2007-08-16 (Thu) Balalaika Russian Restaurant

睇張相係咪好得意呢？係餐廳綱頁見到的，而就係咁得意，加上又有朋友生日，就一於去試下呢間俄羅斯餐廳；其實細妹好耐之前試過，話係零下二十度冰室影相好好玩，今日終於試到啦！

呢個係餐廳正門，原來個冰室應該叫"Vodka Freezer"

簡單特別的餐廳menu

由於大家都係第一次黎，都唔知叫咩好，就決定費事煩，叫個Dinner for Two，個set仲有甜品buffet呢！

串燒好特別，侍應生每次都會捧到您面前點火，跟住會一齊拍手，然後切件上碟再上檯；另一特別係餐廳的一男一女俄羅斯人，除了一路係台上唱歌外，間中亦會為每張檯獻唱，多人的檯仲會比ｄ"查查"食客一齊打拍子添！

食完個set唔算好飽，剛剛好啦，望住個甜品區，心郁郁；望住個冰室，又心郁郁，好想快ｄ入去影相．．．揀邊樣好呢？

最後都係揀左影相先，因為有好多件皮草，我知自己實唔止影一次(大家宜家可以估下我一共試左幾多件呢？)加上又可落下格，一陣先食甜品！

其實開頭都掙扎好唔好著ｄ皮草架，因為我係一個好怕污糟既人；但一心黎到，唔影咪好唔抵；後來經我一輪觀察後，發覺黎呢度的人鬼佬鬼婆多，佢地大都著晒西裝，尚算光鮮；其餘的人都著得乾乾淨淨，非常整潔！

入去喇~~

第一件全黑色皮草

第二件棕色皮草

出黎睇返ｄ相，發覺由於ｄ皮草好大件，影得個人好肥呀！女仔梗係靚字行先，我就挑戰自我，揀左件雞翼袖皮草，由於呢款係只for girls only，size真係細件ｄ，亦係我全晚最愛的一件皮草！不過，佢亦係令到我最凍的一件．．．係勁勁勁凍個隻呀！

第三件黑色無袖皮草（咪見我笑得咁開心，其實真係凍到入心入肺！）

第四套黑色暗花皮草

由於拎酒樽的pose已擺了多次，有ｄ悶了，我地就諗住扮下飲酒look，但不擅扮野的我，擺極都唔似，變左有幾幅好爆笑的相出左黎，友人話我似吹喇叭多ｄ(右上那張)，哈哈！大家覺得似嗎？不過又要扮又扮唔似，但又想繼續影到似為止，我ｄ手指真係凍到硬晒彊晒，出黎仲震震地，要即刻入洗手間洗手，ｄ水好似暖水咁呀！

掛住show皮草相比大家睇，差ｄ唔記得講ｄ甜品添！甜品區唔係好大，亦唔算好多甜品，不過裝飾幾特別啦，尤以個大煎PAN，幾得意！

梳夫厘並唔係任食的，每檯只得一客，一影完相出黎就發覺放左係檯面，由於影完相出黎會好凍，一食呢個暖笠笠又軟綿綿的梳夫厘，真係覺得好好味呀！另外我覺得唔錯係ｄ pie tart同好似春卷的班戟！呢度ｄ甜品似乎好味過主菜呢！

呢度有得食又有得玩，真係唔錯！最開心係第一次係零下廿度的地方著皮草影相，仲係任試任玩個隻喎！抱住有殺錯冇放過的原則，加上狂影實有張靚既道理，就好似同BB影相的方法一樣．．．今晚共影左百幾張相，勁！經我細心揀選後，以下兩張係我最鐘意的相，好似雜誌上的model呢！哈哈！

2007-08-15 (Wed) 太陽哥哥的新drawing

太陽哥哥給鬼佬肥老闆點名要佢畫肖像，其實佢好唔鐘意被迫，冇感情都唔想畫，又唔係畫我，哈哈！不過係老闆開口，冇得推．．．仲有另外一個大大地粒的鬼婆又話要，唉．．．真陰功，都唔知應該可喜定可賀！

2007-08-14 (Tue) 味千晚飯 & 阿森攤位遊戲

今日放工後陪細妹去買波鞋，之後約埋太陽哥哥食晚飯，周圍都好多人，等左好耐呢．．．

食完玩商埸的阿森攤位遊戲，我地有兩個game，細妹怕羞唔玩，就幫我地拍movie！

五個圈入面我地各自都拋中一個圈，係最細份的安慰獎，阿森扇子一把；玩完睇返獎品表，原來兩個圈會有阿森杯墊，三／四個圈好似會有爆谷機／唔知咩爆谷機套裝（撈亂晒，唔記得！）最吸引係爆谷機．．．早ｄ見到就會努力ｄ啦．．．不過好多圍觀人，都幾大壓力！女仔黎講，有份獎品拎走都不錯了吧？

2007-08-13 (Mon) 包裝好靚的義美朱古力蛋糕

前幾日經過"新台場"見到的義美朱古力蛋糕，我未見過呢個款，只買過原款包裝的那款；以為係新出品，但售貨員姐姐話唔係新產品，呢隻同原款包裝分別係重ｄ朱古力味，喜愛朱古力味的我，合晒我心意！

最喜歡個包裝好靚的盒，好貼題，好match：黑色盒突出到重朱古力味；一隻隻黑色魔鬼仔烏卒卒既凸面設計，好鬼死cute！價值 $28 一盒。

2007-08-12 (Sun) Celebration of Elsa's Birthday

今日預先慶祝好姊妹Elsa八月生日，拉大隊去Neway唱K，買了Elsa最鐘意的Hello Kitty蛋糕，影左好多相！壽星女傻到要我叫侍應哥哥比ｄ保鮮紙佢帶隻Hello Kitty返屋企，要雪係雪櫃喎！哈哈！

男子組

女子組（女仔貪靚ｄ，所以有左、中、右三個角度，嘻嘻！）

大合照

原來Lunch K 係咁抵，唱足四個幾鐘，只係計飯錢咋；不過要咁早起身，好難頂呀！但多得各位兄弟姊妹肯甘願為我改期，真係唔好意思呀！

2007-08-11 (Sat) 示範單位 & 導火線

尋晚係第一次同琪琪一齊係太陽哥哥屋企留宿，今日起身後同埋太陽媽媽一齊去食早餐，四個人叫左三碟炒粉麵，好味呀！

之後去左睇示範單位，係係正太陽哥哥屋企隔離的一個居屋單位，係政府的"出售剩餘居屋單位計劃"其中的一個屋苑，個度睇落我都幾鐘意，但買一層樓，唔同買玩具，真係要好多方面認真考慮！返到去我地都有詳細咁睇資料，仲比琪琪影左相添！

夜晚返青衣城同媽咪食晚飯，幾個星期都未一家人一齊食飯喇，因為威哥又要做暑假工，又有好多暑期活動！

跟住同埋碌齡朋友碌齡前睇"導火線"，幾好睇，因為打得好勁，不過都係男兒本色好睇ｄ，多ｄ劇情！呢套就係咁打，加上導演甄子丹似乎都唔甘於只做導演，佢打得最多．．．有ｄ自戀過度，哈哈！不過佢真係好大隻！

2007-08-10 (Fri) 八號風球

今日天公造美，全香港人放了半天假，雖一如以往，怨聲四道，但我只覺是bonus，加上剛返工一天，就有假放，已很滿足同開心了！

八號風球下的K K Leung，會落閘的，今天才驚奇地發現，道閘原來一直係捲起匿藏在正門上方位置，一直也不知道呢！

謝謝Jimmy Sen車我地去火車站，跟住去左太陽哥哥度打牌，仲有BEN同琪琪呢！太陽爸爸熱情地預備晚飯比我地，不過未夠六點就食的晚飯，好耐好耐冇試過了，下次晏返少少會好ｄ，嘻嘻！

2007-08-09 (Thu) 悠長假期完結了！

悠長的假期終於要完結了，今日要回復以往打工仔的日子，十萬個不願意呀！屈指一算，由五月十八日第一日，到八月八日，共兩個月零三星期的病假，對我呢個卑微員工黎講，真係好筍，雖然手術結果唔係好理想，但要我揀多次，我都情願捱呢刀，哈哈！

咁耐冇見同事，加上都想答謝返佢地都有黎醫院探我，我就係零食物語買左一大堆零食作為手信送比大家喇！

最驚喜係以下發現．．．

原來係七月時一個星期六返公司做野時，太陽哥哥已預備了這個驚喜比我！好開心！最衰係我做左成朝都未發現，都係佢打比我，問我有冇發覺多左ｄ野先知，哈哈！

仲有一位朋友要特別感謝，就係肥Ben，平時我返工佢打黎，通常都係叫我幫佢check股價，但今日佢特登打黎，只係問候我今日第一日返工慣唔慣；由於我好忙，只寒喧了數句，但收線後覺得好warm呢，因為善忘既佢，竟然咁有心記得我今日返工，我問佢咩事，佢只係話：無呀，您第一日返工麻，咪打黎問候下您點咋，慣唔慣呀？．．．諗返都幾感動！Thanks！

2007-08-08 (Wed) 覆診之八

今日覆診，覆左好耐．．．先去照x-ray，跟住睇主診醫生，佢話上圖見到仲有少少腫（可以與左腳比較），骨與皮膚之間的淺色位置就係軟組織（紅圈位），不過已經好過上個月，但需要時間慢慢消腫的；下圖的折骨癒合得都唔錯（紅圈位），已埋晒口咁滯！最差的問題，係腳趾公現在彎返二十度，未做手術前係三十幾度，做完十幾度，驚會有返返轉頭跡象！加上醫生覺得我行路時有ｄ傾向左邊，重心放左咗，咁腳趾公受太多壓力，會令佢容易彎返；係佢建議睇睇矯形部醫生，用一ｄ特製工具減輕返轉頭！

矯形部醫生講解一輪後，一句講晒，要整個腳模，之後要大部份時間著住，無論係屋企都係，而個腳模要著鞋先著到，係屋企都要著鞋焗住對腳，真係．．．唉！跟住即直倒模，下星期覆矯形部醫生，到時試模同教我點用；主診的骨科醫生就十二月先再睇，但佢就寫左紙我返中大做物理治療，學下點樣行到唔好比太大壓力剛做完手術的腳趾公！