2011-06-29 (Wed) 細妹升職兼加薪請打邊爐

細妹升職兼加薪呀，仲係有史以來最高，有17％！我做家姐都超戥佢開心，做左咁多年，終於有返ｄ證明！佢今晚吹雞請打邊爐，正呀，連平時好少同到我地晚飯既太陽哥哥都即刻仆到黎！講笑啫～～只因打邊爐時間長，我今日都要成八點先放到工，黎緊呢幾日OT會好勁添！

呢餐食左六百幾蚊，多謝細妹！

2011-06-28 (Tue) 暑假課程開波啦!

轉左office後第一次見證幫手攪的課程開波，之前幾個月做既野，就係為左今日，場面好犀利！雖然我既support只係微小的一部份，但theatre入面播住ｄ好in的外語流行曲，而唔係平時攪活動時的純音樂，我覺得好型，聽到心情都好high咁！

四百幾個黎自世界各地的大學生，場面狀觀，相入面只係theatre底層，上面"高等"仲有一層！最中間就係中大副校，要全部學生圍住佢～～

2011-06-26 (Sun) Cooking@Home：粟米冬瓜螺頭湯、海皇蒸蛋白、煎魚、糖醋排骨

今日有時間煮飯，整左：粟米冬瓜螺頭湯、海皇蒸蛋白、煎魚、糖醋排骨。

粟米冬瓜螺頭湯係太陽哥哥上次見到馬仔食譜時叫我下次煮既：

原來ｄ螺都好污糟下架，我食到ｄ黑色野入晒手指甲度！

洗到好乾淨呢～～

煲湯骨出晒水，切好晒材料，就掟落煲度煲啦～～

海皇蒸蛋白係自己諗既，想煮一樣清ｄ既餸，簡單得黎又唔想炒菜咁求其，呢個名都係太陽哥哥食時幫我改既！

所有野切粒，不過菜好浪費，ｄ葉全部丟晒．．．

左邊唔要，右邊要～～

雞蛋只要蛋白～～

蒸蛋白～～

炒完粒粒材料就鋪上蛋白度，好靚又好味又健康既餸！

呢隻魚媽咪整過好好味，我之前買定條放係雪格，今日就煎埋去啦！

糖醋排骨第一次試整，太陽哥哥係食店食過話鍾意，就上網搵食譜，但份份都好唔同，有人用白醋，有人用黑醋；所以都要自己揀同調味，試岩自己的口味～～

先煎熟一字排：

調味～～最重要的一環：

慢慢等收汁，大約要半個鐘，中間我不停試味，試到條脷都冇咩感覺！

整蒸蛋白時想有ｄ紅紅地顏色，就買了甘筍，其實一ｄ都唔鐘意食；返到屋企見到雪櫃有蟹柳，仲岩啦！就貪得意將買多了的甘昏整裝飾～～

三餸一湯：

自己都幾滿意的一餐～～係糖醋排骨唔夠好味，要點先溝到個更好既汁呢？

我自己就好鍾意海皇蒸蛋白～～

多左的蛋黃丟左好似好浪費，就試下用黎炒飯，可作帶飯的飯；我當材料咁玩炒飯，因為咁大個女都未試過自己炒飯！哈哈～～

愛心飯盒～～不過ｄ蛋白好軟身，散晒．．．

2011-06-25 (Sat) 苦茶竟然．．．

今日拎苦茶，返到屋企隻杯竟然．．．穿左！漏晒落膠袋度，一放手．．．膠袋內的苦茶又瀉左出黎，拎得碗黎裝住時只得返半碗！

不過就算係，都唔飲啦，個膠袋咁污糟～～打比醫師，佢話聽朝幫我煲過！