2012-04-29 (Sun) Dinner@Euro Go Go

突然好想食薯皮，晚飯去左Euro Go Go Go，仲咁岩食到下午餐；但餐飯麻麻地，薯皮+蒜蓉包OK，但個通粉同我杯奶，超難食／飲！

2012-04-28 (Sat) 復仇者聯盟．華星冰室晚飯

今日睇復仇者聯盟，原本諗住去 MK GH 試 motion chairs，不過星期三買飛都 full，兼且要成接近二百一張飛，太貴了，細妹話朋友試過好"留"！套戲好緊張，冇悶場，事後先知原來兩個幾鐘架！

太陽哥哥愛上華星冰室，又去食晚飯～～

2012-04-27 (Fri) Dinner@上上拉麵小龍包

今日約左Ben & Olivia係上上拉麵小龍包度食晚飯，好耐冇見Olivia啦，對上一次應該係Ben結婚時；今晚雞啄唔斷，食左成三個鐘！九點半後我就超眼訓啦，因為平時已上床訓覺，但難得佢地咁有興致，就陪佢地啦！走時落大雨，今日天氣真係差，攪到商場超多人，訂左位都要等．．．

 

2012-04-25 (Wed) Lunch@翠園 with 親戚

今日放左半天假, 同親戚們係新世紀翠園飲茶，表姐聽日去台灣11天呀，兩個小朋友最興奮！睇住佢地長大，哥哥拖住弟弟行街，真係好得意！

飯後陪表姐買野，佢順便話比我聽會比ｄ咩BB野我咁！

 

2012-04-24 (Tue) 妊娠糖尿測試

上星期四做妊娠糖尿測試, 正常七個月大先做, 但因為媽咪同婆婆都有糖尿病, 所以醫生建議我早做一次; 經過上次係QM抽下血驗收左我一千大元, 今次我醒目啦, 問醫生返中大clinic做拎返報告比佢得唔得, 咁就免費啦!  姑娘幾好, 將糖水溝暖水, 溝埋變左做三杯餐廳水杯容量既糖水我飲, 聽朋友講醫院個d 好杰好難飲, 好似飲糖漿一樣, 我就冇糖漿咁杰, 係難飲但都入得口既, 唔知係咪呢度溝多水d 呢!  飲前後相隔兩個鐘, 各抽一次血, 個窿仲好係接近呢!

今日有報告拎, 血糖有點踩界, 尿入面都有糖份....醫生話呢個stage冇問題, 但可能我有糖尿傾向, 叫我食少d 甜既先, 其實我都冇咩食甜野架!

2012-04-22 (Sun) 剪掉三分二頭髮．Dinner@自家製烏冬．大戲棚

今日下起決心，剪掉三分二頭髮，實在頂唔順每晚洗完頭，要舉起手半個鐘才能吹朝成把頭髮的動作，攰到呢～～

 

等埋太陽哥哥剪完，一齊同太陽媽媽食晚飯！

再到青衣大戲棚掃街，開到星期三，但睇怕我地只會今晚先黎到，下次要等下年了！多謝陳媽媽的半價豆腐花，我黎都係為買它！

2012-04-21 (Sat) 中環．銅鑼灣．金鐘．旺角

今日係忙碌又充實的一天，十點半出門口，先去中環醫生度拎返上次Oscar Test 的 report；經過匯豐總行時，第一次親身黎到見到咁多帳篷！

有關小丁丁size的部份報告：

跟住過銅鑼灣，帶了小禮物，約了 Michele 係Ruby Tuesday 食生日+farewell 飯！

跟住去金鐘，返 BC 改左三鐘卷！攪店後落旺角，會合太陽哥哥，好少係佢等我放工呢！哈哈！我地周圍行下，晚飯又去左華星冰室；今次我試燴意粉，好好味呀！黎緊我都要試煮比太陽哥哥食先得！

我係度影相，佢就扮等左我好耐接佢份三文治食！哈哈！

 

2012-04-20 (Fri) Dinner@Shabu Shabu

表姐發現Shabu Shabu有promotion, 不過只限將軍澳, 樂富及銅鑼灣分店; 我地就約埋今晚一齊去樂富分店度食, 又可以同兩個小朋友見面, 好開心!

開餐!

 

呢度d雪糕好好味, 我一裝完返黎, 諾諾好心水清問: 您有baby, 唔得雪糕哥喎! 好攪笑! 我唯有答佢: 我會含住先, 等唔凍先吞落肚, 咁就唔同凍親小baby喇! 哈哈!

諾諾跟餐廳logo, 畫了一隻牛呢!

跟住我地去左旺角金魚街買野, 表姐再車我返屋企, 仲運左四大袋野比我, 包括BB衫及育嬰書!