2010-05-18 (Tue) 太陽哥哥生日驚喜

聽日係太陽哥哥生日，今年我為佢準備既生日禮物．．．勁囉，係一個超級大既驚喜．．．就係．．．27 吋 iMAC一部！

呢份禮物上個月已諗定同預備架啦，因為只有21.5 吋 iMAC有現貨，27 吋 iMAC要三至四期訂貨，所以上個月已買架啦！仲揀左今日送佢去公司，比個超級驚喜佢！揀今日係因為聽晚正日會同佢放工出街食飯，星期四我地又一齊放一日假，咁如果係今日送，佢咪又可以叫ＩＴ同事幫佢set野，又可以夜晚ＯＴ搭的士時運返屋企囉！係咪好一舉幾得呢？連我自己都覺得超細心囉，呵呵～～

太陽哥哥超驚喜＋超開心呀！氹到佢咁開心，我都好開心同滿足！其實呢個計劃都要多謝Vivian幫手，一來對iMac零經驗既我，真係唔知一個designer要咩型號最好，買左又唔可以退，所以一定要買得岩！其次，就係一早連生日咭都預備埋，仲搵機會"暗啞底"交比太陽哥哥同事們，夾實佢地，一送貨黎，麻煩將咭貼係盒上面先叫佢出黎大門口收貨！Vivian仲拍低太陽哥哥收貨時既movie添，所以今次呢個秘密行動咁成勁，真係要多謝各界朋友既幫忙！所以話呢，要同老公身邊既朋友混熟係好重要架！哈哈～～

生日咭上星期已寫好，今年揀左張有太陽公仔既，一見到就鍾意啦！

打開有立體HAPPY BIRTHDAY字，我仲畫埋個月亮添(但有點樣衰!!)，代表月光妹妹我自己！

因為今晚我都要返PT，所以冇時間有咩其他預備，只能係返工前經過皇后餅店，買定蛋糕今晚十二點切，然後先返工！

放PT後去鰂魚涌join埋太陽哥哥搭的士，因為我到先，梗係即刻上的士啦；而佢掛住拎部大iMAC，我又拎住袋衫，佢完全發現唔到我有個蛋糕！返到屋企，到十二點我就拎住蛋糕係廚房行出黎，又比多個驚喜佢！生日喎，點都要切過蛋糕先似樣架麻！

太陽哥哥好開心～～

許願先～～

切蛋糕～～

自拍～～

琪琪都過黎道賀，咁就好啦，可以幫我地影相，唔洗自拍得咁辛苦！電視上粒星好型呀～～

同琪琪都影返張相先～～