2010-07-01 (Thu) 回歸假期：赤丸晚飯．馬會攞錢．鎗王之王．許留山宵夜

太陽哥哥只會係公眾假期真係唔開工放假，所以今日公眾假期，我當然好開心啦！尋晚班朋友玩到成兩點先走，我地再睇埋天地豪情先訓，所以今朝我地都昏晒迷咁訓！

尋日已約定休同CW今日一齊睇戲，我地先食晚飯，去左極少去的『赤丸製麵所』：

每人叫一碗烏冬：

再叫左五款小食，呢度ｄ小食細細份，好抵食！

成檯美食：

赤丸其實我OK架，極少去只係因為太陽哥哥麻麻地；但食過今晚，我又覺得野食唔錯丫，價錢又經濟呢！

飯後過隔離馬會攞錢，其實成個月架啦，上個月幾千萬個次金多寶，我地中左三個半數字呀，有$160獎金！其實我極少買六合彩，所以覺得好幸運呢！入馬會時又比人check 身份證呀，已經好多好多次啦！

之後就去睇『鎗王之王』：

成套戲都幾緊湊，ｄ射鎗／鎗擊鏡頭，無論係現實時定係模擬打機時，都令觀眾睇到好鬼緊張；加上亦要推理返成個故事出黎，係一套有野睇又要諗野既戲！不過兩位女主角，好綠葉，換任何一個女人演都得．．．雖然亦有ｄ反駁位，但我覺得都係一套值得入場睇既片！可能太入戲，散場後我都忍唔住要扮搶王玩左陣！不過戲入面古天樂曾話"係佢做, 唔係我呀"，明明係自己但又好似思覺失調咁賴第三者，令我地不期然諗起"旺角監獄"的輝仔，太陽哥哥仲笑到抽晒筋呢！

 

 

散場後再去許留山食甜品宵夜，兩pair人又食又笑又傾計，最鍾意一齊討論某些topic，以輕鬆氣氛交流一下男女心態，令平時的敏感話題了解多左；唔敢話完全認同，但點都有ｄ野拎返屋企既！