話繩既minnie頭拼埋就知幾大啦；但我戴太假了，遮左太多耳珠，同埋細路女，太誇了！

講返正經，其實太陽媽媽的親戚想買鑽石手鍊同鑽石耳環，一樣比自己一樣比個女既，而太陽媽媽只係有周ｘｘ會員價九折，佢聽我講過識人，會有更高的折頭，所以就叫我帶隊喇！其實都係細妹個朋友啫，不過我地年紀大ｄ，帶親去買野既都起碼五位數字，比細妹買得多同銀碼大，變相佢個朋友都認得我囉！今次要買多過一樣野，咪要換左幾次位囉！埋單時仲係我碌咭，收返澳幣cash，碌咭又有miles claim返喎，咁就儲到三分一張台灣機票啦，超勁開心！yeah~~

今日最終亦fight到相當合理價錢，折扣率達一萬多銀，其實周ｘｘ品牌黎講，真係計得好盡了，攪到個朋友，我都唔係幾好意思，不過老人家，係好鍾意講價既．．．太陽媽媽自己都好滿意，仲自己問我朋友拎左咭片，話有咩搵佢買喎，話咁快就忘記左自己個周ｘｘ會員價，哈哈！各位朋友有咩想買，無論自置或者公司咩週年大會等等，都可搵我，一定平過會員價架，即一定多過九折！幾多唔敢講，因係咩貨都有影響，但我每次保守估計都有坐底八五折架；但最好價碼大ｄ先問我啦，唔係就好婆仔架啦，我唔做架！

咁就過左個afternoon，之後爭取時間去左佐敦裕華同油麻地永安買爽健涼鞋，買完都天黑了！跟住返大圍食雞粥，呢餐好豐富，有我同太陽媽媽至愛的焗蠔呢！

飯後拍照留念，唔關我事架，唔係我話要影，係太陽媽媽落order架，因為親戚過兩天經柬埔寨探親後先返澳洲，太陽媽媽話要今晚影完聽日晒好比佢地拎走，佢仲特別要求一張得我地五個的"全家福"，要比太陽哥哥阿姨睇下喎，唔知係咪睇下我呢？哈哈！

飯後我地就返去吹下水，數下ｄ澳幣，第一次有咁大叠澳幣楂手，哈哈！可惜我唔記得影相，勁失敗！沖昏左頭腦，咩都唔記得晒，激死！

之後返荃灣碌齡，原本少人唔去架，因為太陽哥哥手傷左碌唔到，又少了個人；但琪琪的朋友好想玩，就照gogogo啦！太陽哥哥好慘呀，坐係度溫習同睇漫畫，只可以睇，唔可以碌，佢終於體會到我上年做完手術後眼看不能碌的心情了，哈哈！不過佢都係陪我玩先黎，so要多謝佢！

雖然休及明記攪笑份子唔係度，有ben係度都開心，加上琪琪帶了karen二號同yami，係玩得放之人，所以今晚都係充滿笑聲，玩得都好開心的一晚！希望大家友誼常在啦，過兩個月karen生埋，alex黎唔到，我地又少左個中堅份子了！

2008年3月28日星期五

2008-03-28 (Fri) 1L 裝的維他朱古力奶

1L 裝的維他朱古力奶您地見過未呢？其實好多個月前，yammy知我鍾意飲維他朱古力，已經講過我知係大百佳見過，但我一路都未見過，亦無刻意搵，正當係華潤超市閒逛時，竟然成座山咁出現係我面前喎！

拎晒大中細size擺埋一齊影張全家幅先！哈哈！

細size的曾經都買過，貪佢細細個好"的色"好可愛，但真係只岩BB飲，一ｄ都唔夠喉架！

2008年3月27日星期四

2008-03-27 (Thu) Dinner @ 韓食家

今日tony約食飯，二月我生日約過但改左，到今個月jacky生日再約返，jacky仲帶埋carol黎添！我地係韓食家度食，食物好豐富呀！

呢個火煱好正架，忍唔住要黎張大頭照！

我呢個係三色粉絲！覺唔覺我ｄ頭髮直左好多呢？我貪得意特登吹直佢架！不過睇落都係curly hair靚女ｄ！呵？嘻嘻~~

仲有食到瞇眼lam lam脷既唔知咩雞石頭窩飯！

最後仲有個人參糯米雞湯！

咁名貴，又要影張大頭照先啦！不過我對人參麻麻地，食到我都震震地．．．

既然兩個都生日，唔知邊個請邊個，tony好有心咁買左兩份禮物比我地，真係估佢唔到，好有心好有heart！我開始對呢位不修篇幅的朋友改觀啦！我諗我同tracy唔洗點再改做佢了，因為佢越來越整齊，越來越gentleman，越來越細心了，其實呢ｄ細微野，食一餐飯就見到了！好似走時好識做幫我拎定手袋等我著褸，食甜品時坐位全部係梳化，但又細心到叫我坐一張有back既等我可以挨住．．．唔，好窩心，呢ｄ位真係會加分架！繼續努力就會冧到女仔架啦！嘻嘻~~

呢餐飯食左成兩個幾鐘，話題多係jacky呢對準新人講左佢地既婚禮的籌備進度，加上八卦既我又鍾意聽喎，佢地好勁呀，出年一月結婚，好多野已訂好晒，連妝都試埋，嘩，真係奇快！係差訂衫同回禮咋，我就比左ｄ意見，佢地亦好buy，係度賣個關子先啦！佢地話宜家個個月都有婚妙展，每次去就樣樣野都加ｄ價，換言之遲一個月訂，比錢就貴左一個月，呢樣又真喎，我都冇諗過會咁添！只覺得唔洗咁快咁誇呀？半年前or幾個月前都得啦！佢地話就算得，人地又可能冇期，比如婚紗相，個期有，但攝影師又冇期，知道就會謝晒皮，難得揀到又因外來因素唔得，好無奈！希望佢地樣樣順順利利啦！

都唔知係咪carol係度，jacky先唔急住走，哈哈，仲提議去食甜品添！我地去左．．．一睇個碗就知係滿記啦！哈哈！由於近年開始出白頭髮既我，好驚變白髮魔女，所以就算賣相唔吸引，都要食芝麻糊！

2008年3月26日星期三

2008-03-26 (Wed) 超級無敵獎門人最新遊戲率先睇

超級無敵獎門人取犀game做左三集，唔知大家有冇睇呢？我就全部追晒，因為我最鍾意玩ｄ攪笑同變態既集體遊戲！一路睇仲一路留意下邊ｄ唔洗點用道具又好好玩既遊戲，咁就可以同班碌齡朋友玩啦！不過今年聖誕alex屋企會多左位成員，可能唔會再join我地，我地亦無party場地lu．．．宜家先三月，好似咁快諗到咁遠咁．．．但諗定真係差唔多，因為每年我都好期待同佢地玩的xmas party，如果冇得再玩，真係幾失望架！

講返超級無敵獎門人先，有睇廣告既朋友應該知道三集取犀game後，今個禮拜個節目就會正式做返，其中一個大型game賣晒廣告，又揼本製造個機關，當中玩到要跌落水，其實係取自日本電視節目既，睇日本人玩都睇到覺得超勁爆好笑呀！！！笑到我格格聲~~~ 簡直收唔到聲，大家快ｄ去睇下啦！！

2008年3月25日星期二

2008-03-25 (Tue) Family Dinner

今日係每月一次的家庭飯局，少有的叫了個響螺湯，好好味！威哥照舊地不願拍照，我地照舊地bla bla bla傾計，唔知係咪咁忽略了爸爸，令佢唔開心，因見到細妹暗示叫我望下爸爸隻左眼，有ｄ淚水呀．．．唔係麻．．．有ｄ驚，有ｄ無奈．．．亦唔知係咪威哥講開宗教野，講咩宇宙係神最大，地上就媽咪最重要．．．唉．．．某程度上我覺得講錯野囉，話晒爸爸都係度，又唔係要您講大話話爸爸對您都好重要咁，只係．．．唔係應該都要顧及下佢感受咩？都唔洗大大聲咁講地上就媽咪最重要！講完一次又講第二次啫．．．唉．．．

約好下一次食飯係慶祝琪琪同威哥四月生日！