早上起身後，我地揀左食地道麥記早餐〔共THB200〕，原來泰國既早晨全餐個飽係bun而唔係muffin黎架！
註：黎呢度食早餐，梗係有原因啦，但太陽哥哥當然被蒙在鼓裡啦，我黎就係要．．．買蛋糕！食完早餐後我話肚疼要去廁所，太陽哥哥就度下今日行程；根據酒店職員的指示，即刻衝去地庫個層，真係有cake shop呀，勁興奮！但過程都花左好多時間，因為我要問好多野：可寫字係蛋糕上面？蛋糕上面的公仔可轉嗎？幾時攪掂？可送貨嗎？（我尋晚問左酒店職員，如果cake shop肯送貨，佢地可幫我keep起等我返酒店再安排）．．．寫字冇問題，即刻寫到，但又要度點寫，佢話我太多字喎，我咪教佢點排ｄ字等等；至於公仔，唔可以轉過對一男一女，唯有接受現成的動物公仔，激死！送貨．．．NO！一係加錢丫？都係NO！唯有問定佢地今晚幾點收舖，到時又諗計同太陽哥哥返黎囉．．．
總算攪掂，即刻返去蒲頭！呢個過程其實真係非常緊張刺激，因為未黎過，情景冇得想像，但總算得到自己想要既野，希望今晚順順利利！
今日行程係去好出名的全亞洲最大的翟道翟跳蚤市場，只係星期六日先開架咋！我地諗住如果同tu tu司機講到價同sky train差唔多，就坐tu tu；我都識ｄ泰文單字，我係度講呀講，又係地圖上指呀指，最後爭取到超優惠價去目的地〔THB50〕！
應該要百幾蚊價，但點解咁平？因為tu tu司機想途中車我地去兩間舖頭，佢當帶遊人去有錢收架喎，只需入去兜個圈唔洗買野，幾分鐘就得；既然win win，我又冇咩損失，梗係制啦！最攪笑係全程太陽哥哥唔明我地講緊咩，估唔到我ｄ泰文原來係咁勁，哈哈！
同tu tu司機好快熟絡，佢仲比埋電話我地，又話比我地知佢每日早七至晚七都會駐係商場外面；我當然受落，因為佢呢架tu tu真係好舒服，梳化位好新，最緊要係超新淨！咁colourful既tu tu，當然要用作佈景板啦！
翟道翟跳蚤市場街頭，真係好多遊客呀！
小朋友係街頭賣唱，吹得掂呢舊樂器，真係好叻仔！
街頭的promotion，sales姐姐頭上戴住個心心頭箍，好特別呢！
翟道翟跳蚤市場真係好大好多舖頭，但賣既野其實差唔多，好似一百條女人街加埋一齊咁；但呢度縱橫交錯，行時要好小心，唔係好易迷路；同埋呢度有好多個部份，行亂左就唔記得自己行到邊度架啦！
好想買呢度ｄ得意頭箍返去香港halloween時戴，有ｄ角好鬼巨同好型架，但都係費事晒錢！
又熱又多人，我真係頂唔順，要坐低抖抖食個lunch先！呢間小舖頭好多人，個個都食一碟叫pat thai既炒麵，我地亦唔例外！
pat thai〔THB50〕、lemon tea〔THB20〕、湯麵〔THB30〕、豬肉丸串〔THB5〕；pat thai勁好味，豬肉丸串就超抵食，為起港幣個幾一串有五粒！
我既收穫：吊帶裙〔THB280〕、蜥蝪〔@THB10〕，用黎整古人，一流，正呀！嘻嘻~~
行到大概下午四點，我地就回程，諗住返酒店游下水；入左sky train站後，發覺要轉兩程同要坐好多個站，都幾麻煩，最終返出黎截的士算啦〔THB120〕；諗返今朝坐tu tu只係五十，真係好平喎！
我地梗係冇直接返酒店啦，我同太陽哥哥講想買野飲，順道睇下supermarket有咩野食買返香港．．．嘻嘻~~ 其實就係為我攞蛋糕舖路！
點知我地係supermarket，又真係掃左好多泰國公仔麵呀，係太陽哥哥自己話要買架咋，話以前食過好好味喎；好呀，買多ｄ仲好呀，越大舊越好，我就可以收埋我個蛋糕都唔覺啦！
當時過程又好緊張刺激架，比錢時，beep完第一袋野後，我就拎起，同太陽哥哥講話想睇下個food court有咩食，佢就繼續等beep其他野同埋單；一離開太陽哥哥視線範圍後，我就即係兜過food court跑去cake shop，以最快速度拎左蛋糕後，放係袋野最底，跟住即刻返返轉頭，仲要扮晒若無其事咁係food court行返出黎，太陽哥哥就岩岩行入黎food court搵我，我仲講句：都冇野野食既！
嘩，絕！不過真係險過剃頭，哈哈！當時場面真係好攪笑，其實我個心個刻不知跳得幾快呀！返酒店途中，佢當然冇察覺我拎住個袋supermarket野，其實係有個蛋糕係入面啦！
返到酒店後上頂樓泳池，呢度真係幾靚喎，個view好正，估唔到間酒店有個咁靚既景！
但我地最終冇游到，好攰想訓覺多ｄ！返房執拾今日買既野先，個蛋糕亦要諗計收埋係雪櫃度，唔係就會比太陽哥哥發現，其實我有諗過交比酒店，等十二點叫佢地敲門，但諗諗下，都係唔靠人，想自己一手包辦，同埋叫人敲門呢條橋好似麻麻，哈哈！我仲成功地偷偷問到bellboy借來打火機，仲有切蛋糕用具，仲係好grand既水晶手炳添．．．一切準備就緒，好緊張呢！
訓醒後，我地去左旅遊書推介我地住個區出名的海南雞飯店，呢度個湯係加左青檸既，同平時個ｄ好唔同架！不過呢度離酒店都有ｄ遠，行左成十五分鐘先到！
我地叫左一碟海南雞加雞腎，呢度ｄ海南雞真係好好味呀〔全餐共THB156〕！
之後我地慢步行返酒店個頭，消化下就再食魚翅同燕窩！
呢間街頭魚翅店胡慧沖介紹架，唔係都唔會亂試啦；呢度ｄ翅有400 500 600三種，我地揀左中間THB500試下，即叫即煮架！
一窩可分到兩小碗咁，算唔錯啦！
燕窩就分100 200兩種，太陽哥哥要我食靚ｄ，就揀左THB200；但麻麻地，覺得晒左錢添，其實胡慧沖冇介紹呢間燕窩店架，只係我地見佢開正係魚翅店隔離，又見ｄ人叫開兩樣都會食，咪跟囉，點知．．．都係唔好亂試野！
跟住返酒店，準備我精心預備的大project！先佈置好小檯面先．．．
跟住．．．睇片啦！私人對話當然cut左啦，嘻嘻~~
點起ｄ燭光好靚呀！又話吹唔熄蠟燭，枉我特登去買，點知咁容易就吹熄，諗住玩謝太陽哥哥架麻，個sales當時仲同我講，話點大力吹都吹唔熄，要浸落水先熄架喎．．．車．．．哼！
我預備的兩份禮物同自製的生日咭，太陽哥哥都相當受落呢！好野！
囝囝當然唔少得，咁遠水路帶埋佢黎，就係為左呢幕，快ｄ祝daddy生日快樂啦，哈哈！
一家人係外地旅行過生日，咁難忘，梗係要影全家福啦！
今年係太陽哥哥三十年來第一次係外地過生日，我好開心可以安排到；但亦因為係外地，好多野我都做唔得足，有少少瑕疵啦！但見到太陽哥哥咁開心，我都好開心了，亦好有成功感呢！今次係我咁大個女攪得最神秘的一個生日了，太陽哥哥超奇怪我點搵到個蛋糕出黎，仲懷疑過我係咪係香港帶過黎，當然冇可能啦！佢係咁追問我，估唔到我可做咁多野佢都唔知情咁話喎！
沒有留言:
張貼留言