爸爸星期四就會返泰國一個月啦，唔知係咪掛住我地咁，佢今日又叫我同琪琪出去食飯啦！開頭佢話叫我地三個細路既，但我同佢講，叫得威哥好難唔叫聲媽咪喎；講真，威哥都唔太尊重佢，亦唔會好想同佢食飯既，其實叫唔叫佢無咩所謂，慳返仲好啦；但我就同爸爸講，一係唔叫佢，叫佢就都要問聲媽咪，唔係比媽咪知道又唔係咁好啦；我估爸爸個心並唔係話好唔想請媽咪，只係怕出到黎有ｄ拘謹，亦無得同我地唱所欲言啫，佢係口水佬黎架麻；不過最後，爸爸都係叫晒我地一齊出黎！
我地去左金皇朝食，呢餐好正呀，又響螺湯又雞又龍蝦，勁好味呀！
循例都又係影返幾張相啦！
今餐食左七百蚊幾蚊，我覺得幾貴，雖然唔係我比係爸爸比，但我可能知佢收入唔穩定，佢都肯叫成家人出黎食飯，個心係為左聚下見下面，呢個心意係好值得欣賞；但係回家途中，威哥竟然話：七百幾蚊食ｄ咁既野，折現比我好過啦！我聽到好反感．．．我明，威哥對爸爸一向唔尊重，我自己雖未至於好恨爸爸，只可講同佢唔深感情，有咩我一定揀左媽咪先，但我都唔會講ｄ咁既說話囉，過去係過去，都冇得返轉頭，咁可以點？唯有宜家做得幾多得幾多囉，點解要抹殺左爸爸的心意呢？咁唔妥爸爸，間唔中比幾百蚊零用又照收？個口話唔稀罕，咁又照收？生性ｄ可交比媽咪當幫補又得，叫媽咪個個禮拜唔洗比零用又得，但冇喎，每次只會jer一聲咁用埋．．．唔鍾意威哥咁樣同口不對心．．．
跟住，我忍唔住講左件事出黎，其實係細妹早前同我講既；細妹一向同爸爸close好多，爸爸亦會講好多野佢知，好似朋友一樣；原來係新年時，爸爸因為冇團帶的關係，曾經過過段好艱難既日子，銀包仲只係得返二百蚊，最後就去左機場幫人搬野賺三百蚊，其實我都唔知算唔算做"姑里"？爸爸同琪琪講，一路搬一路流眼淚．．．嘩，幾唔鍾意爸爸都好，個刻我聽到都好心up，個心好唔舒服．．．試問邊個人知道父母做ｄ咁既工作會開心？點都好，佢都係我親爸爸呀！
我講呢件事，係覺得爸爸收入不穩、冇積蓄，攪成咁，可能真係佢個人選擇問題，但起碼我睇到，當佢有收入時，叫我地食飯都唔會吝嗇，睇得出佢係真心想一家人齊齊整整咁食餐飯聚聚；點解要咁負面咁話佢，唔正面咁諗下佢的心意呢？
沒有留言:
張貼留言