2007-10-31 (Wed) Happy Halloween

今日係萬聖節，係度祝大家happy halloween！

聖誕生日收禮物都正常，萬聖節收禮物都係第一次！今日收到BeBe送的chip n dale夾仔，好cute，多謝您呀！放心啦，我冇呢款呀，緊張大師！嘻嘻~~

今年萬聖節係閒日，沒有同朋友出去玩了，記得有年去蘭桂坊，迫到死，行花市咁，我行了十分鐘就放棄了！其實萬聖節我都係鐘意去玩下鬼屋，或者同朋友食萬聖節餐，咁先有氣氛！有年玩得好難忘，化晒妝食萬聖節餐，跟住係條街度行！同大家分享下啦：

而今年，早前都已經去左迪士尼玩，今日正日都唔出去了！

2007-10-30 (Tue) Dinner @ 別府 (with Tracy)

今日約左好姊妹Tracy食飯，佢係澳洲返黎一個月，中間仲會去十日歐洲，真係羨慕死人！Tracy係我best friend，best即係最啦，"最"亦即係最嗰一個；我地既情誼係我結婚時一定會搵佢做伴娘個隻，除非佢返唔到黎or細妹要做啦！我地由小學二年班就識，咁多年都同一班，直至中二佢移民；我地感情都好好，雖然分隔兩地十多年，但感情不變！

今日第一日見，旨在傾計談心，地點冇咩所謂，最緊要坐得耐，我地就揀左別府！兩個人叫左咁多野食，好開心！

我地一共坐左三個鐘，仲叫埋野飲，隔離檯都換左三檯客，哈哈！好在今日係閒日，無咩人，我地又訂了卡客，自成一角，無人騷擾；我地無所不談，其實最開心係見返佢！

2007-10-29 (Mon) Mega Box

今日同太陽哥哥一齊放假，因為年尾，佢要清假呀；而我，一向大把假，放假當然冇問題啦！閒日放假，梗係去ｄ平時好多人既地方啦，一於去mega box，因為我地有次想去，見到穿梭巴士條龍好長，最後就放棄去行IKEA算啦！

先係樓下食個日式下午茶先，呢間日本料理見就見得多，但從未試過，今日放假，唔想再食餐茶廳了，一於試下，又幾好食喎，下次可試下晚飯先！

去到九龍灣穿梭巴士站，同上次簡直天淵之別，唔洗排隊；去到mega box，超少人，超靜，唔少得梗係要同大logo影相先啦！

入到去係ground floor，G字係我最鐘意的英文子母，咁大個G字，梗係要影啦；太陽哥哥仲要咀佢添呀，哈哈！

行B&Q，無咩特別，都係IKEA好玩同好行好多；最得意係手推車前面加建了小朋友玩具車，方便爸爸媽媽shopping，好盞鬼呀！

入面有條長長的扶手電梯通上第二層，最吸引我係兒童房啦，尤其呢間以disney pooh pooh做主題的房間！我已經係大朋友，冇得返老還童，唯有等第時我個小寶寶，我一定要比間咁靚咁colourful既房佢架！

UA IMAX THEATRE，暫時冇戲岩，唔係就可以欣賞下3D電影！

之後去左food court個層，有個溜冰場，仲見到有班好曳既鬼仔學緊冰上曲棍球！

咁多野食，又為食，忍唔住口，原本食MOS BURGER架，但諗諗下，咁遠黎到，應該試ｄ平時冇得試既；加上，我地如無意外，都唔會再黎了！

是日晚餐：柬埔寨新鮮到港的大頭蝦（亦是太陽媽媽叫我返去食飯的原因），加太陽爸爸的蒜蓉炒通菜，呢個菜我好鐘意食，次次太陽爸爸下廚，九成都會煮呢味菜架！佢知我地鐘意食，就次次係咁煮．．．係咁煮．．．好攪笑，唔怕我地厭咩？哈哈！

太陽媽媽的愛心飯盒，上次提過了，佢特登買比我同太陽哥哥的；小份係我，大份係太陽哥哥的！Yammy，應承了您，終於見到吧？嘻嘻~~

2007-10-28 (Sun) 大鵬灣拜山

今日我地返深圳大鵬灣拜山，好多年冇去了，近年都係去大嶼山觀音廟，但個度只有公公的靈位，而公公婆婆都係一齊葬係大鵬灣的，今次媽咪就建議返大鵬灣！醒目既我，搵左ben幫我book上次去沙井玩高卡車的七人van，咁我地就唔洗咁辛苦長途跋涉啦！

我地分別出發，約左係上水廣場集合，先係椰林閣食早餐！

之後十二點係深圳上車，車程大概四十五分鐘就到大鵬灣；呢度真係山明水秀，水平線好長好長，香港一定搵唔到，拍得住外國個ｄ，威哥話中國地大脈搏，版圖咁大，水平線當然好長啦，真係好靚好舒服！

我地去到冇耐，有兩個大陸人走過黎問要唔要幫我地掃下ｄ草、剪下ｄ樹枝，我地個墓地根本好乾淨，唔需要，就話唔要啦；唔到五分鐘，又有另外兩個人走埋黎，問埋同一樣野，我地話唔洗啦，唔要啦，佢地仲係咁講係咁講．．．最"興"係佢地唔理我地講，走埋去係咁掃係咁抺，真係好大膽同乞人憎！！我地諗住唔理佢地，因為只係佢地堅持，唔慣我地事；但我地係好心的香港人，相信佢地亦知道我地呢個弱點，最終被佢地成功了；因為媽咪話：唉，算啦，又唔係成日黎，驚唔比錢唔知佢地會唔會攪個墓．．．我話：下，先人黎喎，唔係咁大膽呀？但琪琪同太陽哥哥都一致話大陸人，咩都做得出！細妹話仲見過ｄ大陸人係人地掃完墓離開後，拎走ｄ鮮花然後係路口賣！下，咁都得？唔驚比先人．．．唉，大陸人真係離譜！佢地掃掃下，又一個阿嬸走埋黎，自己係度剪草，有冇攪錯呀？咁都得？！早前個兩個掃完，就坐埋一邊係度食煙，等收錢．．．我地就比左三十蚊打發左佢地．．．唉！

跟住我地開餐，食燒肉同雞，逗留左大概一個鐘，影左少少相，同公公婆婆講聲再見就走啦！

返到東門周圍逛下，好多人呀！仲見到有人briefing，"to be no.1"，咁有teamwork，大陸人都會有既咩？

晚飯去左"毛家飯店"，媽咪聽我地講就食得多，佢未去過，我地今次就特登帶佢黎試下！唔少得梗係影返輯靚相同溫馨全家幅啦！

叫埋咁多餸，埋單先係$284，好抵呀！香港起碼四五舊水啦！

之後帶媽咪去左個大型超級市場，每次去完"毛家飯店"，細妹都會係度掃貨架！我只係揀左好鐘意食的糯米糍咋！

跟住啟程返香港，係上水同媽咪say goodbye後，我地就返大圍；去到沙田，太陽哥哥好醒咁記得我想去citysuper買野，我地就拿拿林落車！去到仲未close，好野！就係呢塊鏡啦，一開三，知唔知點解？向前望就好似普通鐘咁，照正面；但向上望時，下鏡就會反射下眼睛；向下望時，上鏡就會反射上眼睛，好神奇好好用架！多謝太陽哥哥！

見到個好得意的雪糕cushion，lam lam 脷！嘻嘻~~