丁媽媽

2007年4月15日星期日

2007-04-15 太陽爸爸的晚餐

今晚食太陽爸爸煮既晚飯，賣相就冇太陽媽媽咁勁，但都幾好味架！見佢好主動一手一腳係廚房度忙，我諗起"背影"課書，所以偷影了．．．太陽爸爸煮飯我食，有溫暖，有感慨，溫暖係有一位爹地係廚房好忙咁預備一餐飯我食，感慨係我由細到大，好小有呢個機會，所以我好欣賞佢架！總之好開心好溫暖，簡單的一餐飯，但出自一位爹地手，我會特別感動，因為我好渴望有一個完整既屋企，完整既家．．．

印象中，爸爸係我地好細個時，係好間唔中媽咪唔得閒時先煮過飯比我地食，仲好似係全蛋宴，蛋花湯，炒蛋．．．哈哈！但係我腦海，呢ｄ飯真係一餐起，兩餐止，宜家諗返，雖然佢廚藝並唔精湛，但餐飯原來係咁珍貴既．．．幸福真係唔係必然，有好多野亦不能強求，我真係好羨慕身邊朋友既幸福同齊整既家庭，大家真係要好好珍惜呀！

2007年4月14日星期六

我的好朋友Tracy又返香港了，上次是上年七月，時間真係過得好快！其實佢今次係因為有job interview先返黎，真係型爆，飛返黎面試！其實我真係好希望佢會成功，因為我好想係佢返香港呀，呢個係佢中二移民後我一直既願望黎架，哈哈！但佢竟然同我講，好彩請佢的話，佢都未sure係咪真係返黎，激死！我同呢位朋友由小二就識架啦，一齊上到小六都係同班，到升到同一間中學，中二佢移民後，個時都未有ICQ/MSN/EMAIL，我地係靠書信維繫住呢段咁長久既感情架，所以，我地互相都好重視對方！所以每段關係，真係要有心先可長存，仲要係雙方面呢！

除左同Tracy之外，我仲有幾位咁多年都好要好既小學同學，最close就係Jacky同 Tony，今晚原本我地四個約好一齊食飯，點知叫下叫下，都多左兩三位朋友見下面咁！so sweet！令我諗返好多細個既事，屈指一算，識左超過二十年呀！好勁，仲咁大班人！由天真無邪既小朋友，一齊成長到今日搵錢養家，甚至談婚論嫁既階段，真係好難得．．．so magical！

今日飯後，我地上左Tracy屋企睇相同傾偈，真係好溫暖！我地仲一齊打電話比小學的黃老師，約定佢一齊係星期四同我地食晚飯呢！好緊張呀！六月尾係我地小學校慶，黃老師仲叫我地幫手，我就負責聯絡下ｄ同學仔，主要係收集返大家宜家既工作概況，因為遲ｄ學校會成立校友會呢！

2007年4月13日星期五

2007-04-13 新出的"御前杯麵"

新出的杯麵，賣相幾好，又多味道，仲係特別少有既味，好似新加坡喇唦味，韓式泡菜味，泰式冬陰功味．．．最重要係．．．平，十二蚊三個，百佳有售，想試就趁手啦！

2007年4月12日星期四

2007-04-12 Surprising gifts!

今日唔知咩日子，竟然收到兩份禮物，真係開心喇！一份係Michele送既Chip n Dale 曲奇，一份係太陽哥哥送既麥嘜匙扣！兩個人都係話冇原因架，見到知我鐘意咪買比我囉！嘩，我好幸福呀！

曲奇餅外形係一粒好大既星星，我覺得自己好似攞獎咁，我就當係自己工作表現好既星星大獎架啦，哈哈！謝謝 Michele！

至於麥嘜匙扣，其實係有次行街見到，覺得好得意，其實我只鐘意菇時同阿輝，但奈何奸商把佢地分開了賣，問個sales又唔可以調換，要買晒兩盒喎，咁個四隻咪多餘同變相好貴囉？！所以當時我就即刻放棄左，後來太陽哥哥就買返黎送比我喇！我覺得唔抵呀，因為宜家佢既錢係等於我既錢架麻，有ｄ肉痛，哈哈！不過都好開心，因為佢地細細隻，好得意好cute，我先咁有心情同佢地攞pose咋！

2007年4月10日星期二

2007-04-10 肥妹仔琪琪牛一

今日到肥妹仔生日，都係出街食，去左稻香打邊爐，太陽哥哥就負責買蛋糕！個蛋糕琪琪似乎好鐘意，影相時興奮得滯，點知ｄ生果飛晒落地，有相為證呢！

個生日快樂旗仔好得意，我地傻到插落琪琪個頭度影相呢！

2007年4月8日星期日

2007-04-07/08 廣州長隆+碧桂園兩日一夜遊

計劃左一段日子既長隆之旅，終於係復活節舉行了！老實說，今次參與的人數並不多，但唔理了，都攪左咁耐，要去馬呀！！！

行程第一天

0815　黃崗集合 - 誰知呆等一小時，因為BEN竟然仲訓緊覺！

0930　搭旅遊巴直上廣州 – BEN要自掏腰包買過晒ｄ車飛

1200　午飯

1330　抵達長隆

1930 大馬戲

2300 碧桂園BEN家兼晚飯／宵夜

行程第二天

1200　起身梳洗

1500　上下九步行街飲茶

1800 乘廣深線火車回深圳，超多人！

1930 東門美容

2200 過關回港，超超超多人！

2230 BEN駕車上水接我地，呆等左我地一個鐘，去左火炭津津食雞粥

今次有好多難忘時件發生，BEN訓過龍啦，唔係我打去佢屋企都唔知幾時先識醒！至於長隆遊樂場，最難忘既機動遊戲係摩托過山車同十環過山車：摩托過山車好型，坐住我至愛既電單車一樣，速度好快，最攪笑係面向鐘頭笑住影相時，突然"BOMB"一聲開始，成個人好似差ｄ向後飛出車咁，全程好驚好驚，係咁叫，其實係個速度好快先咁驚，本身條軌道都冇咩勁位；十環過山車就真係好多環，係咁狂轉，都幾刺激，落返地面腳步會浮浮地呢！

其次就玩左洗衣機，比ｄ醜態大家睇吓啦，仲有4D立體影院等等！

至於全team人最勁，就係BEN同琪琪喇，因為淨係得佢兩個夠膽玩一個好得人驚既遊戲，好似叫ｘｘ大陀螺，我只可以講係勁過海盜船十倍，睇movie就知！

另外有個好賤既射水遊戲，路人係可以比錢入機，每次一蚊，就可以有大概廿秒既變態時間，用水射玩緊遊戲經過既人！雖然玩緊遊戲既人都可以反射返出黎，但唔知係咪唔使入錢免費既關係，ｄ喉好似塞左咁，出唔到水乜滯，所以結局都係．．．凶多吉少！大家睇睇短片啦，真係好變態，又賤喎，但又真係好好笑呀！不過我發誓我冇份玩架，因為實在十個賤賤賤，我冇咁變態．．．其實原本係BEN同ALEX入去玩，點知比KAREN係出面狂射，KAREN又點會忍心射自己老公ALEX呢？所以遭殃既都係BEN，佢出到黎全身濕晒，頭都未抺乾咁，我諗佢連底底都濕埋！為左氹返BEN，KAREN就換了十個一蚊被BEN發洩返當報返仇啦！不過呢個方法，見仁見智啦！哈哈！

至於大馬戲，一向興趣麻麻，驚入面好臭，但長隆大馬戲聽過好多人講話好得，一百蚊到既價錢值得睇過幾百蚊既莫斯科馬戲團好多！

最深印象係三個大鐵環既表演，三個人好似倉鼠咁轉黎轉去跳來跳去，仲係冇安全措施既，真係睇到個心卜卜跳，好驚險呀！

完場後勁多人，我又勁急尿，但條人龍睇怕要排成粒鐘先到！呢個時候，我做左一件咁大個女都未試過兼好大膽既事，就係．．．入男厠！其實係太陽哥哥叫我既，因為我真係十個勁勁勁急，唔係咁，都唔會行呢一著！佢搭住我膊頭，叫我望住地下，跟住佢行就得！最後我地行左入最入個格，我拿拿聲去完就閃，真係成個人舒服晒，係成世女暫時去得最舒暢既一次！真架！！不過真係無人發現，其實個個都掛住屙，又咁多人，得鬼閒望您，所以各位朋友，下次遇到呢個情況，不妨參考我今次既做法啦！

BEN屋企好大好靚，係比個煤氣爐玩死姐，一係好凍，一係熱到劏雞咁，沖涼沖到好辛苦呢！有興趣大家可效法BEN屋企人，買黎間唔中for返上去渡假！

第二日訓醒後去左好旺既上下九步行街食午飯，個度真係好多人，仲有兩個好大既王老吉同枇杷膏呢！BEN山長水遠，一心諗住帶我地去陶陶居，點知勁爆，唯有轉去蓮香樓，咁辛苦黎到食唔到陶陶居都有ｄ失望．．．

不過大陸食野真係好抵，叫左十四碟點心加兩個小菜，埋單都係二百蚊！但其實我地得四個人，叫太多了，最衰都係BEN，發晒狂咁！我個人覺得最好食係鳯凰流沙飽，個包皮溝埋蛋黃汁整架，好正；仲有香脆金沙腸，脆卜卜，好似炸兩咁！兩款都係推介黎架！芝士海鮮酥，聽個名就流口水啦，可惜賣晒，試唔到！最被昆應該係蟹柳紫菜卷，我以為係炸，點知．．．難食！