今日係旅程最後一日啦，住左幾日都仲未試過去酒店泳池游水，我地就計劃今朝一訓醒就上去游！先試過按摩池先，我仲專登帶埋雪糕同益力多上黎影返ｄ嘆世界相呢！
扮野擺甫士相都玩一餐！
咁靚既view，咁開心既moment，冒住相機跌落水的危機都誓要影到合照留念！
好清既池水呀，無人游，成個泳池好似屬於我地咁，冇人爭，正！
呢兩張功夫相笑到我扒低呀！哈哈！
泳池合照當然都要有啦！我地玩得好開心呀，我教太陽哥哥玩左個遊戲，其實係細個爸爸教玩既：將ｄ野拋落水，每人拋一次，然後鬥快潛落水執返，以前通常用銀仔或者locker鎖匙；但我地乜都冇帶上黎，就用我紮辮的橡筋喇！真係好好玩呀，不過玩幾轉就喘晒氣啦！
晒下太陽先~~
WOW～～WOW～～
游完水後我地就返房沖涼執野，跟住check out！之後醫肚，去左識講潮州話個位婆婆檔海南雞飯食多次先〔THB40〕！
之後發現過幾檔有間好野，即刻入去試下先！
有中文餐牌呀，好勁呀！老闆娘係大廚，識講中文，好好客，又介紹話炒ｄ咩比我地試，同我地好好傾！點解住左咁多日都唔見呢間舖呢？原來佢地逢星期六休息，星期日我地又一早去左翟道翟，尋日星期一原來係泰國公眾假期佢地又休息，咪今日先見到囉．．．早ｄ見，我相信我地一早黎左，因為老闆娘炒野真係好勁，有鑊氣兼好好呀！
炒緊我地碟炒蜆呀！
炒菜炒成咁有火氣，您話犀唔犀利丫？我都話勁架啦！
我地叫左炒蜆、炒通菜、炒河粉〔共THB122〕，樣樣都好好味！
之後我地想食芒果糯米，黎左幾日都未食過！於是太陽哥哥就去搵，我就去M記等佢；呢間M記我地黎左好幾次呢，避雨啦、醫肚啦、hea啦、度行程啦、打瞌睡啦(我)等等．．．嘻嘻~~
好大盒呀〔THB70〕，貴左少少，芒果亦酸左少少，反而個糯米一流！
夠鐘去機場啦，我地返酒店坐的士，好唔捨得呀．．．同太陽哥哥都唔知講左幾多次．．．咁多日都未影低酒店外貌，差ｄ唔記得添！
連埋highway的士費共THB295，平過去程呢！我地早到左，好少人排隊，好快就check in 完啦！
一入到禁區就見到呢個好金既展覽！
又見到jumbo珍寶珠啦，拎上手，咁輕既？咁點解 Loft 個次咁重既？睇清楚就明啦，原來呢款係個珍寶珠盒，入面裝有十五支正常size珍寶珠；而 Loft 個款係真係一粒大糖，所以先咁重！如果買，當然買盒呢款啦，唔怕食完就冇晒，又可以refill！不過最後我都冇買呀，一來怕除左包裝紙後個盒唔知咩樣，二來冇左包裝紙又好似冇咁得意，三來始於貴左ｄ唔係咁抵咁．．．唯有影多幾張相做個紀念啦！
我地行到去機場一個未開放的盡頭，呢個位太陽哥哥話好似時光隧道呀！
唔夠高踢唔到盞燈添！
坐低食個熱狗餐，用埋餘下既泰幣！
泰國呢個新機場，有時間慢慢行下，其實真係幾靚架！
去到 F6 登機閘口啦！
等左半個鐘，飛機泊埋黎啦！
睇住個行人隧道慢慢伸長去飛機度，跟住吸實架飛機，呢個情景我覺得好攪笑呀！跟住好多卡車駛埋去，應該係運送物資；第一次睇晒成個過程，原來咁多野要攪既，等到我地丫．．．
起飛時都天黑啦．．．飛機餐我地每次都唔會叫埋同一樣，咁就可以兩款都試晒啦！
四天旅程好快就玩完啦，真係好唔想返香港返工，我好唔鍾意短程旅行呀！雖然呢四天只係行下街、食下野，冇咩好震撼好特別既景點去過，但一個悠閒、唔需要趕頭趕命的旅程，真係令我好relaxed同無束縛，又係另一番感受！
沒有留言:
張貼留言