今日第一次係學校做物理治療，物理治療師教左我點行、點練習、點郁，去盡量減低手術後的還原狀況；其實佢呢度幫唔到好多，最緊要自己喎；我都覺得係，但您叫我行時挨返右邊ｄ，咁右邊咪負荷好大？同埋行路係成隻腳掌掂到地面架麻，我一挨右，左邊的腳趾公同整個左邊部份，係離開地面架，咁點夠力呢？究竟係我隻腳太瘦？定係無肉？．．．宜家要等星期五返威爾斯醫院見矯形及義肢部醫生，到時試下個新模，用左希望會有改善啦！
今日物理治療師先幫我用超聲波抒援隻腳，因為佢都知我仲未消晒腫；做時都幾舒服，可能有專人幫您按摩咁！
2007年8月20日 星期一
2007年8月19日 星期日
2007-08-19 (Sun) 軒軒BB
軒軒BB係我細妹的契仔，大家有印象的話，我係四月時同佢影過相的；相隔接近五個月，軒軒BB大個左好多，輪廓出晒黎，加上我又鐘意仔，梗係要玩多幾錢重啦！
今日軒軒媽咪就帶左佢上黎我屋企比我地玩啦，唔係，係探我地之真．．．嘻嘻！
軒軒BB係一個開心BB，好容易就會笑，只要對住佢叫：『軒軒．．．軒軒．．．』佢就會笑架啦！
嘩．．．好大個口，無牙仔，好得意！
加油！努力撐住呀！
傻豬樣~~
好嗲喎！呢個係咪．．．契．．．契婆婆？？關係複雜，諗唔到呀！
"bu"口水．．．
呢張"friend過打band"相，係大家一致認為全日最靚的一張，由名攝影師Giv仔操刀架！搭晒膊頭，真係cute到爆呀！
『您地影夠未呀？我好攰，要休息啦！』
跟住我地靈機一觸，同軒軒戴上monchichi頂帽，效果？有目共睹啦，好可愛！
『嘩，monchichi，我幾時先可以有您咁多頭髮呀？』
『我冇力喇，"lum"喇啦，help！』
喂，細路．．．咦．．．好多口水呀！
(突然一百八十度轉變)『嘩，影相個件！您好樣衰呀！』
希望軒軒今日唔會比我地玩殘左啦，哈哈！不過，佢今日用左咁多精神陪我地玩（陪您地玩？定比您地玩呀？），我相信佢今晚應該會訓得好"冧"下！哈哈！記得多ｄ上黎探我地呀！
2007年8月18日 星期六
2007-08-18 (Sat) 八月之星生日聚會
今日係八月之星生日聚會，首先感激休呢位攪手，近年的活動佢都親力親為兼好有責任，有時都見佢幾辛苦，今次好有心訂定有名蛋糕添，仲係我未見過兼勁靚的蛋糕！大家比ｄ掌聲我朋友好嗎？佢會聽到的！
我地去左深井裕記食燒鵝，燒味黎講，鵝係我幾低的選擇，不過唔緊要啦，旨在一班朋友開開心心聚首一堂，試問有幾多班朋友可以咁大班，成日都咁齊心一齊出黎呢？呢班朋友真係算唔話得啦！
細妹今日玩偷影，出黎效果又幾好喎！佢話下次每個活動都要影呢ｄ大頭相，仲要扮鬼臉，幾好諗頭丫！原來，鐘意狂影相的人，係大有人在的，哈哈！
先黎張三個福祿壽壽星公合照，跟住獨照，再跟住大合照先~~
又被"昆"影相其實拍短片啦，哈哈！咁樣切蛋糕法，都好殘暴姐！
之後返老地方齡場舉行"第二屆小圈子保齡球大賽"，休之前仲委任左細妹買隊際小禮物，雖然唔係畫得好靚，但旨在有心認真諗過用咩做禮物麻，加上有埋日期，後面仲有隻豬代表豬年，都幾有紀念價值架！另外仲有必備的獎牌！
今日咁岩十二人，所以比賽分三隊，由三位壽星仔女猜人；最後結果係以下相片順序冠、亞、季軍(隊際)，及個人賽順序頭三名分別係漢、BEN、非洲，恭喜晒！
跟住頒獎，有請隊際勝出組．．．竟然有琪琪，新人唔緊要，打得差都唔緊要，最緊要係命水好，痴到ｄ勁人！哈哈！
之後個人賽頒獎，好似香港小姐咁，係生日之星陪同下，由上屆得主頒比新的得主，先黎銅獎，由靚女GIV仔頒比非洲；附送爆笑得獎感受短片！（吓．．．一個月咋喎．．．咁都有感受？）
銀獎，由鑫頒比BEN
金獎，由非洲頒比漢
冠亞季合照．．．好白痴呀，大家估下邊個打邊個？
禮物簡直多蘿蘿，仲有生日之星的禮物，男仔不離足球野，女仔就有公仔！
今日真係唔錯，無咩甩漏，進度都算smooth，又影左好多好有紀念價值的相，今次休應該大可放心了！
休：唔好咁大壓力，您已經做得好好了，預備左咁多野，真係出心出力！多謝您比左咁開心的一晚大家！您睇我地笑得幾開心幾滿足！
2007年8月17日 星期五
2007-08-17 (Fri) Kruspy Kreme Doughnuts & Rush Hour
前幾天應承了媽咪會請佢食呢隻冬甩，今日睇完戲後十點幾係旺角見仲未收舖，就買左返屋企！最攪笑係唔知係咪ｄ職員攪錯左定點，有一叠紙帽放係度比人拎，我地就拎左兩頂，返到屋企時係門口戴定，跟住衝入屋大叫送外賣，笑死媽咪！
不過佢好開心，梗係啦，我地咁有心，佢即刻成盒捧住坐埋一邊係度食，一路食就一路話：um....好味...好味！食到成個小朋友咁，似足一個大細路！
Rush Hour係太陽哥哥等左成半年既戲，因為佢係成龍大哥既：長期忠實die hard粉絲，哈哈！套戲就．．．內容麻麻，劇情有ｄ無聊，但有好多爆笑位，仲係全場大笑個隻，大家想輕鬆下，不妨去睇啦！
訂閱：
文章 (Atom)