.gif)
尋晚訓得極差，一來屋企無電好擔心，二來半夜大風大雨好嘈，好驚呀！訓下醒下check住幾點，今朝一到六點半，即刻call早更看更上黎再試啪大掣，都係唔得，註定我返唔到工了．．．看更主管好好人，約定我九點半，技工師傅一返工叫佢即上黎睇，我就留守屋企等！
簡單咁報告下啦，技工師傅check到屋企有組線漏電，整返唯有搭條明線；屋企裝修左只係半年，梗係唔想．．．冇辦法，即刻搵返十年前裝修呢度個師傅，同佢講十萬火急，成間屋用唔到電，佢好好人，冇理其他appointment幫我攪左成日，成四點先攪掂；其實係check到電錶箱去睡房冷氣組線有問題，最幣係冷氣組線係搭出廚房廁所騎樓組線的燈掣，所以睡房冷氣組線＋廚房廁所騎樓燈掣組線都唔用得；最大問題始終係ｄ暗線其實都十幾年，要整過晒就要大裝修，但我地結婚時都冇諗住係度住十幾廿年，所以當時只係係咁易執下間屋就住；宜家咁，唔想大裝修的話，要徹底解決，一係整過晒全屋為明線，otherwise，都係頂住先．．．暫時解決方法係，搭睡房插蘇位組線去睡房冷氣組線，從而通返成組電，起碼用住先！但如果再漏電的話，可能真係要全屋裝過晒明線，咁到時成間屋實好似八爪魚咁，分分鐘可能十爪魚添，一間屋咁多電掣喎；到時只能講實用，無美觀可言！冇計啦，希望頂得幾耐得幾耐！
鐵甲奇俠 2 一早同呀仔兩公婆＋呀細(呀仔的細佬)一齊睇架啦，原本約上星期五，點知買唔到飛，改到今日；呢套戲我抱好大期望架，兩星期前仲特登睇返DV D重溫第一集；因為第一集好特別架，係兩年前太陽哥哥泰國生日之旅時睇架，當時見個戲院好grand，仲有大梳化位，就試下係第二個國家睇戲咁啦！不過最後聽唔明，又冇中文字幕，訓左半場，哈哈！
不過對第二集真係．．．失望！費話多過做．．．太陽哥哥都訓左半場，但我唔會怪佢，因為真係好悶，講野位太多太多啦，入得場梗係想睇動作＋打鬥啦！第一集多好多打鬥場面同好睇好多囉，呢集係多左個大"鬆"女助手有兩分鐘的功夫動作，有ｄ睇頭吧；但對比同期既戲黎講，葉問2好睇十倍．．．even Kick Ass我都覺得仲好睇！雖然套戲麻麻，但男主角真係型，今集更甚第一集，連我都心動左！哈哈～～橫睇掂睇一ｄ都唔似福爾摩斯的呀伯look．．．
睇完戲已經十點幾啦，去左上海坊醫肚，宵夜時段，埋單好抵！
呀仔好有表演慾，每次叫佢影相都交足戲！
呀細同呀仔，真係唔似兩兄弟．．．
同朋友一齊，太陽哥哥好開心呢！
沒有留言:
張貼留言