2010-12-17 (Fri) 放假一天：報農曆年滑雪團．行街．龍華酒家做節

今日係太陽哥哥今年的最後一天假期，難得一日假期，行程亦被排得相當緊密！先去KTS報團，講左成年，諗左個幾月，終於成行兼落實啦！

今次報左個真正滑雪團，五日入面滑足四日，直情係滑雪班一樣，所以冇咩朋友仔夾到，唔係咁多人好似我地咁鍾意玩滑雪，仲要係滑足四日，希望到時頂得住！報團位哥哥仲叫我地要開始做定運動，游下水跑下步咁喎．．．

今次係我地＋細妹＋兩位佢的朋友，會一齊住四人apartment，其實突左個位朋友，係我地報緊名時臨時confirm話去既，不過佢又搵唔到多個partner，所以會同埋我地一齊住，希望到時唔洗爭廁所啦！嘻嘻～～

我地揀左初八出發，平過新年年頭個幾日，其實再下一個禮拜會再平ｄ，但細妹佢地唔得，冇辦法啦，一班人去旅行梗係要互相遷就；但亦因為咁，我傻下傻下變左會係韓國過生日同情人節！哈哈～～

再戰 High One，我地黎啦！上次走時講左『 I'll be back 』架啦，真係講得出，做得到！萬分期待～～

報完團趕返旺角會合占美，今日陪佢買 netbook，行完旺角電腦中心，再步行去深水埗高登繼續行，最後係高登揼鎚；我地仲行埋鴨寮街添，真係大開眼界！

今日我地自己都有收獲，終於搵到白兔暖包啦，搵左好多間都冇．．．為韓國之旅做定少少準備啦！

見到資生堂限定版 Hello Kitty 潤唇膏，仲要係 for sale in Japan only 喎，咁好的聖誕禮物，即買啦！

跟住又趕返沙田新城市，約左太陽爸媽做節；我地係新城市又忍唔住行街，攪呢攪路，攪到遲到；諗住截的士上龍華，點知只能去到禾輋，要自己行上山．．．條路好多紅燈籠，有點恐怖．．．

一去到占美就show下佢部 netbook！

影唔到 Samsung 個字．．．

我都有野要show，就係呢度既牙簽！哈哈～～

我地叫左個四人餐，點知唔洗加野都夠晒食！

好豐富的一餐，呢度ｄ乳鴿真係好好食呀！不過可能位置在山上，有點凍呀！

馳名山水豆腐花，其實好好味架，可惜係凍食，呢種天氣．．．唔係幾頂得順！

落山時行另一邊，有個好靚既花園，我地影左好多唔同組合既相！