上次同表嫂去完R66後，佢就再約我地今日去The Park Lane既Cafe One食lunch buffet，話請返我地喎，真係客氣喇！
今日又有笑話發生：媽咪同威哥遲黎，佢地黎到我就指住媽咪問Natalie，知唔知佢係我邊個呀？"媽咪！" 跟住我又指住威哥問Natalie，知唔知佢係我邊個呀？Natalie好細聲係我耳邊講：爹地．．．哈哈！真係笑死我呀！！
唔通真係異性相吸？Natalie都好"痴"威哥，而威哥亦難得一見咁好溫柔同細心教佢打機，唔．．．今日威哥都令我對佢改觀呢，睇黎佢都幾有潛質做舅父，不過，我懷疑佢都係對女仔好ｄ，但我想生仔喎，點算呢？哈哈！
今日係跟太陽哥哥的一週年紀念日，原先諗住weekend時過澳門玩的，章程都拎埋，但怕熱的我臨時又十五十六，最終我地都係決定留係香港，去食buffet刷餐勁既！旅行就計劃九月／十月尾去台灣／泰國補祝返，希望到時冇咁熱啦，最重要係請到假，計埋之前已計劃好的年尾北海道之旅，真係好期待呀！
講返今日呢個大日子，第一餐係凌晨的宵夜，原本諗住買蠔仔粥同糖水，點知兩樣都打烊了，唯有揀車仔面，個人開心胃口大增啦，食完都唔飽，仲食左朱古力mini poppers，零食．．．第二餐就係麥當奴早餐，講左成個幾月都食唔到，我放假佢又要返工，到禮拜六日都係被睡魔打敗！今日終於食到想食好耐既薯餅啦！
之後返左屋企，因為我要拎前幾日整好個張咭，唔記得帶．．．太陽哥哥尋晚一到十二點就比左佢整個張比我，奈何我個張漏左係屋企，激死！
點知佢未睇已經踢爆左知道張咭係我自己整的，有冇攪錯！佢就話係我掛住同我媽咪傾偈時，佢係我書檯見到有本自製賀咭的書，就拎左黎睇，由於我貼晒post-it，佢連個款都見埋，真係．．．無癮！
雖然係咁，但佢都好心急想睇完成品；一如所料，佢對我張咭的製作過程好有興趣，應該都幾鐘意，佢知我level，都唔會點高要求既，佢仲話一個人唔整開呢ｄ野要佢整真係好花時間架！不過個整信封笑話，真係好好笑，笑到成車人都聽到呢！
之後去左旺角行街、食野、影貼紙咭，我地仲未買野比對方，因為大家都諗唔到呢期有咩需要，但太陽哥哥話今日少少野都想買比我，我就揀左chip n dale最新的schedule book，入面真係好colourful好靚呢！
貼紙咭影左兩張，第一張係右邊，影完覺得好唔靚，所以再影過，第二張好ｄ啦，起碼比第一張同上個月那張靚！
六點半就到左九龍酒店，呢度好多野食，生蠔之餘仲有長腳蟹，個位仲有把專剪長腳蟹用的較剪呢，真細心！
熟食的食物都幾特別，唔係求其ｄ炒野焗野，較為特別係魚翅、鵝肝、海蜇同即焗梳夫厘，仲有麵檔的那個湯係經特別"Ｒ製"架，係另一煲野入面一路興住，淋落去時有一ｄ白色獻汁的物體，唔同平時用返煲清湯當湯比客咁，好好味！
嚴格黎講，我覺得呢度既食物款式同滿足程度，仲好過貴格的shangri-la！下次一家人黎食都係一個唔錯的選擇！
在地鐵站看到的新潮流動機，吸引到我注視係我隱約"哨"到熟口面的張小嫻新作，一望之下見到係部機入面，先知宜家ｄ流動機in到連書都可以"禁機"，唔知大家見過未呢？希望唔會有人覆我話已經出左一段時間，唔係我實會覺得自己out到爆！
今日睇了"五星級大鼠"，真係冇揀錯，好好睇，畫得好靚好靚好靚．．．又有ｄ意義帶到比小朋友，今日上畫，好彩一早買定飛，好爆棚呀！
到真碌齡喇，為左拎返係wii失去的面子，今日歇盡所能，拎到好耐都未試過的高分數！
Didi回流了，一早約左佢同欣今日見面！我就提議high tea，因為咁大個女都未
試過！最後大家決定一係唔去，要去就去盡ｄ，就揀左全香港最high最多粒星的．．．六星級four seasons！今日先知洲際同半島只係五星級咋！
比得起錢果然服務係唔同ｄ，侍應好好禮貌，一開口係講英文的，但其實個個都識中文的，哈哈！環境亦好有氣派，周圍都流露住六星級風範，但恕我不能跟大家分享太多，因為鐘意影相的我，亦唔敢周圍影，費事失禮呀！哈哈！！所以只敢影係我地檯的範圍以內咋！
質素高就咩都講究ｄ，侍應會先問您飲咩茶，有成十幾種揀，我就揀左人氣之選的signature blend綠茶；都幾驚試架，因為我唔鐘意綠茶味的，但唔同一般的綠茶味，真係幾好味噃！飲茶的講究，就係有個銀色的小型隔茶葉器擺係度比您用；茶仲有係每人一壺的，咁多壺，其實都幾"阻訂"的，但後尾先知，呢度茶位係斷人頭計的，所以咪．．．早知係咁，我地三個就叫三種味，互相試吓麻！ 〔節錄於美食介紹：四季特色招牌綠茶，是茶商專為四季調配的，味道清新，並散發雲呢拿香，配甜點最好。〕
我地叫了二人份的high tea：底層係蟹肉芒果芝士puff、三文魚千層酥、忌廉puff、各式三文治；中層係原味鬆餅同提子鬆餅；頂層係Tiramisu、Fruit tart、紅莓tart、朱古力肉桂卷。這裡的鬆餅鬆軟香甜，秘密武器是時間，師傅在預備材料、拌麵糰和烘焗竟用上三天炮製，到下午茶開始前才焗，吃時暖而不燙，塗上clotted cream和自製果醬，香甜鬆軟，天下美味。〔甜點名稱及鬆餅製作節錄於美食介紹〕
呢度既甜品係無限添加架，每隔一陣，侍應就會捧住盛滿多款小甜點的銀盤過黎添加！為左大家睇清楚ｄ甜品，連埋後尾添加個ｄ，我每個當晒佢地係model咁，逐粒逐粒黎個close up！
夜晚跟太陽哥哥係朗豪坊見到的simpsons，今次係第二次見到，上次係六月時APM戲院入面，搵返張相，發覺隻公仔係一模一樣的，只係background唔同左，一個係屋企，一個係戲院，唔知係搬左過黎，定係本身有兩隻既呢？兩款個idea都好得意，不過我會鐘意屋企個款，因為好colourful！
"願我懂得珍惜您"．．．到您講出呢句時，我諗一切已太遲了．．．所以，係自己還有能力控制時，記住要珍惜身邊疼錫您既人呀！
今日太陽哥哥送了我張小嫻的係書展最新推出的小說，好開心！好鐘意封面上的少女素描，畫得好靚！上一本覺得非常麻麻地，不論封面和內容，老實講，令我對張小嫻失了信心呢！希望今次唔會啦，如果唔係，堅持買佢的長篇小說作收藏的信念，我怕會動搖呀！
今日的起心肝，再唔動手就趕唔切啦．．．大家估唔估到咩黎？
就係一張親手做的咭，因為過幾日係同太陽哥哥的一週年紀念日，之前每個月都係買咭比佢的，發覺不太重文字既佢，通常睇完就算；到上個月臨時臨急我冇信封，自製了一個，誰知佢好有興趣，係咁研究，果然係design人．．．今個月，唔重寫野，重設計，佢整的咭我就收得多，希望佢會鐘意我整比佢呢張咭啦！但自己就覺得麻麻，好似幼稚園小朋友的手工多ｄ，細妹仲話：冇辦法，呢個係您level！激死人！
