收到 Ben 的婚照，呢幾張係我被其他兄弟們拋起的相片，睇得出我個樣好驚囉．．．梗係啦，當時佢地真係拋到我好高架，仲高過埋backdrop，好有離心力呢！
2010年11月30日 星期二
2010年11月29日 星期一
2010-11-29 (Mon) Cooking Class：冬菇馬蹄魷魚蒸肉餅．蒜蓉粉絲蒸大蚌
今日到我跟媽咪上堂，想學蒸肉餅好耐架啦，因為可放係煲或電飯煲內蒸，咁煮餸時可少一樣餸用鑊，煩少樣麻！
材料：$15半肥瘦梅頭(媽咪自己剁碎, 我整梗係買攪碎算啦!!)、8粒冬菇、四粒馬蹄、兩片魷魚。先醃肉碎，用約半匙糖、一匙粉、多多生抽。
其餘材料切粒，跟住同肉碎撈埋一齊就可拎去蒸架啦！
今日有我勁極鐘意的貝殼類，仲係大蚌，街市唔成日有架！但我返到黎時，媽咪已洗好晒，佢仲話我唔好學呢樣啦，因洗得好辛苦架喎！
調味：鹽、蒜蓉、少少豆粉。
鋪上粉絲就可拎去蒸架啦～～
落ｄ鼓油可以食啦，呢樣餸我超鐘意食架！
今晚都有蒸魚，但我怕買魚，應該好少煮架啦！
2010年11月28日 星期日
2010-11-28 (Sun) Cooking@Home：花膠湯．茄汁蝦．焗雞翼．瑤柱蒸水蛋．翠玉瓜炒什菇
今日仲去左兩次街市，一次早餐後，一次下午時間諗住買新鮮大蝦，點知冇．．．
今日係屋企煮飯，因為媽咪都會一齊食，我又要帶飯聽朝返工，加上媽咪認承我可以係度stand by，我有咩唔識可即刻問佢，我就好勇咁決定整四餸一湯！
花膠湯：
煲湯排骨$35、粟米紅蘿蔔各兩條、五粒蜜餞、秘製果皮三片、花膠。
焗雞翼：雞翼一打＋孜然粉。
翠玉瓜炒什菇：翠肉瓜一條＋一堆什菇。
瑤柱蒸水蛋：蛋四隻＋瑤柱六粒(熟水浸)。
茄汁蝦：下午落街市個轉冇工而回，因為今日冇大蝦；唯有改用惠康超唔抵"特大虎蝦"，係雪格儲貨的最後一盒，唔會再買。
先將食材出水，通常水滾後放入，待水再滾起時，再烚約五分鐘，撈起用生水洗淨＋浸住，備用。
菇切條狀，跟住出水，因為水會變黃，菇類要換幾次水。
花膠媽咪一大包買返黎時已經出晒水，再分好一包包咁放入雪格，每次煲湯拎一包用；只要解凍同洗下就得，好方便！
放入約四分三煲水後，大火煲滾，落晒所以材料，花膠除外；待再次滾起後，轉中小火，慢慢滾住咁繼續煲，大約煲兩個鐘啦；跟住先落花膠，再煲個約半個鐘，落鹽，熄火蓋住；食晚飯前再煲返滾就得架啦！
雞翼洗淨抹乾，醃製，我用了多多糖、中中豆粉、少少鹽、兩三圈生抽、少少老抽、一蓋酒，仲有我同媽咪都係第一次試的孜然粉。
翠玉瓜切條備用：
預備薑、蒜蓉、蔥等，切片備用；今日心情好，切下蔥花先。
大蝦解凍後，剪晒ｄ鬚同腳、挑蝦腸唔難，但係最嘔心．．．跟住用鹽醃下。
休息左個幾鐘，六點三太陽哥哥放工返黎，開始煮飯；最怕煮野食樣樣都要用個鑊，分散投資好ｄ，所以先用煲蒸水蛋；先楂ｄ油上碟，跟住連碟一齊係煲入面，落蓋待水煲滾；發蛋時落鹽，浸好的瑤柱撕好一條條，連浸瑤柱的水倒入，再另加熟水，份量預蒸碟的容量。
水一滾，開蓋，繼續開住火咁倒入蛋汁，即上蓋，待大約兩分鐘，其實會睇到蛋汁開始變淺色咁凝固。
約兩至三分鐘後熄火，千其唔好揭開蓋，放埋一邊由佢自然繼續焗，煮好晒飯就自然食得！
另一邊廂，雞翼用多士爐焗，我冇錢亦冇位放焗爐呀，所以只能運用屋企唯一的多士爐焗雞翼咋；第一次玩，原來每次頂多放到七至八隻雞翼咋，下次會因返個數量買！第一轉用了15+5分鐘，第二轉用了10+5分鐘，＋係指反轉再焗。呢個好簡單，吩咐好太陽哥哥幫手就可繼續入廚房煮其他野！
大火落油、薑片蒜片、翠玉瓜，炒至瓜半熟時，再落菇，跟住調味，落左多多蠔油、中中糖、少少鹽，唔夠色可加點老抽。
大火落油、薑片蒜片、大蝦，煎熟兩邊時，跟住調味，落左多多茄汁、多多糖、少少鹽、少少水，最後一路落豆粉水一路炒，炒到岩杰度就成。
水蛋同第二轉雞翼未得，媽咪已忍唔住想食喇！
不如影相先啦～～
水蛋都攪掂啦～～
個湯好甜好正呀，我同媽咪講左，以後煲湯就會自己去佢雪櫃度拎花膠果皮蜜餞，哈哈！
真係食得啦～～
為食媽咪太快，熱親！
好味就比個笑啦～～
今次煮飯寫得好詳細啦，朋友仔唔好再話我啦，其實比起媽咪細妹，我煮得個ｄ都係簡單野；今日自己都好開心，不過最多謝媽咪一路係我身邊，令我好有安全感！佢又陪左我落左兩次街市啦，下午佢想訓覺但又知我想佢係度陪我，佢就唔走，跟住係我張梳化度訓左；媽媽真偉大，I Love You！
訂閱：
文章 (Atom)