2008-09-30 (Tue) 和民二人餐again~~

琪琪請食飯，威哥原來鐘意食和民，我咪介紹大家去食東亞個個二人套餐囉，短短一星期食左兩次呢！

我地加左杯巨峰提子乳酸，跟住個餐大致上都係一樣，係個雞肉串冇，轉左雞軟骨，仲好味！

二人餐點夠我地食丫，何況仲有個大食威哥係度；我地另外再叫左炸蠔、魷魚燒、鰻魚卷、焗海鮮飯同豬軟骨烏冬！威哥同琪琪傻左咁係咁點係咁點．．．傻既咩，叫咁多．．．最終咪食唔晒囉！

2008-09-29 (Mon) 鼻咽覆診

今日要去威記鼻咽覆診，太陽哥哥陪我去，仲拍埋短片添！醫生同姑娘都勁nice，仲對住鏡頭笑呢！

一路好驚又要好似上次咁插條喉入到好入咁檢查，ｄ麻醉藥都唔多掂既！點知今次唔洗呀，只係係個鼻窿外圍照咋！好彩咋！不過我其實講左個大話，醫生問我上次做完operation後有冇再流過鼻血，其實流過一次架，仲幾多添，當時太陽哥哥仲拎過好幾張紙巾比我先攪掂；但我驚如實講醫生又要"勒"條血管，好痛架麻．．．所以咪話冇再流過囉！唔知係咪咁先唔洗塞咁入檢查呢？不過醫生話一再流血就要去睇佢喎，但我心諗，唔洗咁誇掛？今次咁，檢查幾分鐘都要一千蚊，上次做埋operation就要二千，流一流就去見佢，咪好貴？雖然唔洗我比，但我覺得好貴呀！

因為覆診係下晝，我上晝就請左AL，同太陽哥哥去富豪個邊唱lunch K，因為呢度可claim $16 的士錢，正！唱完K先去睇醫生，嘻嘻~~

 

2008-09-28 (Sun) 好久不見．聚賭家中

 

係 Didi 臨去台灣前，約埋幾位碌齡朋友聚舊，悠悠都有黎呀；距離上次見面，原來都有兩三年啦！悠悠好少喊，只係周圍望觀察下咁，好乖！

我地先係我屋企樓下食小菜，八個人叫左八樣野，每人先係$45，抵！

 

之後大伙兒上我屋企隔離間吉屋玩，悠悠一ｄ都唔怕我，頭先落街食野，由屋企抱到佢去食野個度，一ｄ都冇喊過！睇下，佢仲笑笑口架，仲大字形咁撐手撐腳，唔知係咪認得我呢！嘻嘻~~

 

悠悠都唔抗拒比太陽哥哥抱喎！

只係周圍望下其他人做緊咩．．．

仲挨得好舒服咁喎～～

突然醒起望下邊個抱住自己．．．邊個黎呀？好攪笑，哈哈！

雖然唔係媽咪抱住，但都冇喊到！

 

點知明記一抱就．．．好驚，仲喊左出黎！跟住到健抱仲衰，抱住都無事，但一拎轉頭望到係呀健時，即刻哇哇大哭！

 

好啦，係時候睇下我地一班究竟係間吉屋入面有咩攪喇！就係．．．聚賭！我地玩魚蝦蟹、大細同廿一點，全部都賭錢架！我地好公平，輪流做莊！

我仲用左我係長洲買個副 JUMBO 啤牌呢，影出黎既相好鬼攪笑！

十幾年冇玩過魚蝦蟹啦，原來一班朋友咁玩係咁開心架！做莊大致都會贏，但唔係個個都係架，我都幾好彩，玩廿一點做莊個三舖全開細，個個諗住最後搏舖大點知輸晒，我總贏左四十三蚊呀！Yeah~~