每年的Halloween，我總要玩ｄ野，今年亦唔例外；正路會去海洋公園，我都玩了兩三年；今次太陽哥哥建議玩迪士尼，因為舊年佢都同我玩過海洋公園了，我都贊成，我同佢都未試過玩迪士尼Halloween，大家都第一次，試下新野麻；但玩呢ｄ，最好一班朋友一齊去先好玩，一叫埋朋友，大多數都會揀海洋公園，後生細仔，刺激ｄ麻！點知係臨去教協買飛個剎那，又因為報紙出晒海洋公園被投訴的新聞，我地就轉左軚去迪士尼！但就難為了elsa & david維持原判，佢地兩個要自己玩海洋公園，真係sorry呀！
迪士尼Halloween只得星期五同六晚，時間為1730-2300；出發前先醫肚，就係太陽媽媽蒸比我地食的愛心大閘蟹喇！
約左係青衣城集合，整理好行裝，呢個就係我地個形象設計喇！
對牛角同老虎髮夾，就係剛剛係台灣買既，唔知大家有冇印象呢？上個月係台灣買時，就係為今日的Halloween作出準備架啦！太陽哥哥好好，話晒佢年紀都唔細啦，都肯同我一齊癲，比休同明記笑死都若無其事，仲成日係咁"fing"個頭，等對老虎耳仔"登"下"登"下，好攪笑，佢好投入咁戴足晒全程，陪我影相都靚ｄ，我梗係好開心啦！哈哈！
迪士尼入口
入場後都唔知點玩先，但根據地圖，同Halloween有關既有巡遊、鬼屋同space mountain；因為唔知鬼屋location，咁就玩space mountain先啦！冇咩特別，只係多左好多鬼樣，都唔驚既．．．不過好快，好快，好驚對牛角會甩囉，哈哈！
明記好鐘意玩，猛話要玩過，但開始多人了，要等一個鐘，我地就拎fastpass，跟住去玩鬼屋！
影張大合照先，不過搵人方面真係搵錯人，影得好差呀．．．
正經ｄ啦唔該~~
咁鐘意玩，咁大家一齊唔正經啦，明記楂無影車真係好抵死呀！
太陽哥哥真係好曳．．．救命．．．
好cool的跑車~~
嘩！開得好快呀！
去到鬼屋門口，噩耗．．．要排兩粒鐘！玩完咪九點幾，miss晒巡遊同煙花？唉．．．唯有．．．失望地放棄．．．都幾唔開心架，特登黎玩Halloween，梗係要玩鬼屋架麻！
無計啦，我地就返轉頭，諗住玩ｄ今年先開既新野，譬如史迪仔同馳車天地；史迪仔比預期好玩，最衰係國語session，突然好似去左大陸長隆咁，但都好攪笑！馳車天地又要等一粒鐘，兼無得拎fastpass，放棄了，轉玩巴斯光年，之後再玩多次拎了fastpass既space mountain！
撞到好cutie的甲蟲ＢＢ，今日佢生日添，有個大襟章架；甲蟲媽媽好熱衷咁係咁"隊"佢個甲蟲ＢＢ比我地同佢影相添，勁攪野！
巴斯光年的fastpass機~~
史迪爪~~嘩！嘩！
個pose好型喎！咁都夠膽擺得出．．．哈哈！
黎多張大合照先~~
Halloween Fanta~~
充滿Halloween feel的睡公主城堡，我覺得藍色靚ｄ，但影相就好似橙色sharpｄ！
煙花後我地就係附近影相同霸位等巡遊！
花車巡遊時間，但礙於夜晚，好難影得靚；其實我覺得第一架jack帶頭，同最尾個架有晒迪士尼人物先最靚，其餘個ｄ一般咋；講開迪士尼人物，我全晚冇見過，淨係喺美國大街見到有人排隊同jack影相，其餘mickey呀、minnie呀、chip n dale呀、通通未見過呀，係喺花車上面望到一眼咋，真係唔開心！
巡遊後已經十點幾啦，我地"拿拿林"爭取時間，小熊維尼原來太陽哥哥同琪琪都未玩過，咁就即刻衝去玩啦！我之前就玩過，佢地就第一次，不過真係好靚，但都唔及日本迪士尼個嗰咁科幻同浪漫，希望下一次去日本可以玩過啦；但去了兩次日本disneyland，下次係咪應該要去disneysea呢？矛盾．．．到時先算啦！
跟住都差唔多時間close，我地就去shopping，不過零收穫，因為好多人好迫，我又唔覺有咩cutie既chip n dale產品，太陽哥哥係咁叫我揀叫我買，但我都唔知買咩．．．走時，有份不捨，今次已係第三次黎香港迪士尼，可能女仔掛，都有種童話憧憬，次次走時都有種失落架！又或者，今日玩唔到鬼屋，有ｄ唔抵既感覺；跟住轉軚玩ｄ新game，又一樣玩唔晒喎，激死！如果走時係去酒店個邊，住一晚跟住聽日又可黎過，就仲開心了！哈哈！（其實去左咁多次，都玩冇可玩，又冇咩特別，但個心又唔知點解會想玩，我都攪唔明！）
之後搭巴士回家見到一個攪笑場面，都夜啦，成十二點幾，巴士大把位，點解三個大肥仔硬要迫埋一齊坐，迫到突左半個pet pet出黎呢？
四款入場票一齊影返張靚相先~~
沒有留言:
張貼留言